Ukraina flaggRedder Bibelen liv i Ukraina?
Finn ut mer
Gå til forsiden

Nubbi Muitalusaid girji

27

Jotam Juda gonagassan

1 Jotam lei guoktelogiviđajahkásaš go šattai gonagassan, ja son ráđđii Jerusalemis guoktenuppelohkái jagi. Su eadni lei Jeruša, Sadoka nieida. 2 Jotam dagai dan mii lea riekta Hearrá čalmmiin, aiddo nugo su áhčči Ussia lei dahkan, muhto son ii bahkken áhčis láhkái Hearrá tempelii oaffaruššat. Álbmot goit meannudii ain boasttoláhkái. 3 Jotam huksii Hearrá tempela Bajit poartta ja nannii Ofela muvrra. 4 Son huksii gávpogiid Juda várreeatnamii, ja vuovdeguovlluide son huksii ladniid ja toartnaid. 5 Son soađai ammonlaččaid gonagasain ja vuittii su, ja ammonlaččat šadde dan jagi máksit sutnje čuođi taleantta silbba, logiduhát kora nisu ja logiduhát kora bivggi. Seammá ollu ammonlaččat mákse sutnje maiddái nuppi ja goalmmát jagi. 6 Jotam šattai fámolaš stivrejeaddjin, danne go son álo vádjolii Hearrá, Ipmilis, geainnu.

7 Mii muđui lea muitalit Jotamis, buot su sođiin ja eará doaimmain, lea čállojuvvon Israela ja Juda gonagasaid girjái. 8 Son lei guoktelogiviđajahkásaš go šattai gonagassan, ja son ráđđii Jerusalemis guhttanuppelohkái jagi. 9 Jotam manai vuoiŋŋadit áhčiidis lusa, ja son hávdáduvvui Davida gávpogii. Su maŋŋil gonagassan šattai su bárdni Ahas.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.