Ukraina flaggRedder Bibelen liv i Ukraina?
Finn ut mer
Gå til forsiden

Vuosttaš Mosesgirji

9

Ipmil dahká lihtu Noain

1 Ipmil buressivdnidii Noa ja su bártniid ja celkkii sidjiide: “Lehket šattolaččat, eatnánehket ja devdet eatnama! 2 Buot meahcieallit ja almmi lottit, buot eallit mat lihkadit eatnama alde ja buot mearaguolit soiget ja ballet dis; daid mun attán din gihtii. 3 Din biebmun lea buot mii eallá ja lihkada. Buot daid mun attán dál didjiide, seammá láhkái go mun adden didjiide ruonas šattuid. 4 Muhto bierggu mas lea heagga, dat lea varra, dii ehpet oaččo borrat. 5 Ja din iežadet vara mun gáibidan mávssahuvvot. Mun gáibidan dan mávssahuvvot juohke eallis ja juohke olbmos gii golggaha iežas lagamučča vara.

6 Gii golggaha olbmo vara,

su vara galget olbmot golggahit,

dasgo Ipmil dagai olbmo iežas govvan.

7 Lehket šattolaččat ja eatnánehket,

eatnánehket ja levvet

miehtá eatnama.”

8 Ipmil celkkii Noai ja su bártniide: 9 “Mun dagan dál lihtu dinguin ja din náliin 10 ja buot heakkalaččaiguin mat leat dinguin, lottiiguin, omiiguin ja buot fuođđuiguin, buot daiguin mat vulge árkkas, buot eatnama elliiguin. 11 Mun dagan dinguin lihtu: Ii goassege šat dulvi heavat buot heakkalaččaid, dat ii goassege šat duššat eatnama.”

12 Ipmil celkkii vel: “Dát lea dan lihtu mearka maid mun dagan dinguin ja buot heakkalaččaiguin mat leat din luhtte, buot boahttevaš buolvvaid rádjái: 13 Mun bijan dávgán balvvaide, ja dat lea mearkan dan lihtus maid mun lean dahkan eatnamiin. 14 Go mun čohkken balvvaid eatnama badjel ja dávgi oidno balvvain, 15 de mun muitán lihtton dinguin ja buot heakkalaččaiguin: Čázit eai šat goassege šatta dulvin mii heavaha buot heakkalaččaid. 16 Go dávgi oidno balvvain, de mun oainnán dan ja muitán agálaš lihtu maid lean dahkan buot eatnama heakkalaččaiguin.” 17 Ja Ipmil celkkii vel Noai: “Dát lea dan lihtu mearka maid mun dagan buot eatnama heakkalaččaiguin.”

Noa ja su bártnit

18 Noa bártnit, geat vulge árkkas, ledje Sem, Ham ja Jafet. Ham lei Kanaana áhčči. 19 Dát golmmas ledje Noa bártnit, ja buot máilmmi olbmot leat sin nális.

20 Noa lei bealdobargi ja vuosttaš gii gilvvii viidnegárddi. 21 Go son jugai viinni, de son gárihuvai ja veallái goađis álás. 22 Ham, Kanaana áhčči, oinnii áhčis álásin ja manai olggos muitalit dan vieljas guktui. 23 Dalle Sem ja Jafet válddiiga biktasa ja lebbiiga dan olggiideaskka ala, manaiga sisa selggiid ja govččaiga áhčiska álásvuođa. Soai leigga nuppos čalmmiid eabage oaidnán áhčiska álásin. 24 Go Noa čielggai gárrenvuođastis ja gulai maid su nuoramus bárdni lei dahkan sutnje, 25 de son dajai:

“Garuhuvvon lehkos Kanaan,

šaddos son vieljaidis šlávaid šlávvan!”

26 Ja son dajai vel:

“Máidnojuvvon lehkos Hearrá,

Sema Ipmil!

Lehkos Kanaan Sema šlávva.

27 Ipmil addos saji Jafetii

ja diktos su ássat Sema gođiin.

Lehkos Kanaan sudno šlávva.”

28 Noa elii golbmačuođi vihttalogi jagi dulvvi maŋŋil. 29 Noa oppa eallináigi lei ovccičuođi vihttalogi jagi; de son jámii.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.