Ukraina flaggRedder Bibelen liv i Ukraina?
Finn ut mer
Gå til forsiden

Jesaja

35

Bassi geaidnu

1 Goikeeanan lea ilus,

ávdin meahcci illuda,

jakŋan eanan ávvuda ja liđiida.

Dego lilljágieddi

2 lieđđu goikemeahcci,

dat illuda ja ávvuda.

Dan oassin šaddá

Libanona šearratvuohta,

Karmela ja Sarona hearvásvuohta.

Buohkat besset oaidnit

Hearrá šearratvuođa,

min Ipmila hearvásvuođa.

3 Nanosmahttet šlieddan gieđaid,

dahket suoibu čippiid nanusin!

4 Celket suorganan olbmuide:

“Lehket oadjebasat, allet bala!

Gehččet, dá lea din Ipmil!

Ráŋggáštus lahkona,

Ipmila mávssaheami boddu.

Ipmil ieš boahtá beastit din.”

5 Dalle leahkkasit

čalmmehemiid čalmmit

ja rahpasit bealjehemiid bealjit.

6 Dalle lámis njuiku dego sarvva,

ja gielaheami njuovčča ávvuda.

Goikeeatnamii ihtet ádjagat,

jogažat jakŋa meahccái.

7 Buolli báhkka eanan

šaddá hoaššaláttun,

čázehis eanan čáhccás ájan.

Eatnamii gos šakálat dál vuoiŋŋastit,

šaddet hoaššat ja papyrusrásit.

8 Ja dohko šaddá geaidnu,

dat gohčoduvvo bassi geaidnun.

Ii oktage buhtismeahttun

oaččo dan vádjolit.

Dat geaidnu lea mátkkálaččaid várás,

das eai jallatge čádjádala.

9 Dan ala ii lávke ledjon,

ii oktage boraspire.

Dušše lonistuvvon olbmot

vádjolit dan,

10 dat geaid Hearrá lea lonistan,

máhccet ja bohtet Sionii ávvudemiin,

agálaš illu kruvdnun oaivvis.

Ávvu ja illu loaiddastit poarttas,

moraš ja šuohkanas báhtarit guhkás.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.