Kain ja Abel
1 Adam elii áhkáinis Evain, ja Eva šattai áhpeheapmin ja riegádahtii Kaina. Eva dajai: “Mun lean ožžon Hearrá vehkiin bárdnemáná.” 2 Son riegádahtii vel Kainii vielja, Abela. Abel šattai sávzageahččin ja Kain bealdobargin. 3 Muhtun áiggi geažes Kain buvttii Hearrái oaffarattáldahkan eatnama šattuid. 4 Abel maid buvttii attáldaga ja oaffarušai sávzzaidis vuosttašriegádeaddji lábbáid ja daid buoiddi. Hearrá geahčai Abela ja su oaffara beallái, 5 muhto Kaina ja su oaffara beallái son ii geahččan. Dalle Kain suhtai sakka ja su ámadadju sevnnjodii. 6 Hearrá celkkii Kainii: “Manne don suhttet, ja manne du ámadadju lea sevnnjodan? 7 Jos dagat riekta, de sáhtát bajidit čalmmiid, muhto jos it, de lea suddu vuođgŋimin uksaguoras. Dat lea hálideamen du, muhto don galggat ráđđet dan.”
8 Kain dajai vielljasis Abelii: “Vuolgu meahccái!” Doppe Kain fallehii vieljas ja gottii su.
9 Dalle Hearrá jearai Kainas: “Gos lea du viellja Abel?” Kain vástidii: “In mun dieđe. Leango mun vielljan geahčči?” 10 Hearrá celkkii: “Maid don leat dahkan! Vieljat varra čuorvu munnje eatnamis. 11 Don leat garuhuvvon itge oaččo šat leat dan eatnamis mii rabastii njálmmi ja válddii vuostá vieljat vara maid don golggahit. 12 Go don barggat eatnama, de dat ii šat atte dutnje šattus, muhto mášoheapmin ja golgolažžan don šattat vádjolit eatnama alde.” 13 Kain dajai Hearrái: “Mu vearredahku lea stuorit go maid nagodan guoddit. 14 Don áját mu dál dán eatnamis, ja mun gárttan eret du muođuid ovddas. Mášoheapmin ja golgolažžan mun šattan vádjolit eatnama alde. Gii ihkinassii deaivá mu, sáhttá goddit mu.” 15 Muhto Hearrá celkkii sutnje: “Ii fal nu! Jos muhtin goddá Kaina, de dat mávssahuvvo sutnje čiežageardásaččat.” Ja Hearrá bijai Kainii mearkka, vai son ii gottáhalaše geasage gii deaivá su. 16 Nu Kain vulggii Hearrá muođuid ovddas ja ásai Noda eatnamii, Edena nuortalii.
Kaina nálli
17 Kain elii áhkáinis, ja áhkká šattai áhpeheapmin ja riegádahtii Henoka. Kain huksii gávpoga ja gohčui gávpoga bártnis mielde Henokin. 18 Henokii riegádii Irad, Iradii riegádii Mehujael, Mehujaelii riegádii Metušael ja Metušaelii riegádii Lamek. 19 Lamek válddii guokte áhká; nuppi namma lei Ada ja nuppigis Silla. 20 Ada riegádahtii Jabala, gii šattai daid áhččin geat ásset gođiin ja dollet šibihiid. 21 Su viellja lei Jubal, ja son šattai buot daid áhččin geat čuojahit lyra ja njurgganasa. 22 Silla maid riegádahtii bártni, Tubal-Kaina, gii duddjogođii bronsa- ja ruovdedujiid. Tubal-Kaina oabbá lei Naama.
23 Lamek dajai áhkás guktui:
“Ada ja Silla, guldaleahkki mu,
Lameka áhkát, gulli mu sániid!
Mun gottán olbmá sárjjis,
juo ovtta sáhpadasas bártni.
24 Juos Kain mávssahuvvo
čiežageardásaččat,
de Lamek čiežalogičiežageardásaččat.”
Set ja Enoš
25 Adam veallái fas áhkáinis, ja áhkká riegádahtii bártni. Eva bijai sutnje namman Set ja dajai: “Ipmil lea addán munnje nuppi máná Abela sadjái, gean Kain gottii.” 26 Maiddái Setii riegádii bárdni, ja Set bijai sutnje namman Enoš.
Daid áiggiid olbmot álge čuorvut Hearrá nama.