1 Gud, hjelp meg til min rett.
Før mi sak mot trulause folk!
Fri meg frå menneske
som fer med svik og vondskap!
2 For du er mitt vern, Gud.
Kvifor har du støytt meg bort?
Kvifor må eg gå og sørgja
medan fienden plagar meg?
3 Send ditt lys og di sanning,
lat dei leia meg
og føra meg til ditt heilage fjell,
til dine bustader.
4 Så kan eg gå til Guds altar,
til Gud, mi glede og min jubel,
og syngja din pris til lyra, Gud, min Gud.
5 Kvifor er du sorgtyngd, mi sjel,
kvifor er du uroleg?
Eg vil venta på Gud!
Endå ein gong skal eg prisa han,
min frelsar og min Gud.