Iran: Kristne ønsker nytestamenter
Gi sammenEt NT koster 33 kroner
Gå til forsiden

Jesaja

45

Kyros, Hearrá válljen gonagas

1 Ná cealká Hearrá Kyrosii

gean son lea vuoidan gonagassan,

gean olgeš gihtii son lea dohppen

vai beassá vuolidit

álbmogiid su vuollái,

čoavdit boahkána gonagasaid alimiin,

rahpat sutnje uvssaid ja poarttaid,

nu ahte dat eai leat dahppagasas:

2 Mun manan du ovddabeale.

Váriid mun dássen,

veaikeuvssaid mun cuvken,

ruovdesmarttiid mun skálbmen.

3 Mun attán dutnje dávviriid

sevdnjes čiegáin

ja riggodagaid daid čiehkansajiin,

vai don ipmirdat

ahte son gii lea addán dutnje nama,

lean mun, Hearrá, Israela Ipmil.

4 Bálvaleaddján Jakoba dihte,

Israela dihte gean lean válljen,

mun lean addán dutnje nama,

du gudnenama,

vaikko don it dovdda mu.

5 Mun lean Hearrá. Ii leat eará,

earret mu ii leat oktage ipmil.

Vaikko don it dovdda mu,

de mun vearjudan du soahtái,

6 vai buohkat nuortan ja oarjin

ohppet diehtit ahte ii leat ipmil

earret mu,

ahte mun okto lean Hearrá,

7 mun gii dagan čuovgga

ja sivdnidan seavdnjadasa,

dagahan sihke lihku ja lihkuhisvuođa.

Mun lean Hearrá, mun dagan buot dán.

8 Arvos albmi badjin,

golgos vanhurskkisvuohta balvvain,

rahpasehkos eanan ja

šaddadehkos bestojumi šattu,

bohciidehkos vanhurskkisvuohta!

Mun, Hearrá, lean sivdnidan dan.


9 Vuoi olbmo gii riidala sivdnideddjiinis,

vuoi láirálihttebihtá bihtáid gaskkas!

Dadjágo láirá hábmejeaddjásis:

“Maid don veaját dahkat?”

Dadjágo duodji duddjojeaddjásis:

“Donhan leat gieđaheapme.”

10 Vuoi dan gii dadjá áhččái:

“Maid don leat sahkanahttán?”

ja eadnái: “Maid don leat riegádahttán?”

11 Ná cealká Hearrá, Israela Bassi,

son guhte lea hábmen su:

Jerret mus boahttevaš dáhpáhusaid birra!

Diktet mu ráđđet mánáidan,

mu gieđaid daguid.

12 Munhan dahken eatnama

ja sivdnidin olbmuid ássat dasa.

Mun lebbejin almmi gieđaidanguin

ja dahken buot dan veaga.

13 Oskkáldasvuođastan

mun bokten olbmá,

ja gosa son ain manaš,

de mun dássen su geainnu.

Son hukse fas mu gávpoga,

ja mu álbmoga mii

lea dolvojuvvon fáŋgavuhtii,

son luoitá vuolgit

iige gáibit mávssu iige attáldagaid.

Ná cealká Hearrá, Almmiveagaid Ipmil.

Hearrá ráđđe buot álbmogiid

14 Ná cealká Hearrá:

Egypta riggodagat

ja Kuša jábálašvuohta

šaddet du oapmin.

Seba stuorrašattot olbmát

bohtet du lusa ja áhcet du vuolebužžan.

Du sii čuvvot, láhkkiin lávkot,

bálkestahttet du ovdii ja rohkadallet du:

“Aivve du gaskkas, Israel, lea Ipmil,

eará ipmil ii leat.”

15 Duođaid, don leat čiehkan iežat,

Ipmil,

don Israela Ipmil, Beasti!

16 Heahpadii šaddet sii buohkat,

hilggohassan mannet

eahpeipmilduojárat eret,

17 muhto Hearrá beastá Israela,

beastá agálaš áigái.

Dii ehpet goassege šatta heahpadii

ehpetge bilkiduvvot.


18 Ná cealká Hearrá,

Ipmil gii sivdnidii almmi

ja hábmii ja ráhkadii eatnama,

gii bijai dasa nana vuođđudusa,

ii sivdnidan dan ávdimin,

muhto dagai dan

olbmuid ássat,

ná son cealká:

Mun lean Hearrá,

ii leat eará ipmil.

19 Mun in leat sárdnon čihkosis,

muhtun eatnama sevdnjes sajis,

in leat gohččon Jakoba náli

ohcat mu guorusvuođas.

Mun lean Hearrá,

mu sánit leat duođat,

mun sártnun dan mii lea riekta.

20 Čoagganehket ja bohtet,

loaiddastehket ovdan,

dii geat sestojuvvuidet

álbmogiid gaskkas!

Eai sii ipmir maidege,

dat geat guddet muorragovaid

ja rohkadallet ipmila

mii ii máhte veahkehit.

21 Muitalehket,

buktet iežadet vástádusa,

ráđđádallet gaskaneattet!

Gii gulahii dán ovddalgihtii,

sártnui dan áigá juo?

Dan dahken mun, Hearrá.

Earret mu ii leat Ipmil,

earret mu ii leat oskkáldas Ipmil

gii beastá.

22 Jorgalehket mu beallái,

olbmot birra máilmmi,

de dii bestojuvvobehtet.

Mun lean Ipmil,

ii leat oktage eará.

23 Mun vuortnun iežan bokte,

mun sártnun duođa,

mu sátni lea nanus:

Juohke čibbi sodjá mu ovdii,

juohke njuovčča vuordnu munnje

oskkáldasvuođa.

24 Aivve fal Hearrás,

nu celkojuvvo,

lea bestojupmi ja fápmu.

Heahpanemiin bohtet Hearrá lusa

buohkat geat leat leamaš moaris sutnje.

25 Hearrá vehkiin oppa Israela nálli

vuoitá ja oažžu gudni.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.