Iran: Kristne ønsker nytestamenter
Gi sammenEt NT koster 33 kroner
Gå til forsiden

Jesaja

46

Hearrá veahkeha, eai eahpeipmilat

1 Bel njagaga, Nebo gahččá.

Fievroomiid ja šibihiid sealgái

noađuhuvvojit daid ipmilgovat,

govat maid dii láviidet guoddit ovdal,

bajiduvvojit váiban šibihiid noađđin.

2 Dat ravget ja gahččet,

eai dat sáhte guoddit

eaige gádjut ovttage,

fáŋgavuhtii sii vádjolit buohkat.

3 Gula mu, Jakoba sohka,

oppa Israela čeardda bázahas!

Gullet dii geaid mun lean

šaddan loktet ja guoddit

dan rájes go dii riegádeiddet,

gitta eatni goaŧu rájes!

4 Gitta din boarisvuođa rádjái

mun lean seammá,

mun guottán din velá dallege

go din vuovttat leat čurggodan.

Nu mun lean dahkan ja nu ain dagan,

mun lokten, guottán ja gájun din.

5 Geanin dii veardidehpet mu,

gean bidjabehtet bálddalaga muinna?

Gean láhkásažžan dii atnibehtet mu,

gii livččii mu veardásaš?

6 Sii šárgalit golli burssas

ja vihkkejit veavttain silbba,

bálkáhit gollerávdi duddjot ipmila.

Dan ovdii sii de luoitádit rohkadallat,

7  loktejit dan oalggi ala,

guddet dan ja bidjet dan sadjásis.

Das dat ceaggá, ii gáidda sajistis.

Jos sii čurvot dasa, de dat ii vástit,

dat ii gájo ovttage heađis.

8 Muitet dán morrašiin,

smihttet dán, suttolaččat!

9 Muitet dološ dáhpáhusaid,

don doloža rájes:

Mun lean Ipmil, eará ii leat.

Mun lean Ipmil, ii leat oktage mu veardásaš.

10 Mun muitalin juo ovdal

dan mii boahtá,

juo áigá mun einnostin dan

mii ii lean vel dáhpáhuvvan.

Ná mun cealkkán,

ja mu áigumuš lea nanus,

mun dagan buot maid dáhtun.

11 Mun rávkkan gazzalotti nuortan,

gáiddus eatnamis olbmá

gii ollašuhttá mu áigumuša.

Maid lean sárdnon,

dan mun divttán šaddat,

mun dagan dan maid lean mearridan.

12 Guldalehket mu, dii garraváimmogat,

dii geat lehpet guhkkin gáddjojumis!

13 Mun divttán gáddjojumi lahkonit,

dat ii leat guhkkin,

mu bestojupmi ii ádján.

Sionii mun buvttán bestojumi,

attán iežan hearvásvuođa Israelii.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.