1 Dadjet dalle vieljaidasadet: “Dii lehpet Ammi, ‘Mu álbmot!’” Dadjet oappáidasadet: “Din namma lea Ruhama, ‘Árpmihuvvon!’”
Israela oskkáldasmeahttunvuohta
2 Mannet etniineattet rievtti ovdii,
áššáskuhttet su,
dasgo son ii leat mu áhkká,
inge mun leat su boadnjá.
Jávkadehkos son
fuorrágeahčastaga ámadajus,
nuoskivuođa čiččiidis gaskkas.
3 Muđui mun nuolahan su
seammá álásin
go son lei dan beaivvi go riegádii,
dagan su ávdin meahci láhkásažžan,
goikkisin dego jakŋa eanan,
guođán su goikat jámas.
4 Su mánáid mun in árpmit,
dasgo sii leat fuorrámánát.
5 Sin eadni lea furrošan,
sin riegádahtti lea meannudan heahpatlaččat.
Son lea dadjan: “Mun dáhtun viehkat
ráhkisteddjiidan maŋŋái.
Sii addet munnje láibbi ja čázi,
ullobiktasiid ja beallemasgárvvuid,
oljju ja viinni.”
6 Dan dihte mun dahpan
su geainnu bastilislánjáiguin,
ceggen su ovdii muvrra,
nu ahte son ii dádjat bálgáidasas.
7 Go son dasto viegaha ráhkisteddjiidis,
de son ii jovssa daid,
son ohcá daid, muhto ii gávnna.
Dalle son dadjá: “Mun máhcan
vuosttaš boadnján lusa,
su luhtte mus lei buoret dilli go dál.”
8 Son ii ipmir ahte mun
adden sutnje gortni, viinni ja oljju.
Mun adden sutnje dan valjis silbba ja golli
maid sii geavahedje Baalii.
9 Dan dihte mun in šat atte
gortniidan go daid áigi boahtá,
in ođđa viidnán go lea dan áigi.
Mun válddán ulluidan ja beallemasaidan
gokčamis su álásvuođa.
10 Mun nuolahan su álás
su ráhkisteddjiid čalmmiid ovddas,
iige oktage sáhte gádjut su mu gieđas.
11 Mun loahpahan buot su ilu,
su ávvudemiid, mánočalbmebeivviid
ja sabbatbeivviid,
buot su basiid.
12 Mun billistan su viidnemuoraid
ja fiikonmuoraid
maid birra son lea dadjan:
“Dat lea máksu maid mu
ráhkisteaddjit leat addán munnje.”
Mun dagan daid rohtun,
ja meahcieallit borret daid.
13 Mun ráŋggáštan su daid beivviid dihte
go son cahkkehii oaffardola Baal-ipmiliidda,
čiŋadii suorbmasiiguin ja viđjjiiguin
ja čuovui ráhkisteddjiidis.
Mu son vajáldahtii,
cealká Hearrá.
Ipmil árpmiha Israela
14 Dan dihte mun geasuhan su,
doalvvun su meahccái
ja sártnun suinna ustitlaččat.
15 Doppe mun lohpidan addit
sutnje fas su viidnegárddiid,
ja Akorleahki šaddá doaivvu poartan.
Doppe son vástida munnje
dego nuorravuođastis,
nugo dalle go son vulggii Egyptas.
16 Dan beaivvi, cealká Hearrá,
son dadjá munnje: “Mu boadnjá!”
itge šat “Mu Baal!”
17 Mun jávkadan Baal-ipmiliid
namaid su njálmmis,
dat eai šat beakke.
18 Dan beaivvi mun dagan
álbmogasan ávkin
lihtu meahci elliiguin, almmi lottiiguin
ja eatnama njoammuiguin,
ja dávggi ja miehki ja soađi
mun jávkadan eatnamis,
nu ahte sii besset eallit oadjebassan.
19 Mun gihládan du,
válddán oapminan agibeaivái,
mun čanan du alccesan
vanhurskkisvuođa čatnasiiguin
vuoigatvuođas,
ráhkisvuođas ja árbmugasvuođas.
20 Mun čanan du alccesan oskkáldasvuođas,
ja don dovddat Hearrá.
21 Dan beaivvi mun vástidan, cealká Hearrá,
mun vástidan albmái,
ja albmi vástida eatnamii.
22 Eanan vástida gordnái ja viidnái ja oljui,
ja dat vástidit Jisreelii.
23 Mun gilvván Israela alccesan
dán eatnamii
ja árpmihan Lo Ruhama,
mun cealkkán Lo Ammii:
“Don leat mu álbmot!”
Ja son vástida munnje: “Mu Ipmil!”