Ukraina flaggRedder Bibelen liv i Ukraina?
Finn ut mer
Gå til forsiden

Johannesa vuosttaš girji

2 

1 Mánážiiddán, mun čálán didjiide amadet suddudit. Muhto jos muhtun sudduda, de mis lea Áhči luhtte bealušteaddji, Jesus Kristus, gii lea vanhurskkis. 2 Son lea dat oaffar mii soabaha min suttuid, ii dattetge dušše min, muhto oppa máilmmi.

Ođđa báhkkon

3 Das mii ipmirdit ahte leat oahppan dovdat su, go mii doallat su báhkkomiid. 4 Gii dadjá ahte dovdá su iige dattetge doala su báhkkomiid, dat lea gielástalli, iige duohtavuohta leat su siste. 5 Muhto su siste gii doallá su sáni lea Ipmila ráhkisvuohta duođaid šaddan ollisin. Das mii diehtit ahte mii leat su siste. 6 Dat gii dadjá ahte bissu su siste, lea ieš geatnegas eallit nu mo son elii.

7 Ráhkkásiiddán, dat maid mun čálán didjiide ii leat ođđa báhkkon, muhto boares báhkkon mii dis lea leamaš juo álggu rájes. Dát boares báhkkon lea dat sátni maid dii lehpet gullan. 8 Dattetge lea dat maid mun čálán didjiide ođđa báhkkon; dan čájeha sihke su ja din eallin. Dasgo seavdnjadas gáidá ja duohta čuovga juo báitá. 9 Dat gii dadjá ahte lea čuovgasis, muhto vašuha vieljas, lea ain seavdnjadasas. 10 Dat gii ráhkista vieljas, bissu čuovgasis iige su siste leat mihkkege mii jorralahtášii. 11 Muhto dat gii vašuha vieljas, lea seavdnjadasas. Son vádjola seavdnjadasas iige dieđe gosa manná, dainna go seavdnjadas lea čuovggahuhttán su čalmmiid.

Allet ráhkis máilmmi

12 Mun čálán didjiide, mánážiiddán: Din suttut leat ándagassii addojuvvon su nama dihte.

13 Mun čálán didjiide, áhčit: Dii dovdabehtet su gii lea leamaš álggu rájes.

Mun čálán didjiide, nuorat: Dii lehpet vuoitán Bahá.

14 Mun čálán didjiide, mánážiiddán: Dii lehpet oahppan dovdat Áhči.

Áhčit, mun čálán didjiide: Dii lehpet oahppan dovdat su gii lea leamaš álggu rájes.

Nuorat, mun čálán didjiide: Dii lehpet gievrrat, Ipmila sátni bissu din siste, ja dii lehpet vuoitán Bahá.

15 Allet ráhkis máilmmi alletge dan mii lea máilmmis. Jos muhtin ráhkista máilmmi, de Áhči ráhkisvuohta ii leat su siste. 16 Dasgo dat mii lea máilmmis, dat masa oažži anistuvvá, masa čalmmit anistuvvet ja goargadis eallin, ii boađe Áhčis muhto máilmmis. 17 Ja máilbmi duššá anistumiinis, muhto dat gii dahká Ipmila dáhtu, bissu agálaččat.

Antikristus

18 Mánážiiddán, dál lea maŋimuš áigi. Dii lehpet gullan ahte Antikristus lea boahtimin, ja ollu antikristusat leatge juo boahtán. Das mii diehtit ahte lea maŋimuš áigi. 19 Min searvvis sii leat boahtán, muhto sii eai lean min olbmot. Jos sii livčče leamaš min olbmot, de sii livčče bisson min searvvis. Muhto nu fertii boahtit albmosii ahte ii oktage sis lean min olmmoš. 20 Muhto dat gii lea Bassi lea vuoidan din, ja dii buohkat dovdabehtet duohtavuođa. 21 In mun čále danne go dii ehpet dovdda duohtavuođa, muhto danne go dii dan dovdabehtet ja diehtibehtet ahte duohtavuođas ii boađe mihkkege giellásiid.

22 Gii dalle lea gielástalli jos ii dat gii biehttala ahte Jesus lea Kristus? Dat olmmoš lea antikristus gii biehttala Áhči ja Bártni. 23 Das gii biehttala Bártni ii leat Áhččige, muhto das gii dovddasta Bártni lea maiddái Áhčči. 24 Diktet dan maid lehpet gullan álggu rájes, bissut din siste. Jos dat maid dii lehpet gullan álggu rájes, bissu din siste, de maiddái dii bissubehtet Bártni ja Áhči siste. 25 Ja dán son ieš lea lohpidan midjiide: agálaš eallima.

26 Dán mun čálán didjiide daid birra geat dáhttot din čádjidahttit. 27 Muhto din siste bissu dat vuoiddadus maid lehpet ožžon sus, ehpetge dii dárbbaš guđege oahpahusa. Su vuoiddadus oahpaha didjiide buot – dat sárdnu duođa iige giellása. Dahket nugo dat lea din oahpahan: Bissot su siste.

Ipmila mánát

28 Mánážiiddán, bissot su siste, vai mii sáhttit leat roahkkadat go son almmustuvvá eatge dárbbaš gáidat heahpanemiin go son boahtá. 29 Go dii diehtibehtet ahte son lea vanhurskkis, de dii maiddái áddebehtet ahte juohkehaš gii eallá vanhurskásit, lea riegádan Ipmilis.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.