1 Kor 15,1-11
Manne fertet mii čađat gullat evangeliuma go mii juo dovdat dan?
1Vieljažiiddán, mun muittuhan didjiide dan evangeliuma maid mun sárdnidin didjiide, dan maid dii válddiidet vuostá. Das dii maiddái bissubehtet nanusin 2ja dan bokte dii maiddái bestojuvvobehtet, jos doallabehtet das gitta nu go mun dan sárdnidin, muđui dii oskubehtet duššás. 3Ovddimustá mun adden didjiide diehttevassii dan maid ieš ledjen váldán vuostá: Kristus jámii min suttuid dihte, nugo lea čállojuvvon, 4son hávdáduvvui, son čuoččáldahttojuvvui jábmiid luhtte goalmmát beaivvi, nugo lea čállojuvvon, 5ja son almmustuvai Kefasii ja dasto dan guoktenuppelohkásii. 6Das maŋŋil son almmustuvai oktanaga badjel vihttačuođi villjii. Eatnasat sis leat ain eallimin, muhto muhtumat leat oađđán jápmimii. 7Das maŋŋil son almmustuvai Jakobii ja dasto buot apostaliidda. 8Maŋimustá son maiddái almmustuvai munnje, gii lean dego mánná mii lea riegádan ovdal áiggi. 9Munhan lean uhcimus apostaliid gaskkas inge leat dohkálaš gohčoduvvot apostalin, danne go lean doarrádallan Ipmila girku. 10Muhto Ipmila árpmus mun lean dat mii lean, iige son leat čájehan munnje árpmus duššás. Mun lean bargan eambbo go oktage sis, in gal mun ieš, muhto Ipmila árbmu mii lea muinna. 11Ná mii nappo sárdnidit, mun ja maiddái sii, ja ná dii maiddái lehpet oskon.
Maŋŋilgo lea čállán máŋga kapihttala eahkedismállásiid, árpmuattáldagaid ja ipmilbálvalusortnegiid birra, de jorggiha fas Paulus ruovttoluotta bajásčuožžileapmái. Mii sáhttit jearrat ja digaštallat movt risttalažžan sáhttá eallit, muhto oskku vuođđu lea čađat Jesusa jápmin ja bajásčuožžileapmi.
Dát galggašii korintalaččaide vuođđooahppu, muhto Paulus ferte dattege deattuhit vuođu. Jesusa bajásčuožžileapmi leat buot luonddu ja logihka vuostá, juoga mii hástala min jierpmi. Danne jorggiha Paulus fas ruovttoluotta dan ovdui, ja deattuha ahte oskkus ii leat oaivil almmá Jesusa bajásčuožžileami haga. Go jierbmi eahpida, de Paulus čujuha daid oallut čalbmevihtaniidda. Oallugat sis elle ain dalle go reive čállojuvvui. Sii sáhtte nappo duođaštit dahje vuosttildit Jesusa bajásčuožžileami.
Go sidjiide nai geat ledje oaidnán čalbmevihtaniid lei ovtta ládje dárbu muittuhit Jesusa bajásčuožžileami birra, de lea čielggas ahte mii maid dárbbašit jorggihit ruovttoluotta sátnái ruossa birra.