Ukraina flaggRedder Bibelen liv i Ukraina?
Finn ut mer
Gå til forsiden

Paulusa vuosttaš girji Timoteusii

5

Leaskanissonat, boarrásat ja šlávat

1 Ale bealkkit boares olbmá, muhto rávve su dego iežat áhči, nuorra olbmáid dego iežat vieljaid, 2 boares nissoniid dego iežat eatni, nuorra nissoniid dego iežat oappáid, buot buhtisvuođas.

3 Gudnejahte ja doarjjo leaskanissoniid geain duođaid ii leat fuolaheaddji. 4 Muhto jos guđege leaskanissonis leat mánát dahje áhkkubat, de sii galget vuos oahppat deavdit geatnegasvuođaset iežaset bearrašii ja buhttet vánhemiiddiset váivviid, danne go dat lea dohkálaš Ipmilii.

5 Leaskanisson gii lea báhcán áibbas okto, bidjá doaivvu Ipmilii ja rohkadallá ja čuorvu Ipmila heaittekeahttá ija beaivvi. 6 Muhto dat gii dáhttu eallit badjelmearálašvuođas, lea eallinaga jápmán. 7 Muittut dies leaskkaid, vai sii ellet láitemeahttumit. 8 Jos muhtun ii ane fuola iežas fulkkiin ja erenoamážit iežas bearašlahtuin, son lea biehttalan oskku ja lea vearrát go eahpeoskkolaš.

9 Leaskkaid logahallamii dohkke dušše nisson gii lea deavdán guhttalogi jagi ja gii lea leamaš dušše ovtta boatnjá áhkká. 10 Son ferte leat dovddus iežas buriin daguin, das ahte lea dikšon mánáid, leamaš árvvas, bassan bassi olbmuid julggiid, veahkehan heađálaččaid ja áŋgiruššan dahkat buotlágán buriid. 11 Muhto nuorra leaskkaid ale váldde logahallamii. Go sin anistumit buollájit, de sii gáidet Kristusis ja dáhttot náitalit. 12 Sii šaddet dubmejuvvot, danin go sii leat rihkkon vuosttaš oskkáldasvuođalohpádusaset. 13 Dasa lassin sii hárjánit joavdelastit ja viehkat viessogaskkaid, eaige dušše dan, muhto maiddái solžat, seahkánit áššiide mat eai sidjiide gula ja hállat heivemeahttumiid. 14 Dan dihte mun dáhtun ahte nuorra leaskkat náitalit, riegádahttet mánáid ja dikšot ruovttuset, vai eai atte min vuostálastiide maidge sálvvaid bilkidit. 15 Muhtumat leat juo jorgalan čuovvut Sáhtána. 16 Jos muhtun oskkolaš nissonis leat ruovttustis leaskkat, de son galgá atnit sis fuola iige bidjat sin searvegotti noađđin, vai searvegoddi nagoda atnit fuola dain leaskkain geat leat báhcán okto.

Searvegotti vuorrasat

17 Vuorrasat geat jođihit searvegotti bures, ánssášit guovttegeardásaš gudni, erenoamážit dat geat sárdnidit ja oahpahit. 18 Čálahan cealká: Ale čana vuovssá njálmmi go dat lea luvvemin gortni ja: Bargi lea ánssášan iežas bálkká. 19 Ale váldde vuhtii váidalusaid searvegottivuorrasa vuostá muđui go leat guokte dahje golbma duođašteaddji. 20 Cuiggot buohkaid gullut daid geat suddudit, vai maiddái earrásat ballet. 21 Ipmila, Kristus Jesusa ja válljejuvvon eŋgeliid ovddas mun ávžžun du álo heivehit dáid rávvagiid bealátkeahttájit ja almma geahčakeahttá olbmuid hápmái. 22 Ale menddo geargadit bija gieđaid geange ala amat šaddat oasálažžan eará olbmuid suttuide. Ane iežat buhtisin.

23 Ale šat juga dušše čázi, muhto návddaš veahá viinni čoavjját ja dávjjes buozalvasaidat dihte.

24 Muhtun olbmuid suttut leat albmosat ja ožžot duomu ovdal, earrásiid suttut easkka maŋŋil. 25 Seammá láhkái buorit dagutge leat albmosat, ja dat mat eai leat buorit, eai sáhte čihkkojuvvot.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.