1 Kor 16,1-24
Makkár oktavuohta lea eallimis dáppe eatnama alde ja eallimis almmis?a
1Go čoaggibehtet veahki Jerusalema bassi olbmuide, de dahket nugo mun lean gohččon Galatia searvegottiid dahkat. 2Vahku vuosttaš beaivvi iešguhtege dis galgá vurket ruđa sierra dađi mielde go suitá, vai ruhta ii čoggojuvvo easkka dalle go mun lean boahtán diehko. 3Go mun dasto boađán, de mun vuolggahan olbmuid geaid dii lehpet válljen ja fápmudan, doalvut din attáldaga Jerusalemii. 4Jos orru leamen dárbbašlaš ahte maiddái mun vuolggán, de mii mannat fárrolaga. 5Mun áiggun boahtit din lusa go lean fitnan Makedonias; mun oainnat mátkkoštan Makedonia čađa. 6Muhto mun veaján orrot din lusa muhtun áigái dahje orun velá dálvvige. Dasto dii oažžubehtet ráhkkanahttit mu mátkái, gosa dal vulggežan. 7Mun in dáhto dušše oaidnit din meaddel manadettiinan, muhto sávan beassat orrut din luhtte muhtun áiggi, jos Hearrá suovvá. 8Dáppe Efesosis mun orun hellodagaid rádjái, 9danin go munnje lea rahpasan uksa stuorra ja šattolaš bargui. Vuostálastit leat gal ollu. 10Go Timoteus boahtá, de atnet fuola das ahte son beassá leat oadjebas. Dasgo son doaimmaha Hearrá barggu nugo munge, 11ii oktage oaččo badjelgeahččat su. Veahkehehket su dasto máhccat ráfis. Mun vieljaiguin vuorddán su. 12Viellja Apollosa mun lean ávžžuhan sakka vuolgit din lusa oktan eará vieljaiguin, muhto son ii sáhte vuolgit dál; son boahtá go oažžu vuogas áiggi. 13Gohcet, bissot nanusin oskkus, lehket jálut ja gievrrat! 14Dahket ráhkisvuođas buot maid juo dahkabehtet. 15Vieljažiiddán, mus lea didjiide bivdda: Dego diehtibehtet, de Stefanas ja su bearaš leat min barggu álgošaddu Akaias, ja sii leat addán iežaideaset bálvalit bassi olbmuid. 16Lehket diige vuolibuččat dakkár olbmuide ja buohkaide geat barget ja rahčet oktan singuin. 17Mun lean ilus ahte Stefanas, Fortunatus ja Akaikos leat boahtán deike. Sii leat deavdán din váillaheame 18ja leat arvvosmahttán mu ja maiddái din. Atnet árvvus dakkár olbmáid! 19Asia searvegottit celket didjiide dearvvuođaid. Akvila ja Priska ja searvegoddi mii čoaggana sudno vissui, celket didjiide váimmolaš dearvvuođaid Hearrá nammii. 20Buot vieljat celket dearvvuođaid. Dearvvahallet guhtet guoimmádet bassi cummáin. 21Mun, Paulus, čálán dása dearvvuođaid iežan gieđain. 22Jos muhtun ii ráhkis Hearrá, de son lehkos garuhuvvon. Marana ta! Min Hearrá, boađe! 23Hearrá Jesusa árbmu lehkos dinguin. 24Ráhkis dearvvuođat buot didjiide geat lehpet Kristus Jesusis.
Kapihtal 16 lea hui konkrehtalaš ja duohtavuođa ipmirdahtti. Das lea ovddemustá sáhka guđe ládje olmmoš sáhttá oažžut buori oaffaruššanvuogi. Paulus lea addán konkrehta vuogi maid galget čuovvut. Dat muitala manne lea dárbbašlaš addit, muhto maiddái man váttisin dat sáhttá dovdot. Ruđat addet vejolašvuođaid, muhto sáhttet maid min čatnat. Iežas vuosttas reivves korintalaččaide loahpaha Paulus praktihkalaš ja konkrehtalaš dieđuiguin iežas mátkkis. Son cealká čábbát dearvuođaid ja addá váruhusa.
Go lohken dán, de fuobmájin ahte Paulus čalmmustahttá dan praktihkalaš eallima dáppe eatnama alde maŋŋil go lea deattuhan jápmima ja bajásčuožžileami. Dat deattuha munnje ahte mii galgat eallit duppalvuođas: Eallin dás ja dál ja eallin maŋŋil jápmima. Mii sáhttit vuoiŋŋastit dan bajásčuožžileami doaivvus, muhto mii galget maid eallit iežamet árgabeaivi eallima dáppe eatnama alde. Dat lea mearrideaddji go galgat eallit eallimeamet Ipmila bálvalusas.
