Ukraina flaggRedder Bibelen liv i Ukraina?
Finn ut mer
Gå til forsiden

Jesaja

23

Tyros ja Sidon

1 Sátni Tyrosa hárrái.

Váidalehket, Taršiša-skiippat,

din hápman lea duššaduvvon!

Ruoktomátkkis kittelaččaid eatnamis

dii gulaidet dan.

2 Jávohuvvet, mearragátti ássit,

dii Sidona gávpeolbmát,

dan gávpoga man áirasat johte viidát

3 stuorra čáziid.

Šihora gortniin, Nileatnama šattuin

dii gávppašeiddet álbmogiiguin

ja oaččuidet das ealáhusa.

4 Heahpan, Sidon, meara ladni,

don fertet cealkit:

“Munnje eai boađe ávttat,

mun in šat riegádahte,

mun in biepma nuorra bártniid

inge šaddat nuorra nieiddaid.”

5 Go egyptalaččat gullet dán,

de sii doarggistit nugo dalle go

gulle ságaid Tyrosii.


6 Mannet Taršišii!

Váidalehket, mearragátti ássit!

7 Dátgo lea din ilolaš gávpot

mii lea leamaš doloža rájes,

man olbmot johte viidát

ja ásse vieris eatnamiidda?


8 Gii lea mearridan dán

Tyrosii, dronnegii,

man gávpeolbmát ledje ráđđejeaddjit,

man gávppašeaddjit ledje

eatnama hearrát?

9 Hearrá, Almmiveagaid Ipmil,

lea mearridan dán,

vai beassá vuolidit buot mii lea

stuoris ja goargat,

ja soardit eatnama stuorráid.


10 Bargga iežat eatnama,

danne go Taršiša-skiippaide

ii leat šat hápman.

11 Hearrá geigii gieđa meara badjel,

bijai riikkaid doarggistit.

Son gohčui duššadit Kanaana ladniid.

12 Son celkkii:

Sidon, illastuvvon nieida,

don it beasa šat illudit.

Vaikko vel manašit kittelaččaid eatnamii,

de doppege it gávnnaše mášu.

13 Geahča Kaldeai,

dan álbmot ii leat maninge.

Assyrialaččat leat dahkan dan

meahcielliid orrunsadjin.

Sii ceggo birastahttintoartnaideaset,

gaiko dan ladniid

ja dahke dan čievračopman.

14 Váidalehket, Taršiša-skiippat,

din hápman lea duššaduvvon!


15 Go dat áigi boahtá, de Tyros vajálduvvá čiežalogi jahkái, gonagasa eallináigái. Muhto go dat čiežalogi jagi leat vássán, de Tyrosii geavvá dego lávlaga fuorrái:

16 “Váldde iežat lyra, váccaš gávpogis,

vajáldahttojuvvon fuorrá!

Čuojat čábbát ja lávllo lávlagiiddát,

vai olbmot muitájit du.”

17 Go čiežalogi jagi leat vássán, de Hearrá áimmahuššá Tyrosa. Dalle dat fas dine ealáhusa furrošemiin buot máilmmi riikkaiguin, miehtá oppa máilmmi. 18 Muhto dan vuoitu ja dienas basuhuvvo Hearrái iige čohkkejuvvo dávvirgámmáriidda duksan. Dienas manná daidda geat ásset Hearrá bassibáikki ovddas, vai sii besset borrat gallás ja gárvodit čábbát.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.