Gi hjerteStøtt nettbibelen
Gå til forsiden

Vuosttaš Mosesgirji

16

Hagar ja Ismael

1 Sarai, Abrama áhkká, ii lean riegádahttán boadnjásis máná. Muhto Sarajis lei egyptalaš šlávvanieida gean namma lei Hagar. 2 Sarai dajai Abramii: “Hearrá lea buđđon mu nu ahte in riegádahte. Mana mu šlávvanieidda lusa; vai son riegádahtášii munnje máná.” Abram jeagadii Saraja. 3 Go Abram lei ássan logi jagi Kanaanis, de su áhkká Sarai attii egyptalaš šlávvanieiddas Hagara sutnje áhkkán. 4 Abram manai Hagara lusa, ja Hagar šattai áhpeheapmin. Go Hagar oinnii ahte son lea áhpeheapmin, de son badjelgeahččagođii eamidis. 5 De Sarai dajai Abramii: “Dát vearrivuohta maid mun gillán, lea du sivva. Mun adden iežan šlávvanieidda du fátmái, muhto son lea badjelgeahččagoahtán mu dan rájes go oinnii ahte lea áhpeheapmin. Vare Hearrá dubmešii munno gaskka!” 6 Abram dajai Sarajii: “Son lea du šlávvanieida. Daga sutnje maid dáhtut.” Ja Sarai ráŋggui Hagara nu ahte son báhtarii eret su luhtte.

7 Hearrá eŋgel deaivvai Hagara meahcis ájagáttis Šura geainnu guoras. 8 Son jearai: “Hagar, Saraja šlávvanieida, gos don leat boahtimin ja gosa mannamin?” Hagar vástidii: “Mun lean báhtaran eret eamidan Saraja luhtte.” 9 Dalle Hearrá eŋgel celkkii sutnje: “Máhca eamidat lusa ja vuollán su gieđa vuollái.” 10 Hearrá eŋgel celkkii vel sutnje: “Mun dagan du náli nu eatnagin ahte dat ii leat lohkamis.” 11 De Hearrá eŋgel celkkii sutnje:

“Don leat máná vuostá,

ja go riegádahtát bártni,

de gohčo su Ismaelin,

dasgo Hearrá lea gullan

go váidalit vártnuhisvuođat.

12 Du bárdni lea dego meahciásen,

son lea gazzalagaid buohkaiguin,

ja buohkat leat gazzalagaid suinna.

Son ássá buot vieljaidis

nuorttabealde.”

13 Hagar attii Hearrái, guhte lei sárdnon suinna, nama “Don leat Ipmil guhte oaidná mu”. Dasgo son jurddašii: “Leango mun duođaid oaidnán su gii oaidná mu?” 14 Dan dihte dat gáivo gohčoduvvo namain Beer Lahai Roi; dat lea Kadeša ja Bereda gaskkas.

15 Hagar riegádahtii Abramii bártni, ja Abram bijai bárdnásis, gean Hagar lei riegádahttán, namman Ismael. 16 Abram lei gávccilogiguđajahkásaš go Hagar riegádahtii sutnje Ismaela.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.