Vuosttaš Mosesgirji

Babela toardna

¹ Oppa eatnamis sárdno ovtta giela ja geavahedje seammá sániid. ² Go olbmot vulge nuorttas, de sii gávdne Sineara eatnamis leagi ja ásse dohko. ³ Sii dadje guhtet guoibmáseaset: “Dahkkot diilageđggiid ja boldot daid garasin.” Sii atne diillaid huksengeađgin ja eananbihka muvremii. ⁴ Sii dadje guhtet guoibmáseaset: “Huksejehkot alcceseamet gávpoga ja toartna mii ollá albmái. Nu mii dahkat alcceseamet nama, amamet bieđganit miehtá eatnama.”

⁵ De Hearrá njiejai geahččat gávpoga ja toartna maid olbmot ledje huksemin. ⁶ Hearrá celkkii: “Sii leat okta álbmot, ja sis buohkain lea oktahat giella. Dát lea dušše álgu. Dál sidjiide ii leat veadjemeahttun mihkkege maid sii áigot dahkat. ⁷ Njidjot ja moivašuhttot sin giela, vai nubbi ii gula nuppi sárdnuma.” ⁸ Ja nu Hearrá biđgii sin miehtá eatnama, ja sii heite huksemis gávpoga. ⁹ Gávpot gohčoduvvui Babelin, dasgo doppe Hearrá moivašuhtii oppa eatnama giela, ja doppe Hearrá biđgii sin miehtá eatnama.

Sema sohkalogahallan

¹⁰ Dát lea Sema sohkalogahallan. Sem lei čuođijahkásaš go sutnje riegádii Arpakšad. Dat dáhpáhuvai guokte jagi maŋŋil dulvvi. ¹¹ Sem elii vel vihttačuođi jagi Arpakšada riegádeami maŋŋil, ja sutnje riegádedje bártnit ja nieiddat.

¹² Go Arpakšad lei golbmalogiviđajahkásaš, de sutnje riegádii Šelah. ¹³ Šelaha riegádeami maŋŋil Arpakšad elii vel njeallječuođigolbma jagi, ja sutnje riegádedje bártnit ja nieiddat.

¹⁴ Go Šelah lei golbmalogijahkásaš, de sutnje riegádii Eber. ¹⁵ Ebera riegádeami maŋŋil Šelah elii vel njeallječuođigolbma jagi, ja sutnje riegádedje bártnit ja nieiddat.

¹⁶ Go Eber lei golbmaloginjealjejahkásaš, de sutnje riegádii Peleg. ¹⁷ Pelega riegádeami maŋŋil Eber elii vel njeallječuođigolbmalogi jagi, ja sutnje riegádedje bártnit ja nieiddat.

¹⁸ Go Peleg lei golbmalogijahkásaš, de sutnje riegádii Reu. ¹⁹ Reu riegádeami maŋŋil Peleg elii vel guoktečuođiovcci jagi, ja sutnje riegádedje bártnit ja nieiddat.

²⁰ Go Reu lei golbmalogiguovttejahkásaš, de sutnje riegádii Serug. ²¹ Seruga riegádeami maŋŋil Reu elii vel guoktečuođičieža jagi, ja sutnje riegádedje bártnit ja nieiddat.

²² Go Serug lei golbmalogijahkásaš, de sutnje riegádii Nahor. ²³ Nahora riegádeami maŋŋil Serug elii vel guoktečuođi jagi, ja sutnje riegádedje bártnit ja nieiddat.

²⁴ Go Nahor lei guoktelogiovccijahkásaš, de sutnje riegádii Terah. ²⁵ Teraha riegádeami maŋŋil Nahor elii vel čuođiovccinuppelohkái jagi, ja sutnje riegádedje bártnit ja nieiddat.

²⁶ Go Terah lei čiežalogijahkásaš, de sutnje riegádedje Abram, Nahor ja Haran.

Teraha sohka

²⁷ Dát lea Teraha sohka. Terahii riegádedje Abram, Nahor ja Haran, ja Haranii riegádii Lot. ²⁸ Haran jámii ovdal áhčis Teraha ruovttueatnamii, Ura gávpogii Kaldeas. ²⁹ Abram ja Nahor válddiiga goabbáge áhká. Abrama áhká namma lei Sarai, ja Nahora áhkká lei Milka, Harana nieida. Haran lei Milka ja Jiska áhčči. ³⁰ Sarai lei sahkuheapme, sus eai lean mánát.

³¹ Terah válddii mielddis bártnis Abrama, Lota, Harana bártni, manjis Saraja, bártnis Abrama áhká, ja vulggii singuin Uras Kaldeas Kanaana eatnamii. Muhto go sii bohte Harranii, de sii ásse dohko. ³² Terah elii guoktečuođivihtta jagi ja jámii Harranii.