Stor bibelmangel i Venezuela
Gi sammenEn Bibel koster 49 kroner
Gå til forsiden

Johannesa vuosttaš girji

5

Osku vuoitá máilmmi

1 Juohkehaš gii osku ahte Jesus lea Kristus, lea riegádan Ipmilis, ja juohkehaš gii ráhkista áhči, ráhkista maiddái su máná. 2 Das mii diehtit ahte ráhkistit Ipmila mánáid, go mii ráhkistit Ipmila ja doallat su báhkkomiid. 3 Ipmila ráhkisteapmi lea dat ahte mii doallat su báhkkomiid, ja su báhkkomat eai leat lossadat. 4 Buot mii lea riegádan Ipmilis, vuoitá máilmmi. Ja dát lea dat vuoitu mii lea vuoitán máilmmi: min osku. 5 Gii dalle vuoitá máilmmi, juos ii dat gii osku ahte Jesus lea Ipmila Bárdni?

Duođaštus Bártni birra

6 Son, Jesus Kristus, lea boahtán čázi ja vara bokte – ii aivvefal čázi, muhto čázi ja vara. Ja Vuoigŋa lea duođašteaddji, dainna go Vuoigŋa lea duohtavuohta. 7 Golbma leat mat duođaštit: 8 Vuoigŋa, čáhci ja varra, ja dan golmma duođaštus lea oktasaš. 9 Miihan dohkkehit olbmuid duođaštusa, muhto Ipmila duođaštus lea ollu stuorit, danin go dát lea Ipmila duođaštus: Son lea duođaštan iežas Bártni birra. 10 Das gii osku Ipmila Bárdnái, lea duođaštus iežas siste. Dat gii ii oskko Ipmilii, dahká su gielástallin, go son ii leat oskon Ipmila duođaštussii su iežas Bártni birra. 11 Ja dát lea dat duođaštus: Ipmil lea addán midjiide agálaš eallima, ja dat eallin lea su Bártni siste. 12 Geas lea Bárdni, das lea eallin, muhto geas ii leat Ipmila Bárdni, das ii leat eallin.

Rohkadus ja ovddasrohkadus

13 Dán mun lean čállán didjiide geat oskubehtet Ipmila Bárdnái, vai diehtibehtet ahte dis lea agálaš eallin. 14 Ja mii oažžut roahkkadit lahkanit Ipmilii ja oskut ahte son gullá min, jos mii átnut juoidá su dáhtu mielde. 15 Ja go mii diehtit ahte son gullá buot min átnumušaid, de mii maiddái diehtit ahte mii oažžut dan maid mii sus átnut.

16 Jos muhtun oaidná vieljas dahkamin suttu mii ii doalvvo jápmimii, de son galgá rohkadallat ja nu addit sutnje eallima; mun oaivvildan daid geaid suddu ii doalvvo jápmimii. Leat maiddái suttut mat dolvot jápmimii, muhto dakkár suttuid dihte mun in ávžžo din rohkadallat. 17 Buot vearrivuohta lea suddu, muhto lea maiddái suddu mii ii doalvvo jápmimii.

Jesus Kristus, agálaš eallin

18 Mii diehtit ahte ii oktage gii lea riegádan Ipmilis, suddut. Son gii lea riegádan Ipmilis, várjala sis juohkehačča, vai Bahá ii guoskka sidjiide. 19 Mii diehtit ahte mii leat Ipmila olbmot, muhto oppa máilbmi orru Bahá válddis.

20 Mii maiddái diehtit ahte Ipmila Bárdni lea boahtán ja addán midjiide jierpmi dovdat su guhte lea Duohta. Dan Duođa siste mii eallit go leat su Bártni Jesus Kristusa siste. Son lea duohta Ipmil ja agálaš eallin. 21 Mánážiiddán, váruhehket eahpeipmiliin!

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.