Ukraina flaggRedder Bibelen liv i Ukraina?
Finn ut mer
Gå til forsiden

Viđát Mosesgirji

18

Báhpaid vuoigatvuođat

1 Levilaš báhpain, oppa Levi čearddas, ii oaččo leat oassi iige opmodat nugo eará israellaččain. Sii galget oažžut eallámuša Hearrá dollaoaffariin ja su opmodagas. 2 Sis ii oaččo leat opmodat vieljaideaset gaskkas. Hearrá lea sin opmodat, nugo son lea lohpidan.

3 Go álbmot oaffaruššá njuovvanoaffara, vuovssá dahje sávzza, de báhpas lea vuoigatvuohta oažžut čoamohasa, olloliid ja dokki. 4 Addet sutnje maid álgošattuid gortnis, viinnis ja oljjus ja maiddái buoremus oasi sávzzaid ulluin, 5 dasgo Hearrá, din Ipmil, lea válljen buot din čearddain levilaččaid ja sin náli doaimmahit bálvalusa Hearrá nammii.

6 Jos levilaš vuolgá muhtun Israela gávpogis gos lea ássan vierisin, de son oažžu boahtit goas dáhttu dan báikái maid Hearrá vállje 7 ja doaimmahit bálvalusa Hearrá, Ipmilis, nammii, nugo buot su levilaš vieljat geat bálvalit doppe Hearrá. 8 Sis buohkain galgá leat oktahat oassi mainna eallit, vaikko sii livččege vuovdán áhčiideaset opmodaga.

Vearreprofehtat ja duohta profehtat

9 Go don boađát dan eatnamii maid Hearrá, du Ipmil, addá dutnje, de don it oaččo oahppat doid álbmogiid fasttes vieruid. 10 Du luhtte ii oaččo leat oktage gii bidjá bártnis dahje nieiddas mannat dola čađa, ii oktage einnosteaddji, mearkačilgejeaddji, diiddastalli iige noaidi, 11 ii oktage gii máne, bivdá neavvaga jábmiid vuoiŋŋain dahje einnostusvuoiŋŋain ja ohcá ráđi jámežiin. 12 Hearrá fasttáša buohkaid geat dahket nu, ja aitto dakkár fasttes vieruid dihte Hearrá, du Ipmil, ádjá álbmogiid eret du ovddas. 13 Don galggat leat láitemeahttun Hearrá, du Ipmila, muođuid ovddas.

14 Dat álbmogat maid don áját eret, guldalit mearkačilgejeddjiid ja einnosteddjiid, muhto Hearrá, du Ipmil, ii leat addán dutnje lobi dahkat dakkáriid. 15 Hearrá, du Ipmil, čuoččáldahttá vieljaidat gaskkas profehta, mu láhkásačča. Su dii galgabehtet guldalit. 16 Dán don dáhttot Hearrás, Ipmilisttát, go dii leiddet čoagganan Horeba vuollái. Don celket: “Mun in nagot šat gullat Hearrá, Ipmilan, jiena, inge šat oaidnit dán stuorra dola, muđui mun jámán.” 17 Dalle Hearrá celkkii munnje: “Sii sárdnot duođa. 18 Danin mun čuoččáldahtán din vieljaid gaskkas profehta gii lea du láhkásaš. Mun bijan sániidan su njálbmái, ja son sárdnu sidjiide buot maid mun gohčun su sárdnut. 19 Muhto jos muhtun ii gula daid sániid maid dat profehta sárdnu mu nammii, de mun gáibidan dan olbmo vástidit. 20 Muhto jos muhtun profehta julggada sárdnut mu nammii juoidá maid mun in leat gohččon su sárdnut, dahje sárdnu eará ipmiliid nammii, de dat profehta galgá jápmit.”

21 Dii veadjibehtet jearrat: “Mas mii diehtit ahte sátni ii boađe Hearrás?” Muitet dán: 22 Jos profehta sárdnu Hearrá nammii, muhto su sátni ii ollašuva iige šatta duohtan, de dat sátni ii boađe Hearrás, muhto lea vearreprofehta čeavlás sárdnun. Allet bala sus.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.