Ukraina flaggRedder Bibelen liv i Ukraina?
Finn ut mer
Gå til forsiden

Paulusa vuosttaš girji korintalaččaide

15

Kristusa bajásčuožžileapmi

1 Vieljažiiddán, mun muittuhan didjiide dan evangeliuma maid mun sárdnidin didjiide, dan maid dii válddiidet vuostá. Das dii maiddái bissubehtet nanusin 2 ja dan bokte dii maiddái bestojuvvobehtet, jos doallabehtet das gitta nu go mun dan sárdnidin, muđui dii oskubehtet duššás. 3 Ovddimustá mun adden didjiide diehttevassii dan maid ieš ledjen váldán vuostá: Kristus jámii min suttuid dihte, nugo lea čállojuvvon, 4  son hávdáduvvui, son čuoččáldahttojuvvui jábmiid luhtte goalmmát beaivvi, nugo lea čállojuvvon, 5 ja son almmustuvai Kefasii ja dasto dan guoktenuppelohkásii. 6 Das maŋŋil son almmustuvai oktanaga badjel vihttačuođi villjii. Eatnasat sis leat ain eallimin, muhto muhtumat leat oađđán jápmimii. 7 Das maŋŋil son almmustuvai Jakobii ja dasto buot apostaliidda. 8 Maŋimustá son maiddái almmustuvai munnje, gii lean dego mánná mii lea riegádan ovdal áiggi. 9 Munhan lean uhcimus apostaliid gaskkas inge leat dohkálaš gohčoduvvot apostalin, danne go lean doarrádallan Ipmila girku. 10 Muhto Ipmila árpmus mun lean dat mii lean, iige son leat čájehan munnje árpmus duššás. Mun lean bargan eambbo go oktage sis, in gal mun ieš, muhto Ipmila árbmu mii lea muinna. 11 Ná mii nappo sárdnidit, mun ja maiddái sii, ja ná dii maiddái lehpet oskon.

Jábmiid bajásčuožžileapmi

12 Muhto jos sárdniduvvo ahte Kristus lea čuožžilan jábmiid luhtte, de mo dalle muhtumat dis sáhttet dadjat ahte ii leat mihkkege jábmiid bajásčuožžilemiid? 13 Jos ii leat čuožžileapmi jábmiid luhtte, de ii Kristusge leat čuožžilan. 14 Muhto jos Kristus ii leat čuožžilan, de min sárdni lea dušši, ja dušši lea maiddái din osku. 15 Dalle mii leat duođaštan vearrut Ipmila birra, go leat čuoččuhan ahte son čuoččáldahtii Kristusa – maid son ii leat dahkan, jos juo jábmit eai čuoččáldahttojuvvo. 16 Jos jábmit eai čuoččáldahttojuvvo, de dalle ii Kristusge leat čuoččáldahttojuvvon. 17 Muhto jos Kristus ii leat čuoččáldahttojuvvon, de dalle din osku lea dušši, ja dii eallibehtet ain suttus. 18 Ja dalle datge geat leat jápmán oskkus Kristusii, leat šaddan gáđohussii. 19 Jos mii leat bidjan doaivvu Kristusii dušše dán eallima áigái, de mii leat buot olbmuin vártnuhepmosat.

20 Muhto dál Kristus lea čuožžilan jábmiid luhtte, vuosttamužžan dain geat leat jápmán. 21 Go jápmin bođii olbmo bokte, de maiddái jábmiid bajásčuožžileapmi boahtá olbmo bokte. 22 Nugo buohkat leat Adama bokte jápmán, nu maiddái buohkat Kristusa bokte dahkkojuvvojit eallin, 23 juohkehaš iežas vuorus: Vuosttamužžan Kristus ja dasto, go Kristus boahtá, dat geat gullet sutnje. 24 De boahtá loahppa, go son addá riikka Ipmilii, Áhččái, das maŋŋil go lea duššadan buot hearrávuođa, válddi ja fámu. 25 Kristus oainnat ráđđe gonagassan dassážii go Ipmil lea vuolidan buot vašálaččaid su julggiid vuollái. 26 Vašálaččain maŋimužžan duššaduvvo jápmin, 27 danin go Ipmil lea vuolidan buot su julggiid vuollái. Go daddjojuvvo ahte buot lea vuoliduvvon su julggiid vuollái, de lea diehttelas ahte dan olggobeallái báhcá Ipmil guhte lea vuolidan buot Kristusa vuollái. 28 Go buot lea biddjojuvvon su vuollái, de dalle son ieš, Bárdni, vuollána dan vuollái gii lea bidjan buot su vuollái, ja nu Ipmil ráđđe ollásit buot.

29 Maid muđui dahket dat geat gásttašahttet iežaset jábmiid ovddas? Jos jábmit eai oppa čuoččáldahttojuvvoge, de manne sii gásttašahttet iežaset daid ovddas? 30 Ja manne munge duojážassii bijan iežan heakkaváddui? 31 Vieljažiiddán, nu duohta go dii lehpet mu rápmi Hearrámet Kristus Jesusa ovddas, de mun jámán juohke beaivvi. 32 Mii ávkkiid munnje lei dáistalit Efesosis beađuiguin, jos mun livččen jurddašan olbmuid láhkái? Jos jábmit eai čuoččáldahttojuvvo, de borrot ja juhkot, ihttinhan mii jápmit. 33 Allet fillehala! “Bahás searvi bilida buriid dábiid.” 34 Gohccájehket viimmat, allet suddut! Dasgo muhtumat eai dovdda Ipmila, dán mun dajan didjiide heahpadin.

Bajásčuožžilan rumaš

35 Muhtun várra jearrá: “Mo jábmit bajásčuožžilit? Makkár rumaš sis dalle lea?” 36 Jallas jearaldat! Dat maid don gilvvát, ii eallá ovdalgo dat vuos jápmá. 37 Ja go gilvvát, de it don gilvve dan šattu mii dasto ihtá, muhto dušše gordnečalmmi, jogo nisogordnečalmmi dahje eará šattu siepmana. 38 Muhto Ipmil addá dasa dakkár hámi go dáhttu, guđege siepmanii dan hámi mii dasa gullá. 39 Ii buot oažži leat oktat oažži; nubbi lea olbmo oažži, nubbi omiid, nubbi lottiid oažži, nubbi fas guliid. 40 Ja leat almmálaš rupmašat ja eatnanlaš rupmašat, muhto nubbi lea almmálaš rupmašiid, nubbi fas eatnanlaš rupmašiid hearvásvuohta. 41 Nubbi lea beaivváža čuovggas, nubbi mánu čuovggas ja nubbi fas násttiid čuovggas, ja nuppi nástti šearratvuohta lea stuorit go nuppi.

42 Nu lea maiddái jábmiid bajásčuožžileapmi. Dat mii gilvojuvvo nohkavažžan, čuožžila nohkameahttumin. 43 Dat mii gilvojuvvo árvvoheapmin, čuožžila hearvásin. Dat mii gilvojuvvo headjun, čuožžila fámolažžan. 44 Lunddolaš rumaš gilvojuvvo, vuoiŋŋalaš rumaš čuožžila. Jos lea lunddolaš rumaš, de lea maiddái vuoiŋŋalaš rumaš. 45 Čállojuvvon lea: Vuosttaš olmmoš, Adam, šattai ealli siellun. Muhto maŋimuš Adam šattai vuoigŋan mii addá eallima. 46 Vuoiŋŋalaš ii leat dat mii boahtá vuosttažin, muhto dat mii lea lunddolaš. Das maŋŋil boahtá dat mii lea vuoiŋŋalaš. 47 Vuosttaš olmmoš lei eatnanlaš, eatnamis ráhkaduvvon, nubbi olmmoš boahtá almmis. 48 Nugo eatnanlaš olmmoš lei, dakkárat leat buot eatnanlaš olbmot. Ja nugo almmálaš olmmoš lea, nu leat buot almmálaš olbmot. 49 Ja nugo mii šattaimet eatnanlaš olbmo govvan, nu mii maiddái šaddat almmálaš olbmo govvan.

50 Dan mun cealkkán, vieljažiiddán: Oažži ja varra ii árbe Ipmila riikka iige nohkavašvuohta árbe nohkameahttunvuođa. 51 Dál mun muitalan didjiide čiegusvuođa: Eat mii buohkat oađđá jápmimii, muhto mii buohkat nuppástuvvat, 52 fáhkkestaga, čalbmeravkalanbottus, go maŋimuš básona jietna čuodjá. Dasgo báson čuodjá, jábmit bajásčuožžilit nohkameahttunvuođas ja mii nuppástuvvat. 53 Dat nohkavaš ferte gárvodit nohkameahttunvuođa ja dat jámolaš ferte gárvodit jápmemeahttunvuođa. 54 Ja go dat nohkavaš lea gárvodan nohkameahttunvuođa ja dat jámolaš lea gárvodan jápmemeahttunvuođa, dalle ollašuvvá dat sátni mii lea čállojuvvon: Jápmin lea njillojuvvon ja vuoitu vuitojuvvon. 55 Jápmin, gos lea du vuoitu? Jápmin, gos lea du seahčagas? 56 Jápmima seahčagas lea suddu, ja suttu fápmu lea láhka. 57 Muhto giittus lehkos Ipmilii gii addá midjiide vuoittu Hearrámet Jesus Kristusa bokte! 58 Danin, ráhkis vieljažiiddán, lehket gievrrat ja lihkatmeahttumat, ja dahket álo Hearrá barggu áŋgirvuođain. Dihtet ahte Hearrá ii divtte din barggu mannat duššás.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.