Vuosttaš Mosesgirji

Abram vuoitá njeallje gonagasa

¹ Daid áiggiid go Amrafel lei Sineara gonagas, Arjok lei Ellasara gonagas ja Kedorlaomer lei Elama gonagas ja Tidal lei Gojima gonagas, ² de sii soahttájedje Sodoma gonagasain Berain, Gomorra gonagasain Biršain, Adma gonagasain Šinabain, Sebojima gonagasain Šemeberain ja Bela dahjege Soara gonagasain. ³ Sii buohkat čoahkkanedje Siddimleahkái, gos dál lea Sáltemearra. ⁴ Sii ledje bálvalan Kedorlaomera guoktenuppelohkái jagi, muhto golbmanuppelogát jagi sii stuimmáskedje. ⁵ Njealljenuppelogát jagi Kedorlaomer bođii ovttas daid gonagasaiguin geat ledje dahkan suinna lihtu, ja sii vuite refalaččaid Ašterot Karnajimis, suslaččaid Hamis, emlaččaid Šave Kirjatajimis ⁶ ja horilaččaid Seirváriin ja doarrádalle sin gitta El-Paranii, mii lea meahci ravddas. ⁷ De sii jorggihedje ja bohte En Mišpatii dahjege Kadešii, ja sii válde oppa amaleklaččaid eatnama. Sii vuite maiddái amorlaččaid geat ásse Haseson Tamaris.

⁸ Dalle Sodoma, Gomorra, Adma ja Sebojima gonagasat ja Bela dahjege Soara gonagas johttájedje ja divvo joavkkuideaset soahtan ládje Siddimleahkái ⁹ Elama gonagasa Kedorlaomera, Gojima gonagasa Tidala, Sineara gonagasa Amrafela ja Ellasara gonagasa Arjoka vuostá, vihtta gonagasa njealljása vuostá. ¹⁰ Muhto Siddimleagi dievva ledje eananbihkkarokkit, ja go Sodoma ja Gomorra gonagasat báhtaredje, de sii gahčče daidda. Earát báhtaredje váriide. ¹¹ Sin vašálaččat válde Sodomas ja Gomorras buot opmodaga ja borramuša ja de manne.

¹² Go sii vulge, de sii válde mielde maiddái Abrama vielja bártni Lota ja oppa su opmodaga. Lot ásai dalle Sodomas. ¹³ Muhtun báhtareaddji bođii muitalit dan hebrealaš Abramii, gii ásai amorlaš Mamre áikkaid luhtte. Mamre lei Eškola ja Anera viellja, ja sii ledje dahkan lihtu Abramiin. ¹⁴ Go Abram gulai ahte su vielja bárdni lei váldojuvvon fáŋgan, de son čohkkii vearjoolbmáidis geat ledje riegádan su viesus, buohkanassii golbmačuođi gávccinuppelohkái olbmá, doarridii gonagasaid gitta Dana rádjái. ¹⁵ Doppe son jugii veagas sierra joavkun, fallehii vašálaččaid ihkku, vuittii sin ja doarridii sin gitta Hoba rádjái Damaskusa davvelii. ¹⁶ Abram válddii ruoktot buot opmodaga ja fuolkkis Lota, su opmodaga, nissoniid ja eará veaga.

Melkisedek buressivdnida Abrama

¹⁷ Go Abram lei máhccamin ruoktot maŋŋil go lei časkán Kedorlaomera ja gonagasaid geat ledje dahkan suinna lihtu, de Sodoma gonagas bođii su ovddal Šaveleahkái, mii gohčoduvvo maid Gonagasleahkin.

¹⁸ Melkisedek, Salema gonagas, buvttii dohko láibbi ja viinni. Son lei Alimus Ipmila báhppa, ¹⁹ ja son buressivdnidii Abrama:

“Alimus Ipmil,

almmi ja eatnama sivdnideaddji,

son buressivdnidehkos Abrama.

²⁰ Máidnojuvvon lehkos Alimus Ipmil,

guhte attii vašálaččaidat du gihtii.”

Ja Abram attii sutnje logádasaid buot sállašis.

²¹ Sodoma gonagas dajai Abramii: “Atte munnje olbmuid, váldde don sállaša!” ²² Dalle Abram vástidii Sodoma gonagassii: “Mun bajidan gieđa ja vuortnun Hearrá, Alimus Ipmila, almmi ja eatnama sivdnideaddji, bokte: ²³ Mun in váldde maidege mii lea du, in ovttage árppu inge vuoddaga. Dalle don it beasa dadjat: Mun lean dahkan Abrama rikkisin. ²⁴ Mun in siđa eará go maid mu olbmát leat golahan. Dat olbmát geat ledje mu mielde, Aner, Eškol ja Mamre, galget oažžut iežaset oasi.”