Mii livččii boađusin jus Jesus ii livčče bajásčuožžilan jábmiid luhtte?

1 Kor 15,12-19

1. Korintar 15,12–19

Les i nettbibelen.

12Muhto jos sárdniduvvo ahte Kristus lea čuožžilan jábmiid luhtte, de mo dalle muhtumat dis sáhttet dadjat ahte ii leat mihkkege jábmiid bajásčuožžilemiid? 13Jos ii leat čuožžileapmi jábmiid luhtte, de ii Kristusge leat čuožžilan. 14Muhto jos Kristus ii leat čuožžilan, de min sárdni lea dušši, ja dušši lea maiddái din osku. 15Dalle mii leat duođaštan vearrut Ipmila birra, go leat čuoččuhan ahte son čuoččáldahtii Kristusa – maid son ii leat dahkan, jos juo jábmit eai čuoččáldahttojuvvo. 16Jos jábmit eai čuoččáldahttojuvvo, de dalle ii Kristusge leat čuoččáldahttojuvvon. 17Muhto jos Kristus ii leat čuoččáldahttojuvvon, de dalle din osku lea dušši, ja dii eallibehtet ain suttus. 18Ja dalle datge geat leat jápmán oskkus Kristusii, leat šaddan gáđohussii. 19Jos mii leat bidjan doaivvu Kristusii dušše dán eallima áigái, de mii leat buot olbmuin vártnuhepmosat.

Mii gullat dávjá Jesusa jápmima birra ruossa nalde. Mot son jámii min ovddas ja válddii min suttuid badjelasas. Muhto man dávjá jurddašit mii dan oavddu birra ahte son fas bajásčuožžilii? Jesusa bajásčuožžileapmi lea vuoitu jápmima badjel. Jus ii livčče bajásčuožžileapmi, de ii livčče mis doaivu. Jesusa bajásčuožžileapmi mearkkaša ahte mii, nugo son, galgat bajásčuožžilit jábmiid luhtte ja oažžut agálaš eallima.

Dat sáhttá rievdadit dan makkár vugiin mun ealán dál ja dás. Beaivválaš eallimis vásihit mii bákčasa ja dakkár dovddu ahte ii mastege leat oaivil ja maid buotlágan hástalusaid mat váldet mis eallinmovtta. Lohpádus eallit Jesusiin maŋŋil jápmima addá midjiide fámu go dakkár hástalusaiguin deaividit. Mii leat bajásčuožžilan Jesusiin ja galgat danin beassat suinna deaivvadit muođus muhtui. Dat ii mearkkaš ahte Jesus ii beroš min eallimiin ja min hástalusaiguin dáppe eatnama alde. Muhto ahte mis lea agálaš doaivva vaikko man seavdnjat livččii.