1 Kor 15,35-50
Máid don jurddašat iežat bajásčuožžileami birra?
35Muhtun várra jearrá: “Mo jábmit bajásčuožžilit? Makkár rumaš sis dalle lea?” 36Jallas jearaldat! Dat maid don gilvvát, ii eallá ovdalgo dat vuos jápmá. 37Ja go gilvvát, de it don gilvve dan šattu mii dasto ihtá, muhto dušše gordnečalmmi, jogo nisogordnečalmmi dahje eará šattu siepmana. 38Muhto Ipmil addá dasa dakkár hámi go dáhttu, guđege siepmanii dan hámi mii dasa gullá. 39Ii buot oažži leat oktat oažži; nubbi lea olbmo oažži, nubbi omiid, nubbi lottiid oažži, nubbi fas guliid. 40Ja leat almmálaš rupmašat ja eatnanlaš rupmašat, muhto nubbi lea almmálaš rupmašiid, nubbi fas eatnanlaš rupmašiid hearvásvuohta. 41Nubbi lea beaivváža čuovggas, nubbi mánu čuovggas ja nubbi fas násttiid čuovggas, ja nuppi nástti šearratvuohta lea stuorit go nuppi. 42Nu lea maiddái jábmiid bajásčuožžileapmi. Dat mii gilvojuvvo nohkavažžan, čuožžila nohkameahttumin. 43Dat mii gilvojuvvo árvvoheapmin, čuožžila hearvásin. Dat mii gilvojuvvo headjun, čuožžila fámolažžan. 44Lunddolaš rumaš gilvojuvvo, vuoiŋŋalaš rumaš čuožžila. Jos lea lunddolaš rumaš, de lea maiddái vuoiŋŋalaš rumaš. 45Čállojuvvon lea: Vuosttaš olmmoš, Adam, šattai ealli siellun. Muhto maŋimuš Adam šattai vuoigŋan mii addá eallima. 46Vuoiŋŋalaš ii leat dat mii boahtá vuosttažin, muhto dat mii lea lunddolaš. Das maŋŋil boahtá dat mii lea vuoiŋŋalaš. 47Vuosttaš olmmoš lei eatnanlaš, eatnamis ráhkaduvvon, nubbi olmmoš boahtá almmis. 48Nugo eatnanlaš olmmoš lei, dakkárat leat buot eatnanlaš olbmot. Ja nugo almmálaš olmmoš lea, nu leat buot almmálaš olbmot. 49Ja nugo mii šattaimet eatnanlaš olbmo govvan, nu mii maiddái šaddat almmálaš olbmo govvan. 50Dan mun cealkkán, vieljažiiddán: Oažži ja varra ii árbe Ipmila riikka iige nohkavašvuohta árbe nohkameahttunvuođa.
Velá oktii čállá Paulus oskku ipmirmeahttuma birra, namalassii mot mii galgat fas bajásčuožžilit. Paulus čilge dan konkrehta ovdamearkkain gilvagiin mii čilgetmeahttun vugiin šaddá ja šaddada šattu. Ipmil lea Sivdnideaddji ja Hearrá, son sáhttá dahkat diŋggaid maid mii eat ipmir. Son sivdnidii máilmmi, elliid ja olbmuid duššis. Dalle ii leat váttis ipmirdit ahte son maid sáhttá sivdnidit midjiide oskku ja bajásčuoččáldahttit min jápmimis. Paulus oaidná dan hástalusa maid mun nu bures dovddan – mu vátná oskku ja mu stuora eahpádusa. Danne son jeđđe vearssain 42-43 ahte vaikko dovdo unnán osku, de galgat mii bajásčuoččáldahttojuvvot fámuin, ahte dás lea namalassii Ipmilis sáhka. Govvádus siepmaniin čájeha čielgasit mot jápmin sáhttá šaddat eallin. Suddu min siste ferte jápmit vai mii beassat eallit friddja eallima Jesusiin.