Sámi vahku – Beaivi 2

Lohkat Biibbala ja jurddašit ja guorahallat maid teaksta cealká, dat addá eallima, eallinmovtta ja doaivvu. Nu oskkun dasgo profehta Jeremia dadjá: Mun attán didjiide boahtteáiggi ja doaivvu. Rohkosbottus oažžut mii bidjat eallima Ipmila ovdii, su háldui, ja mii oažžut vuostáiváldit eallima attáldahkan Ipmilis, ja dovdat dorvvolašvuođa go min eallin geahččaluvvo.

Bildebanner med teksten "Sámi vahku biibballohkamat" og "fem dager"

Nubbi beaivi

Jaskatvuohta ja rohkadallan

Oza vuos jaskatvuođa, stuolus dahje seaŋggas, olgun dahje viesus. Go ráhkkanat rohkosboddui, de rohkadala ahte Bassi Vuoigŋa rahpá Ipmila sáni dutnje. Sáhtát rohkadallat Jesus-rohkadusa:

Hearrá Jesus Kristus, Ipmila Bárdni, árpmit mu, suttolačča

Biibballohkan

Loga dasto gaskavahku teavstta, mii lea 5 Mos 18,15-18.

Hearrá, du Ipmil, čuoččáldahttá vieljaidat gaskkas profehta, mu láhkásačča.

Loga Biibbalis

5. Mosesgirji 18,15-18

Les i nettbibelen.

15Hearrá, du Ipmil, čuoččáldahttá vieljaidat gaskkas profehta, mu láhkásačča. Su dii galgabehtet guldalit. 16Dán don dáhttot Hearrás, Ipmilisttát, go dii leiddet čoagganan Horeba vuollái. Don celket: “Mun in nagot šat gullat Hearrá, Ipmilan, jiena, inge šat oaidnit dán stuorra dola, muđui mun jámán.” 17Dalle Hearrá celkkii munnje: “Sii sárdnot duođa. 18Danin mun čuoččáldahtán din vieljaid gaskkas profehta gii lea du láhkásaš. Mun bijan sániidan su njálbmái, ja son sárdnu sidjiide buot maid mun gohčun su sárdnut.

Jurddašaddan ja teavstta guorahallan

De jurddaš ja guorahala teavstta.

Hearrá lea addán midjiide boahtteáiggi ja doaivvu. Su áirasat leat Ipmila sáni mielde dieđihan midjiide Hearrá duohtavuođa. Ja Ipmila sátni (Joh 3) duođašta ahte dat gii doahttala duohtavuođa, boahtá čuovgga lusa, vai boahtá albmosii ahte son dahká dan maid Ipmil dáhttu. Ja Jesus lea vel lohpidan (Joh 8,31č) ahte Jos dii bissubehtet mu sánis, de dii lehpet duođaid mu máhttájeaddjit. Dalle dii dovddiidehpet duohtavuođa, ja duohtavuohta dahká din friddjan.” Dan lohpádusa mielde lea Ipmila dáhttu buressivdnidit min. Korona-áigge leat mii birra máilmmi vásihan váttisvuođaid. Muhto maiddái Hearrá buorrevuođa. Hearrá lea lossa geahččalusáiggi maŋŋil addán dálkasiid ja vaksiinnaid. Nu ahte mii ain sáhttit doaivvuin geahččat ovddasguvlui.

Otná teavstta duogážin soaitá leat 1 Mos 20,7, gos lea čállojuvvon Abrahama birra ahte dat olmmái lea profehta, ja go son rohkadallá du ovddas, de don oaččut eallit.

Muhto ovdal go ohcat duogáža, oažžut mii oaidnit ovdamearkka mii dáhpáhuvai Jesusa áigge. Johannesa evangeliumis lohkat mii mo samarialaš nisson duođaštii Jesusa birra: Hearrá, mun oainnán ahte don leat profehta. (Joh 4,1-26) Ja de Jesus dieđihii sutnje ja biibballohkkiide ahte Son ieš lea dat Messias gii galggai boahtit, go son celkkii “Mun dat lean, mun gii sártnun duinna.” Dat báhkinlaš nisu oaččui oaidnit Hearrá bestojumi.

Soaittát háliideame lohkat eará teavsttaid, mat bajásčuvgeše oaiveteavstta ulbmila. Dákkár teavsttat leat ee.

Matt 17,1eč, ja erenoamážit Joh 1,45, gos Filip duođašta Natanaelii “Mii leat gávdnan su gean birra Mosesa láhka ja profehtaid girjjit duođaštit! Son lea nasaretlaš Jesus, Josefa bárdni.” Ja Joh 6,14, gos lea čállojuvvon Go olbmot oidne mearkka maid Jesus dagai, de sii dadje: “Dát lea duođaid dat profehta gii galggai boahtit máilbmái.”

Eará teavsttat leat

7Atte dál olbmái ruoktot su áhká, danin go dat olmmái lea profehta, ja go son rohkadallá du ovddas, de don oaččut eallit. Muhto jos it atte su ruoktot, de dieđe ahte don šattat jápmit, don ja buot du olbmot.”

Les i nettbibelen

1Go Jesus bođii diehtit ahte farisealaččat ledje gullan ahte son čohkkii eambbo máhttájeddjiid ja gásttašii eanebuid go Johannes – 2vaikko Jesus ieš ii gásttašan, muhto su máhttájeaddjit – 3de son vulggii Judeas ja manai fas Galileai. 4Son fertii vádjolit Samaria čađa. 5Mátkkis Jesus bođii gávpogii man namma lei Sykar. Dan lahka lei eananbihtá maid Jakob lei addán bárdnásis Josefii, 6ja doppe lei Jakoba gáivo. Jesus lei váiban mátkkis ja čohkánii gáivvo gurrii. Lei gaskabeaivi, guđát diimmu lahka. 7De bođii muhtun samarialaš nisson viežžat čázi, ja Jesus celkkii sutnje: “Atte munnje juhkat.” 8Máhttájeaddjit ledje mannan gávpogii oastit borramuša. 9Nisson dajai: “Mo don gii leat juvddálaš, bivddát juhkamuša mus, samarialaš nissonis?” Dasgo juvddálaččat eai guoibmádala samarialaččaiguin. 10Jesus celkkii nissonii: “Jos don dovddašit Ipmila attáldaga ja dieđášit gii dus bivdá juhkamuša, de don ieš bivddášit sus, ja son attášii dutnje ealli čázi.” 11Nisson dajai: “Hearrá, iihan dus leat lihtti, ja gáivo lea čieŋal. Gos don dalle válddát dan ealli čázi? 12It suige don leat stuorit go min áhčči Jakob geas mii leat ožžon dán gáivvo? Son ieš jugai dán gáivvo čázi, ja maiddái su bártnit ja šibihat.” 13Jesus vástidii sutnje: “Gii juhká dán čázi, dat goiká fas. 14Muhto gii juhká dan čázi maid mun attán, dat ii goikka šat goassege. Dat čáhci maid mun attán, šaddá su siste ájan mii álo golgá ja addá agálaš eallima.” 15Nisson dajai: “Hearrá, atte munnje dan čázi, vai mun in goassege šat goikka inge dárbbaš dáppe viežžat čázi.” 16Jesus celkkii sutnje: “Mana viežžat iežat boatnjá.” 17Nisson vástidii: “Ii mus leat boadnjá.” Jesus celkkii: “Don sárdnot duođa go dadjet ahte dus ii leat boadnjá. 18Vihtta boatnjá dus leat leamaš, ja dat gii dus dál lea, ii leat du boadnjá. Das don sárdnot duođa.” 19Nisson dajai: “Hearrá, mun oainnán ahte don leat profehta. 20Min áhčit leat rohkadallan Ipmila dán váris, muhto dii dadjabehtet ahte Jerusalemis lea rievttes báiki rohkadallat.” 21Jesus vástidii: “Jáhke munnje, nisson, áigi boahtá go dii ehpet rohkadala Áhči dán váris ehpetge Jerusalemis. 22Dii rohkadallabehtet dan maid ehpet dovdda, muhto mii rohkadallat dan maid dovdat, danin go bestojupmi boahtá juvddálaččain. 23Muhto áigi boahtá, ja dat lea dál juo, goas duohta rohkadallit rohkadallet Áhči vuoiŋŋas ja duohtavuođas. Dakkár rohkadalliid Áhčči dáhttu. 24Ipmil lea vuoigŋa, ja dat geat rohkadallet su, galget rohkadallat vuoiŋŋas ja duohtavuođas.” 25Nisson dajai: “Mun dieđán ahte Messias boahtá,” – Messias lea seammá go Kristus – “ja go son boahtá, de son almmuha midjiide buot.” 26Jesus celkkii: “Mun dat lean, mun gii sártnun duinna.”

Les i nettbibelen

1Guhtta beaivvi das maŋŋil Jesus válddii fárrosis Petera, Jakoba ja su vielja Johannesa ja doalvvui sin alla várrái, gos sii ledje oktonassii.

Les i nettbibelen

45Filip deaivvai Natanaela ja dajai sutnje: “Mii leat gávdnan su gean birra Mosesa láhka ja profehtaid girjjit duođaštit! Son lea nasaretlaš Jesus, Josefa bárdni.”

Les i nettbibelen

14Go olbmot oidne mearkka maid Jesus dagai, de sii dadje: “Dát lea duođaid dat profehta gii galggai boahtit máilbmái.”

Les i nettbibelen

Giittosrohkos

Ráhkes Áhčči, Mun giittán du
Go don leat mu lahka
Don leat mu čuovga
Ja mun lean du hálddus. Amen

Buressivdnádus

Hearrá buressivdnidivččii du ja várjalivččii du.
Hearrá čuvgešii muođuidis dutnje ja livččii dutnje árbmugas.
Hearrá jorgalivččii čalmmiidis du ala ja attášii dutnje ráfi.

Sálbmavearsa sáhttá loahpahit du bottu, nu go omd.
Čále Jesus iežat gova sihkokeahttá váibmosan,
Amas illu dahje moraš veadjit eret sihkkut du.
Guhte russiinávlejuvvui, lea mu eallin ja mu gudni.

Sg 178

Skjermbilde 2021 01 25 kl 12 42 33