Sámi vahku – Beaivi 1

Lohkat Biibbala ja jurddašit ja guorahallat maid teaksta cealká, dat addá eallima, eallinmovtta ja doaivvu. Nu oskkun dasgo profehta Jeremia dadjá: Mun attán didjiide boahtteáiggi ja doaivvu. Rohkosbottus oažžut mii bidjat eallima Ipmila ovdii, su háldui, ja mii oažžut vuostáiváldit eallima attáldahkan Ipmilis, ja dovdat dorvvolašvuođa go min eallin geahččaluvvo.

Bildebanner med teksten "Sámi vahku biibballohkamat" og "fem dager"

GINTTALMEASSU

Vuosttaš beaivi

Jaskatvuohta ja rohkadallan

Oza vuos jaskatvuođa, stuolus dahje seaŋggas, olgun dahje viesus. Go ráhkkanat rohkosboddui, de rohkadala Bassi Vuoigŋa rabášii Ipmila sáni dutnje. Sáhtát rohkadallat Jesus-rohkadusa:

Hearrá Jesus Kristus, Ipmila Bárdni, árpmit mu, suttolačča.

Biibballohkan

Loga dasto Ginttalmeassu teavstta, mii lea Luk 2,22-40.

mu čalmmit leat oaidnán du bestojumi ... čuovgga mas lea almmustus báhkiniidda ja hearvásvuohta du álbmogii Israelii.”

Loga Biibbalis

Lukas 2,22-40

Les i nettbibelen.

22Ja go sudno buhtástusbeaivvit Mosesa lága mielde ledje dievvan, de soai manaiga Jerusalemii, vai beassaba buktit máná Hearrá ovdii. 23Dasgo Hearrá lágas lea čállojuvvon ahte juohke vuosttašriegádeaddji bárdnemánná galgá vihahuvvot Hearrái. 24Soai galggaiga maiddái buktit oaffara maid Hearrá láhka gohčču, guokte turtelduvvá dahje guokte duvváčivgga. 25Jerusalemis lei vuoiggalaš ja ipmilbalolaš olmmái gean namma lei Simeon. Son vurddii Israela jeđđehusa, ja Bassi Vuoigŋa lei su badjelis. 26Bassi Vuoigŋa lei almmuhan sutnje ahte son ii muosát jápmima ovdal go lea oaidnán su gean Hearrá lea vuoidan. 27Vuoigŋa doalvvui Simeona tempelii, ja go Jesusa vánhenguovttos buvttiiga dohko máná vai beassaba dahkat suinna maid lága mielde galggai dahkat, 28de son válddii máná sallii, máinnui Ipmila ja celkkii: 29“Hearrá, dál don divttát iežat bálvaleaddji vuolgit ráfis, nugo leat lohpidan. 30Dasgo mu čalmmit leat oaidnán du bestojumi 31maid don leat ráhkadan buot álbmogiidda, 32čuovgga mas lea almmustus báhkiniidda ja hearvásvuohta du álbmogii Israelii.” 33Jesusa áhčči ja eadni ovddošeigga dan mii daddjojuvvui su birra. 34Simeon buressivdnidii sin ja dajai su eadnái, Mariai: “Dát mánná lea biddjojuvvon jorralussan ja čuoččáldahttojupmin eatnagiidda Israelis ja mearkan mii vuostálastojuvvo, 35ja velá du iežat sielu čađa manná miehkki. Nu bohtet albma eatnagiid siskkimus jurdagat.” 36Das lei maiddái profehtanisson Hanna, Fanuela nieida Ašera čearddas. Son lei hui boaris. Nuorran son lei leamaš náitosis čieža jagi, 37muhto lei de eallán leaskan ja lei dál gávcciloginjealjejahkásaš. Son ii goassege vuolgán tempelis, muhto bálvalii Ipmila ijatbeaivái fástudemiin ja rohkadallamiin. 38Aiddo dalle son bođii dasa, ja son máinnui Ipmila ja sártnui máná birra buohkaide geat vurde Jerusalema lonástusa. 39Go soai leigga dahkan buot maid Hearrá láhka mearridii, de soai máhcaiga Galileai iežaska ruovttugávpogii Nasaretii. 40Bárdni stuorui, gievrrui ja devdojuvvui viissisvuođain, ja Ipmila árbmu lei suinna.

Jurddašaddan ja teavstta guorahallan

Dasto jurddaš ja guorahala teavstta.

1 Mos 17.10 ja 3 Mos 12 leat otná teavstta duogážin. Doppe lea čállojuvvon: Buot din olbmábealli galgá birračuhppojuvvot gávccibeaivásažžan buolvvas bulvii, ja ahte riegádeami maŋŋil nisson ii oaččo boahtit bassibáikái ovdal go su buhtástusáigi lea nohkan.

Go Josef-guovttos Mariain joavddaiga tempelii Jesus-mánáin, de deaivvadedje Annain ja Simoniin.

Ja Simon celkkii ahte mu čalmmit leat oaidnán du bestojumi ... čuovgga... Das boahtá Ginttalbeaivvi namahus – nu go ginttal čuvge viesu, nu lea unna bártnáš máilmmi Beasti, guhte čuovgá máilmmis. Dat lea maiddái ođđa biibbaljorgalusa ulbmil, maid mii muitit dan sámi vahku biibballohkamiin.

Teavstta ulbmil lea oahpahit min kristtalaččaid 1) Ahte Ipmil lea muitán Anna ja Simona 2) Ahte mii maiddái oažžut oaidnit Hearrá bestojumi Jesusis ja 3) Ahte mii gis oažžut rámidit ja máidnut Hearrá.

Soaittát háliideame lohkat eará teavsttaid, mat bajásčuvgeše oaiveteavstta ulbmila. Dákkár teavsttat leat ee.

1 Sam 1,21-28: mun doalvvun su Hearrá muođuid ovdii, ja doppe son oažžu orrut oppa eallinagis.

1 Joh 1,1-4: Eallin almmustuvai, ja dan mii leat oaidnán ja dan mii duođaštit. Mii sárdnidit didjiide agálaš eallima, mii lei Áhči luhtte ja almmustuvai midjiide.

Eará teavsttat leat

21Go Elkana fas lei vuolgimin oppa bearrašiinnis Šiloi oaffaruššat Hearrái jahkásaš oaffara ja iežas lohpádusoaffara, 22de Hanna ii dáhttonge vuolgit fárrui, muhto dajai boadnjásis: “Go mun lean botkehan bártnáža, de mun doalvvun su Hearrá muođuid ovdii, ja doppe son oažžu orrut oppa eallinagis.” 23Elkana vástidii sutnje: “Daga maid anát buoremussan. Oro ruovttus dassážii go leat botkehan bártnáža. Vare Hearrá divttášii šaddat nu go don dajat.”Hanna orui ruovttus ja njamahii bártnis dassážii go botkehii su. 24Go son lei botkehan bártnis, de son vulggii Elkanain doalvut su Hearrá vissui Šiloi, ja sudnos lei fárus golmmajahkásaš vuoksá, efa veardde jáffut ja viidneseahkka. Áhčči oaffarušai njuovvanoaffara Hearrái, nugo son lávii dahkat juohke jagi, 25ja njuovai vuovssá. Hanna, bártni eadni, doalvvui bártni Eli lusa 26ja dajai: “Gula mu, hearrá! Nu duohta go don ealát, hearrá, de mun lean dat nisson gii čužžon dás du luhtte rohkadallamin Hearrá. 27Dán bártni mun ánuhin, ja Hearrá lea addán munnje maid mun bivden sus. 28Dál mun attán su ruoktot Hearrái. Son gullá Hearrái nu guhká go eallá.”De sii rohkadalle doppe Hearrá.

Les i nettbibelen

1Dat mii lea leamaš álggu rájes, maid mii leat gullan, maid mii leat oaidnán iežamet čalmmiiguin, maid mii leat geahčadan ja maid min gieđat leat guoskkahan, dat lea min sáhka: eallima sátni. 2Eallin almmustuvai, ja dan mii leat oaidnán ja dan mii duođaštit. Mii sárdnidit didjiide agálaš eallima, mii lei Áhči luhtte ja almmustuvai midjiide. 3Mii sárdnidit didjiide dan maid mii leat oaidnán ja gullan, vai maiddái dis livččii searvevuohta minguin, mii lea searvevuohta Áhčiin ja su Bártniin Jesus Kristusiin. 4Dán mii čállit, vai min illu šaddá ollisin.

Les i nettbibelen

10Dán dii galgabehtet doallat dan lihtus maid mun lean dahkan duinna ja du náliin: Birračuhppet juohke olbmábeali.

Les i nettbibelen

1Hearrá sártnui Mosesii: 2Cealkke israellaččaide: Go nisson lea riegádahttán bártni, de son lea čieža beaivvi buhtismeahttun, seammá láhkái go dalle go sus leat mánodávddat. 3Gávccát beaivvi bárdnemáná ovdaliiki galgá čuhppojuvvot. 4Nisson galgá orrut ruovttus vel golbmalogigolbma beaivvi, vai buhtásmuvvá vardimis. Son ii oaččo guoskat masage mii lea bassi, iige son oaččo boahtit bassibáikái ovdal go su buhtástusáigi lea nohkan. 5Go nisson lea riegádahttán nieidda, de son lea buhtismeahttun guokte vahku, seammá láhkái go dalle go sus leat mánodávddat. Son galgá orrut ruovttus vel guhttalogiguhtta beaivvi buhtismeahttumin vardimis. 6Go su buhtástusáigi bártni dahje nieidda riegádahttima maŋŋil lea nohkan, de son galgá buktit báhppii almmustusgoađi uvssa lusa jahkásaš lábbá boaldinoaffarin ja duvvá dahje turtelduvvá suddooaffarin. 7Báhppa galgá oaffaruššat daid Hearrái ja doaimmahit sutnje soabahusa, ja nu son šaddá buhtisin iežas vardimis. Dát láhka guoská nissonii gii lea riegádahttán máná, jogo bártni dahje nieidda. 8Jos nisson ii suitte oaffaruššat lábbá, de son galgá váldit guokte turtelduvvá dahje guokte eará duvvá, nuppi boaldinoaffarin ja nuppi suddooaffarin, ja báhppa galgá doaimmahit sutnje soabahusa. De nisson lea buhtis.

Les i nettbibelen

Giittosrohkos

Ráhkes Áhčči, Mun giittán du
Go don leat mu lahka
Don leat mu čuovga
Ja mun lean du hálddus. Amen

Buressivdnádus

Hearrá buressivdnidivččii du ja várjalivččii du.
Hearrá čuvgešii muođuidis dutnje ja livččii dutnje árbmugas.
Hearrá jorgalivččii čalmmiidis du ala ja attášii dutnje ráfi.

Sálbmavearsa sáhttá loahpahit du bottu, nu go omd.
Jesus lea min beaivváš, illu. Láibbis ja viinnis lea son min gaskkas.
Ollisvuođastat dál atte, ja min seavdnjatvuođas beastte!
Buot mii mis lea cuvkejuvvon buktit dutnje čippustemiin.
Vare eahkedaččat šaddet bestojupmin, dutnje gudnin.

Sg II no 669

Skjermbilde 2021 01 25 kl 12 42 33