Stor bibelmangel i Venezuela
Gi sammenEn Bibel koster 49 kroner
Gå til forsiden

Petera nubbi girji

2

Vearreoahpaheaddjit ja sin duopmu

1 Israela álbmoga gaskkas ledje maiddái vearreprofehtat, ja seammá láhkái din gaskiige bohtet vearreoahpaheaddjit. Sii njágahit din gaskii duššadeaddji vearreoahpaid. Sii biehttalit dan Hearrá guhte lea sin lonistan, ja fargga sii dagahit alcceseaset heavu. 2 Olusat čuovvulit sin nuoskivuođa, ja duohtavuođa geaidnu šaddá sin dihte bilkiduvvot. 3 Vuovdáivuođasteaset sii vigget atnit din ávkin hutkkálaš cukcasiiguin. Muhto sin dološ duopmu lea ain fámus, sin heavvu lea sin vuordimin.

4 Ipmil ii seastán eŋgeliid geat ledje suddudan, muhto bálkestii sin láhkkiin sevdnjes čiekŋalassii vuordit ahte sin duopmu ollašuvvá. 5 Iige son seastán dološ máilmmi, muhto buvttii stuorra dulvvi ipmilmeahttun olbmuid badjelii. Son goittot várjalii Noa, vanhurskkisvuođa sárdnideaddji, ja čieža earrása. 6 Ipmil dubmii Sodoma ja Gomorra nu ahte bolddii daid gutnan ja dagai daid ovdamearkan maŋit áiggiid ipmilmeahttumiidda, 7 muhto gájui vanhurskkis Lota gean ipmilmeahttun olbmuid nuoskkes eallin váivvidii. 8 Beaivvis beaivái dat vanhurskkis olmmái giksašuvai go šattai eallit sin gaskkas ja geahčadit ja guldalit sin gudnehis meanu.

9 Hearrá diehtá gal gádjut geahččalusas daid geat sus ballet, muhto ipmilmeahttumiid son atná vuorkkás duopmobeaivvi ráŋggáštusa várás, 10 eandalii daid geat doahttalit oačči nuoskkes anistumiid ja atnet duššin Hearrá ráđđenválddi. Sii leat čeavlát ja iešráđálaččat, eai bala bilkideames almmálaš fámuid, 11 vaikko velá eŋgelatge geain lea eambbo fápmu ja givrodat, eai Hearrá ovddas daid hiddjit eaige dubme. 12 Dát olbmot leat dego jierpmehis eallit mat leat riegádan bivdojuvvot ja goddojuvvot. Sii bilkidit dan maid eai dovdda, ja elliid láhkái sii maid duššet 13 ja ožžot vearrivuođasteaset vearrivuođa bálkká. Sin illun lea festet guovdelaš beaivvi, sii leat movttegat beahttit ja guossohit himuideaset go leat doallamin dinguin mállásiid. 14 Himolaš čalmmiiguin sii gehččet nissoniidda eaige goassege gallán suddudemiin. Sii fillejit rašis sieluid ja leat bures hárjánan vuovdáivuhtii. Sii leat garuhuvvon olbmot 15 geat leat spiehkastan njulges geainnus ja čádjidan seammá geidnui go Bileam, Beora bárdni, gii ráhkistii vearrivuođa bálkká, 16 muhto gii cuiggoduvvui rihkkumis dihte: Ásen, gielahis bargošibit, sártnui olbmo jienain ja eastadii profehta jierpmehisvuođa.

17 Dát olbmot leat dego čázehis ádjagat, dego balvvat maid riđđu dolvvoda: Čáhppadeamos seavdnjadas sin vuordá. 18 Sii sárdnot stuorra muhto guoros sániid, ja rupmašeaset himuid fáŋgan sii vigget giktalit lusaset olbmuid geat ledje juo beasadeamen dain geat vádjolit čádjádusas. 19 Sii lohpidit friddjavuođa, muhto ieža sii leat heavahusa šlávat: Gii olbmo lea vuoitán, dan šlávva son lea. 20 Jos sii leat beassan máilmmi nuoskivuođain dalle go ohppe dovdat Hearrámet ja Beastámet Jesus Kristusa, muhto fas diktet iežaset daidda sorrojuvvot ja vuoittáhallat, de sin maŋit dilli lea šaddan bahábun go sin ovddit dilli. 21 Sidjiide livččii leamaš buoret go sii eai livčče oppa dovdange vanhurskkisvuođa geainnu, go ahte vuos dan dovde ja de jorgaledje sealggi bassi báhkkomii maid ledje váldán vuostá. 22 Sidjiide lea geavvan dego sátnevájas dadjá: Beana jorggiha iežas vuovssanasaide, ja “Bassojuvvon spiidni fierada rábáhis”.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.