Høgsongen

¹ Om natta leita eg på leiet

etter han som eg elskar.

Eg leita, men fann han ikkje.

² «Eg vil opp og gå omkring i byen

på gater og torg.

Eg vil leita etter han som eg elskar.»

Eg leita, men fann han ikkje.

³ Vektarane som gjekk omkring i byen, fann meg.

«Har de sett han som eg elskar?»

⁴ Eg hadde ikkje før gått frå dei,

så fann eg han som eg elskar.

Eg tok tak i han og sleppte han ikkje

før eg fekk han inn i huset til mor mi,

i rommet til henne som fødde meg.

⁵ Eg bed dykk, de Jerusalems døtrer,

ved gasellane eller ved hindene i marka:

Uroa ikkje kjærleiken!

Vekk han ikkje før han sjølv vil!

⁶ Kven er ho som stig opp frå ørkenen

som røyksøyler,

omfløymd av angande myrra og røykjelse,

av alt krydder ein kan få kjøpt?

⁷ Der er senga til Salomo!

Seksti heltar omgjev henne,

seksti av Israels heltar,

⁸ alle væpna med sverd,

røynde i strid.

Ved hofta ber kvar mann sverd

mot redslene i natta.

⁹ Kong Salomo laga seg ei bereseng

av tre frå Libanon.

¹⁰ Stolpane gjorde han av sølv,

baldakinen av gull,

og madrassen kledde han med purpur.

Innsida er sydd saman av kjærleik frå Jerusalems døtrer.

¹¹ Kom ut, Sions døtrer!

Sjå på kong Salomo,

på krona som mor hans

krona han med på bryllaupsdagen,

den dagen som gledde hans hjarte.