Ukraina flaggRedder Bibelen liv i Ukraina?
Finn ut mer
Gå til forsiden

Jesaja

52

Hearrá máhccá Sionii

1 Gohccá, Sion, gohccá,

gárvvut alccesat gievravuođa!

Gárvot čikŋabiktasiid,

bassi gávpot, Jerusalem!

Ii oktage birračuohpakeahttái

iige buhtismeahttun

duolmma šat du gáhtaid.

2 Čuožžil, savdnjil muoldda alddát,

čohkán truvdnosat, Jerusalem!

Luvve láhkkiid čeabehisttát,

fáŋgejuvvon nieida Sion!


3 Ná cealká Hearrá:

Nuvttá dii vuvdojuvvuidet,

ja almmá mávssu haga

dii maid lonistuvvobehtet.

4 Ná cealká Hearrá Ipmil: “Árat áiggiid mu álbmot manai Egyptii ássát doppe vierisin, dasto Assyria váivvidii dan almmá siva haga. 5 Ja dál – cealká Hearrá – mii dáhpáhuvvá dáppe? Mu álbmot lea váldojuvvon mus nuvttá, dat geat ráđđejit sin, ávvudit ja hiddjidit. Álelassii, guhkkut beaivvi – cealká Hearrá – mu namma bilkiduvvo! 6 Danin mu álbmot beassá dovdat mu nama fámu. Dan beaivvi mun cealkkán sidjiide: Dás mun lean.”


7 Man čábbát leat váriin dan lávkkit

gii buktá buriid ságaid!

Son almmuha vuoittu,

buktá buriid ságaid,

gulaha bestojumi ja dadjá Sionii:

“Du Ipmil lea gonagas!”

8 Gullet! Várdájeaddjit

čuorvugohtet ávvudemiin,

danin go iežaset čalmmiiguin sii oidnet,

mo Hearrá máhccá Sionii.

9 Ávvudehket jitnosii,

dii Jerusalema čievračomat,

dasgo Hearrá lea addán

jeđđehusa iežas álbmogii,

son lea lonistan Jerusalema!

10 Hearrá lea čájehan

iežas fámu ja bassivuođa

buot álbmogiid oaidnut,

nu ahte oppa máilbmi oaidná bestojumi

maid min Ipmil lea buktán.


11 Vulget, vulget eret Babylonis!

Allet duohtat maidege buhtismeahttumiid,

vulget doppe eret, lehket buhttásat,

dii geat guoddibehtet Hearrá lihtiid!

12 Muhto dál dii ehpet dárbbaš

vuolgit hoahpus

ehpetge báhtaremiin,

dasgo Hearrá manná din ovdal,

Israela Ipmil lea dis maŋušin.

Hearrá bálvaleaddji gillá

13 Mu bálvaleaddji ovdána:

Son šaddá allagin, fámolažžan

ja sakka stuorisin.

14 Eatnagat suorganedje go oidne su,

nu illastuvvon lei su neahku,

su hápmi lei illá šat olbmo hápmi.

15 Muhto son imaštahttá

vel ollu álbmogiid,

gonagasat jávohuvvet go oidnet su,

danin go dan mii sidjiide

ii lean goassege muitaluvvon,

sii besset oaidnit,

dan maid sii eai lean goassege gullan,

sii besset dál vásihit.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.