Ukraina flaggRedder Bibelen liv i Ukraina?
Finn ut mer
Gå til forsiden

Jesaja

41

Hearrá lea rávkan Kyrosa

1 Jaskkodehket!

Guldalehket mu, gáiddus eatnamat!

Gullet, álbmogat!

Bohtet ovdan ja sárdnot,

loaiddastehkot ovttas rievtti ovdii.

2 Gii lea boktán nuortan olbmá

mannat vuoittus vuitui?

Gii addá álbmogiid su háldui

ja diktá su duolbmat gonagasaid?

Su miehkki rievdada sin gavjan,

su dávgi dahká sin sáđđun biggii.

3 Son doarrida sin,

manná ovddos oadjebassan,

su juolggit illá guoskkahit luotta.

4 Gean bargu dát lea,

gii lea dán dahkan?

Son guhte álggu rájes

rávkkai buolvvaid eallit.

Mun, Hearrá, lean vuosttamuš,

ja maŋimuččaid luhttege

mun lean seammá.


5 Gáiddus eatnamat oidnet dan,

dat ballet,

oppa eanan doarggista.

Dat lahkonit, dat bohtet.

6 Buohkat veahkehit

guhtet guimmiideaset,

sii roahkasmahttet nuppiideaset.

7 Leikejeaddji roahkasmahttá

gollerávdi,

dat gii dearppada veahčiriin,

roahkasmahttá dan gii liktuda golli.

Son rámida jugahusa

ja gidde ipmilgova návlliiguin,

amas juovzut.

Hearrá veahkeha Israela

8 Israel, mu bálvaleaddji,

Jakob, gean mun lean válljen,

don, mu ustiba Abrahama nálli,

9 don gean mun vižžen

eatnama ravddas,

rávken dan olggumuš geažis,

don geasa mun celken:

“Don leat mu bálvaleaddji,

mun lean válljen du, mun in du hilggo!”

10 Ale bala, mun lean duinna.

Ale vilppo balus, mun lean du Ipmil.

Mun nanusmahtán ja veahkehan du,

mun doarjjun ja gájun du

olgeš gieđainan.

11 Buohkat geat moaráhuvvet dutnje,

šaddet heahpadii ja bilkiduvvojit.

Dat geat čuožžilit du vuostá,

duššet ja jávket.

12 Don ozat daid

geat dáistaledje du vuostá,

muhto it gávnna.

Dat olbmát geat sohte duinna,

duššet ollásii.

13 Munhan lean Hearrá, du Ipmil,

mun doalan du olgeš gieđas

ja cealkkán dutnje:

“Ale bala, mun veahkehan du.”


14 Ale bala, Jakob, don máhtu,

don Israela unna jovkkoš!

Mun veahkehan du, cealká Hearrá,

du lonista Israela Bassi.

15 Mun dagan du bastilisávjjot

gordnecuvkenreahkan,

ođđa reahkan man biikkat leat bastilat.

Don cuvket váriid gavjan,

mollet dieváid sáđđun.

16 Don suohput daid áibmui,

biegga doalvu daid, riđđu daid biđge.

Muhto don beasat illudit Hearrá siste,

Israela Bassi lea du ávvu.


17 Váivvášat ja vártnuheamit ohcet čázi,

muhto ii leat mihkkege,

goiku lea goikadan sin njuokčama.

Mun, Hearrá, vástidan sidjiide,

mun, Israela Ipmil, in hilggo sin.

18 Mun divttán jogaid golggiidit

báljes dieváide,

ádjagiid legiid gasku.

Mun dagan jakŋa meahci čáhceláttun

ja goikesáddo ádjagiid eanamin.

19 Mun gilvván sederiid ávdin meahccái,

mun šaddadan ádjui akasiaid, myrttaid

ja meahcceoliivamuoraid,

mun ceggen jalgadassii sypressaid,

beziid ja buksbommuoraid,

20 vai buohkat oidnet ja dihtet,

jurddašaddet ja ipmirdit

ahte Hearrá giehta lea dahkan dán,

ahte Israela Bassi lea dán sivdnidan.

Hearrá vai eahpeipmilat

21 Buktet ovdan din ášši, cealká Hearrá,

muitalehket ákkaideattet,

cealká Jakoba gonagas.

22 Loaiddastehket almmuhit midjiide,

mii dáhpáhuvvá.

Čilgejehket midjiide doložiid,

vai mii beassat guorahallat daid

ja ipmirdit, mii lea dáhpáhuvvan.

Dahje muitalehket midjiide

mii lea boahtimin,

23 almmuhehket mii

dáhpáhuvvá dás maŋás,

vai mii diehtit ahte dii lehpet ipmilat.

Dahket maid ihkinassii, buori dahje bahá,

vai mii buohkat beassat

geahččat ja oaidnit.

24 Diihan lehpet čabu dušši,

din dagut eai leat mahkkege.

Fasti lea dat ahte muhtun din vállje.

25 Davvin mun bokten olbmá,

rávken su beaivváža badjáneami guovllus.

Son duolbmá hálddašeddjiid dego muoldda,

dego láirelihttedahkki duolbmá láirri.

26 Guhtemuš dis muitalii dan juo ovdal,

vai mii livččiimet dan diehtán?

Gii einnostii dan,

nu ahte dál sáhtášeimmet dadjat:

“Son sártnui duođa.”

Ii oktage muitalan, ii oktage gulahan,

ii oktage leat gullan dis sánige.

27 Muhto mun, mun okto

muitalin dan Sionii,

mun vuolggahin illuáirasa Jerusalemii.

28 Mun geahčan biran,

muhto dás ii leat oktage,

ii oktage gii nevvošii,

ii oktage gii máhtášii vástidit

mu jearaldagaide.

29 Duođaid sii leat čabu dušši,

sin dagut eai leat mahkkege.

Sin leikejuvvon báccit leat

biegga ja guorusvuohta.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.