Ukraina flaggRedder Bibelen liv i Ukraina?
Finn ut mer
Gå til forsiden

Habakkuk

1 

1 Profehtasátni maid profehta Habakkuk

oaččui oainnáhusas.

Profehta váidalus

2 Man guhká šattan mun čuorvut, Hearrá,

itge don gula?

Man guhká mun ferten váidalit veahkaválddi,

itge don beastte?

3 Manne don divttát mu

oaidnit bahávuođa?

Mo don sáhtát geahččat vearrivuhtii?

Mun oainnán aivve billašumi

ja veahkaválddi –

nággu šaddá, bealku čuožžila.

4 Láhka lea fámoheapme,

vuoigatvuohta ii ollašuva.

Ipmilmeahttumat

birastahttet vanhurskása,

ja vuoigatvuohta jorgojuvvo.

Kaldealaččat

5 Gehččet álbmogiidda,

oidnet ja suorganehket!

Dasgo din beivviid mun dagan dagu

maid ehpet jáhkáše

jos dat didjiide muitaluvvošii!

6 Mun rávkkan kaldealaččaid,

garra ja hohppos álbmoga

mii johtá viidát eatnamis

ja váldá oapminis earáid ássansajiid.

7 Sii leat hirbmosat ja suorggatlaččat,

sii mearridit ieža

mii lea vuoigat ja riekta

8 Sin heasttat leat falibut go leopárddat,

johtileappot go meahci gumppet.

Sin riidejeaddjit rindet,

gáidagasas dat bohtet,

dat girddihit nugo goaskin čuoláda sállašii.

9 Kaldealaččat bohtet hearjidit.

Sii fallehit oktan joavkun,

sis leat fáŋggat dego mearas sáttu.

10 Sii hiddjidit gonagasaid,

oaivámuččaid sii atnet bogostahkan.

Sii bilkidit buot ladniid,

čobmejit muoldda ja váldet daid.

11 De sii mannet geidnoseaset

šuva dego biegga ja jávket.

Iežaset fápmu sis lea ipmilin.

Profehta váidala behtolašvuođa

12 Hearrá, don leat dološ áiggi rájes,

mu Ipmil, mu Bassi,

don it jáme goassege!

Hearrá, don leat bidjan

kaldealaččaid dubmet min,

don, min bákti, leat vuolggahan sin

ráŋggáštit min.

13 Du čalmmit leat buhttásat,

don it sáhte geahččat bahái,

it duotto oaidnit vearrivuođa.

Manne don dalle gierddat

behtolaččaid daguid,

manne orut jávohaga,

go ipmilmeahttun njielasta

daid geat leat vuoigadis?

14 Don leat diktán olbmuid

šaddat meara guliid láhkásažžan,

giđđudeaddji veahkan

mas ii leat ráđđejeaddji.


15 Kaldealaččat bivdet

olbmuid vuokkaiguin,

čohkkejit sin nuohttáseaset,

čogget sin firpmiidasaset.

Dan dihte sii illudit ja ávvudit,

16 oaffaruššet fierbmáseaset,

cahkkehit oaffardola bivdosiiddáseaset.

Dathan diktet sin eallit valljivuođas,

addet sidjiide vuoimmálaš borramuša.

17 Bessetgo sii dalle álo gurret nuohtiset,

goddit álbmogiid álelassii

almmá seasttekeahttá?

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.