Ukraina flaggRedder Bibelen liv i Ukraina?
Finn ut mer
Gå til forsiden

Vuosttaš Mosesgirji

11

Babela toardna

1 Oppa eatnamis sárdno ovtta giela ja geavahedje seammá sániid. 2 Go olbmot vulge nuorttas, de sii gávdne Sineara eatnamis leagi ja ásse dohko. 3 Sii dadje guhtet guoibmáseaset: “Dahkkot diilageđggiid ja boldot daid garasin.” Sii atne diillaid huksengeađgin ja eananbihka muvremii. 4 Sii dadje guhtet guoibmáseaset: “Huksejehkot alcceseamet gávpoga ja toartna mii ollá albmái. Nu mii dahkat alcceseamet nama, amamet bieđganit miehtá eatnama.”

5 De Hearrá njiejai geahččat gávpoga ja toartna maid olbmot ledje huksemin. 6 Hearrá celkkii: “Sii leat okta álbmot, ja sis buohkain lea oktahat giella. Dát lea dušše álgu. Dál sidjiide ii leat veadjemeahttun mihkkege maid sii áigot dahkat. 7 Njidjot ja moivašuhttot sin giela, vai nubbi ii gula nuppi sárdnuma.” 8 Ja nu Hearrá biđgii sin miehtá eatnama, ja sii heite huksemis gávpoga. 9 Gávpot gohčoduvvui Babelin, dasgo doppe Hearrá moivašuhtii oppa eatnama giela, ja doppe Hearrá biđgii sin miehtá eatnama.

Sema sohkalogahallan

10 Dát lea Sema sohkalogahallan. Sem lei čuođijahkásaš go sutnje riegádii Arpakšad. Dat dáhpáhuvai guokte jagi maŋŋil dulvvi. 11 Sem elii vel vihttačuođi jagi Arpakšada riegádeami maŋŋil, ja sutnje riegádedje bártnit ja nieiddat.

12 Go Arpakšad lei golbmalogiviđajahkásaš, de sutnje riegádii Šelah. 13 Šelaha riegádeami maŋŋil Arpakšad elii vel njeallječuođigolbma jagi, ja sutnje riegádedje bártnit ja nieiddat.

14 Go Šelah lei golbmalogijahkásaš, de sutnje riegádii Eber. 15 Ebera riegádeami maŋŋil Šelah elii vel njeallječuođigolbma jagi, ja sutnje riegádedje bártnit ja nieiddat.

16 Go Eber lei golbmaloginjealjejahkásaš, de sutnje riegádii Peleg. 17 Pelega riegádeami maŋŋil Eber elii vel njeallječuođigolbmalogi jagi, ja sutnje riegádedje bártnit ja nieiddat.

18 Go Peleg lei golbmalogijahkásaš, de sutnje riegádii Reu. 19 Reu riegádeami maŋŋil Peleg elii vel guoktečuođiovcci jagi, ja sutnje riegádedje bártnit ja nieiddat.

20 Go Reu lei golbmalogiguovttejahkásaš, de sutnje riegádii Serug. 21 Seruga riegádeami maŋŋil Reu elii vel guoktečuođičieža jagi, ja sutnje riegádedje bártnit ja nieiddat.

22 Go Serug lei golbmalogijahkásaš, de sutnje riegádii Nahor. 23 Nahora riegádeami maŋŋil Serug elii vel guoktečuođi jagi, ja sutnje riegádedje bártnit ja nieiddat.

24 Go Nahor lei guoktelogiovccijahkásaš, de sutnje riegádii Terah. 25 Teraha riegádeami maŋŋil Nahor elii vel čuođiovccinuppelohkái jagi, ja sutnje riegádedje bártnit ja nieiddat.

26 Go Terah lei čiežalogijahkásaš, de sutnje riegádedje Abram, Nahor ja Haran.

Teraha sohka

27 Dát lea Teraha sohka. Terahii riegádedje Abram, Nahor ja Haran, ja Haranii riegádii Lot. 28 Haran jámii ovdal áhčis Teraha ruovttueatnamii, Ura gávpogii Kaldeas. 29 Abram ja Nahor válddiiga goabbáge áhká. Abrama áhká namma lei Sarai, ja Nahora áhkká lei Milka, Harana nieida. Haran lei Milka ja Jiska áhčči. 30 Sarai lei sahkuheapme, sus eai lean mánát.

31 Terah válddii mielddis bártnis Abrama, Lota, Harana bártni, manjis Saraja, bártnis Abrama áhká, ja vulggii singuin Uras Kaldeas Kanaana eatnamii. Muhto go sii bohte Harranii, de sii ásse dohko. 32 Terah elii guoktečuođivihtta jagi ja jámii Harranii.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.