Ukraina flaggRedder Bibelen liv i Ukraina?
Finn ut mer
Gå til forsiden

Jesaja

48

Israela ovddeš oskkáldasmeahttunvuohta

1 Gula, Jakoba sohka,

gii gohčoduvvot Israela namain,

gullet, dii geat lehpet vuolgán

Juda ádjagis

ja vuordnubehtet Hearrá nammii,

dii geat rámidehpet Israela Ipmila,

muhto ehpet duohtavuođas

ja oskkáldasvuođas.

2 Sii navdet iežaset

bassi gávpoga namain

ja dorjejit Israela Ipmilii,

sutnje gean namma lea Hearrá,

Almmiveagaid Ipmil.

3 Dološ dáhpáhusaid mun muitalin

juo guhká ovdal go dat dáhpáhuvve,

mun almmuhin daid,

adden daid diehttevassii.

Fáhkkestaga mun dahken daid,

ja dat šadde.

4 Mun dieđán ahte don leat garas,

du niski lea ruovddis

ja du gállu bronssas.

5 Danne mun almmuhin dán áigá juo,

gulahin dan dutnje

ovdal go dat dáhpáhuvai,

amat sáhttit dadjat:

“Mu ipmilat leat dahkan dán,

mu leikejuvvon bázzi gohčui dan šaddat.”

6 Dás don oainnát duot dan

maid leat gullan.

Almma don sáhtát muitalit dan!

Dál mun almmuhan dutnje ođđasiid,

čiegus áššiid maid don it diehtán.

7 Dat leat sivdniduvvon aiddo dál

eaige dolin,

don it leat gullan daid ovdal go odne,

amat sáhttit dadjat:

“Mun dihten dan.”

8 Don it leat beassan gullat daid

itge diehtit daid,

ii mihkkege almmustuvvan

dutnje juo ovdal.

Mun dieđán du leat oskkáldasmeahttun,

riegádeami rájes

don leat gohččojuvvon beahttin.

9 Iežan nama dihte

mun lean guhkesmielalaš,

gudnán geažil mun lean gierdavaš

inge duššat du.

10 Mun lean šolgen du,

muhto in danin vai fidnešin silbba,

mun lean geahččalan du

gillámuša šolgenuvnnas.

11 Iežan dihte, aivve fal iežan dihte

mun dahken dan,

mu namma ii oaččo heahppášuhttojuvvot.

Iežan gudni mun in juogat earrásii.

Hearrá lea vuolggahan Kyrosa

12 Gula mu, Jakob,

Israel, gean mun lean rávkan!

Mun lean Ipmil, mun lean vuosttamuš

ja mun lean maid maŋimuš.

13 Mu giehta bijai eatnama vuođđudusaid,

mu olgeš giehta lebbii almmi.

Mun rávken daid, ja dat ledje das.

14 Čoagganehket buohkat ja gullet!

Guhtemuš dain earáin gulahii dán:

“Dat gean Hearrá ráhkista,

ollašuhttá su áigumuša Babylona vuostá

ja Kaldea álbmoga vuostá.”

15 Mun lean muitalan dán,

mun lean rávkan su,

mun lean vuolggahan su

ja diktán su lihkostuvvat.

16 Bohtet mu lusa ja gullet:

Álgoáiggiid rájes

mun in goassege sárdnon čihkosis.

Juo dalle go dát dáhpáhuvvagohte,

de mun ledjen das.

Ja dál Hearrá Ipmil

lea addán munnje iežas vuoiŋŋa

ja vuolggahan mu.

Israela gulolašvuohta

17 Ná cealká Hearrá, Israela Bassi,

du lonisteaddji:

Mun lean Hearrá, du Ipmil.

Mun oahpahan dutnje,

mii lea dutnje ávkkálaš,

mun doalvvun du geainnu

man galggat vádjolit.

18 Vare don jeagadivččet

mu báhkkomiid!

Dalle du ráfi livččii dego eatnu,

du vanhurskkisvuohta

nugo ábi bárut,

19 ja du nálli livččii dego sáddot,

du mánát nugo sáttočalmmit.

Du namma ii goassege duššaše,

dat ii sihkkojuvvoše

mu muođuid ovddas.

Ruoktot Babylonis

20 Vulget Babylonis,

báhtarehket Kaldeas!

Muitalehket dan ávvudemiin,

dieđihehket ja beakkuhehket

gitta eatnama ravddaid rádjái.

Dadjet: “Hearrá lea lonistan

bálvaleaddjis Jakoba!”

21 Eai sii goikan go son doalvvui sin

goikemeahci čađa:

Son attii čázi golgat sidjiide bávttis,

son luddii bávtti, ja čáhci golggai.

22 Ipmilmeahttumiin ii leat ráfi,

cealká Hearrá.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.