Stor bibelmangel i Venezuela
Gi sammenEn Bibel koster 49 kroner
Gå til forsiden

Jesaja

34

Edoma duopmu

1 Álbmogat, bohtet gullat,

guldalehket, buot eatnamat!

Gullos máilbmi ja buot mii das lea,

eanan ja buot

maid dat lea buktán ovdan!

2 Hearrá lea moaráhuvvan

buot álbmogiidda,

son lea suhttan buot daid veagaide.

Son lea vihahan daid duššadeapmái,

addán daid njuvvojuvvot.

3 Gottáhallan olbmot

eai hávdáduvvo,

sin gorudiin badjána hádja,

sin varra golgá várregilggaid.

4 Almmi veagat moallanit,

albmi gissojuvvo čoahkkái

dego girjegearru,

dan násttit gahččet golnnasin

dego viidnemuora goldnan lasttat,

nugo fiikonmuora goikefiikonat.


5 “Go mu miehkki lea juhkan

galle almmis,

de dat njiedjá vuolás Edomii,

ráŋggášta dan álbmoga

maid mun lean vihahan duššadeapmái.”

6 Hearrá miehkki lea buot varranaga,

dat vuohču buoiddi,

das golgá lábbáid ja bohkáid varra

ja vierccaid moninbuoidi.

Hearrá doallá oaffarfeastta Bosras,

stuorra njuovalmasaid Edoma eatnamis.

7 Velá meahcivuovssátge gahččet,

nuorra burrut ja gievrras vuovssát.

Eanan juhká galle vara,

Edoma muolda veagahuvvo buiddiin.

8 Dát lea Hearrá mávssaheami beaivi,

Siona bealušteddjiid mávssahanjahki.

9 Edoma jogažiin golgá bihkka,

dan muolda rievdá riššan,

oppa eanan šaddá buolli bihkkan.

10 Dat buollá ija beaivvi,

suovva badjána heaittekeahttá.

Eanan báhcá ávdimin buolvvas bulvii,

ii oktage jođe goassege

dan eatnama čađa.

11 Pelikánat ja hoaššaháigirat

oamastit dan,

skuolffit ja gáranasat ásset doppe.

Hearrá njulge mihttobátti

ja luoitá geađgeloatta,

buot šaddá ávdimin ja guorusin.

12 Dohko ii šat válljejuvvo gonagas,

oaivámuččat leat buot jávkan.

13 Šloahtain šaddet bastilislánját,

ladniin gáskálasat ja suovka.

Doppe jođášit šakálat,

dohko skuolffit dahket beasi.

14 Dat šaddá meahcibeatnagiid

ja šakálaid orrunsadjin,

báikin gos guolgás ruomit deaivvadit.

Doppe vuoiŋŋasta Lilit, ija noaidi,

doppe dat gávdná ráfálaš saji.

15 Dohko rástát dahket beasi,

dan suoivanis monnot ja lállet moniid.

Dohko čoagganit suorrehávkkat

dohkiid dohkiid.


16 Dutket Hearrá girjji ja lohket:

Ii oktage dain elliin báze boađekeahttá,

dain ii váillo ii oktage.

Hearrá ieš lea gohččon nu,

su vuoigŋa buktá daid čoahkkái.

17 Son juogada daidda daid oasi,

mihttobáttiin son mihtida

daidda eatnamiid.

Dat oamastit eatnama agálaš áigái,

dat ásset doppe buolvvas bulvii.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.