Ukraina flaggRedder Bibelen liv i Ukraina?
Finn ut mer
Gå til forsiden

Paulusa vuosttaš girji Timoteusii

4

Čádjidahtti oahpat

1 Bassi Vuoigŋa cealká čielgasit ahte maŋimuš áiggiid muhtumat hilgot oskku, čuovvulit čádjidahtti vuoiŋŋaid ja gullagohtet bahás vuoiŋŋaid oahpahusaid. 2 Sii luhttet guoktilaš gielástalliide geaid oamedovddus lea boaldinmearka. 3 Sii gildet olbmuid náitaleames ja borramis biepmuid maid Ipmil lea sivdnidan dan várás ahte dat geat oskot ja leat dovddiidan duohtavuođa, daid borret ja giitet Ipmila. 4 Buot maid Ipmil lea sivdnidan, lea buorre, iige das dárbbaš hilgut maidege, go dat váldojuvvo vuostá giitalusain. 5 Ipmila sátni ja rohkadus basuhit dan.

Rávvagat Timoteusii

6 Go don oahpahat vieljaid dáinna lágiin, de leat Kristus Jesusa buorre bálvaleaddji ja maiddái ieš áhpásmuvat oskku sánis ja buori oahpahusas maid leat čuvvon. 7 Hilggo ipmilmeahttun cukcasiid ja joavdelas solžžaid. Hárjet iežat ipmilballui. 8 Rumašlaš hárjehallamis lea dušše uhccán ávki, muhto ipmilballu lea ávkkálaš juohke dáfus, ja das lea eallima lohpádus sihke dálá áigái ja dasa mii boahtá. 9 Dát sátni lea luohtehahtti ja juohke dáfus dohkálaš váldojuvvot vuostá. 10 Dan dihtehan mii rahčat ja gilvvohallat go leat bidjan doaivvu ealli Ipmilii guhte lea buot olbmuid beasti, erenoamážit daid geat oskot.

11 Neavvo ja oahpat dáinna lágiin. 12 Ale divtte ovttage badjelgeahččat du iežat nuorravuođa geažil. Leage oskkolaččaide ovdamearkan sárdnumis ja vádjolusas, ráhkisvuođas, oskkus ja buhtisvuođas. 13 Loga searvegoddái bassi čállagiid, rávve ja oahpat gitta dassážii go mun boađán. 14 Ale vajáldahte dan árpmuattáldaga mii dus lea ja mii addojuvvui dutnje profehtalaš sániid bokte, go vuorrasat bidje gieđaid du ala. 15 Váldde vuhtii dan, biso das, vai buohkat oidnet du ovdáneami.

16 Gozit iežat ja iežat oahpahusa. Biso dan siste! Dasgo go don dan dagat, de beasttát sihke iežat ja sin geat gullet du.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.