Iran: Kristne ønsker nytestamenter
Gi sammenEt NT koster 33 kroner
Gå til forsiden

Jesaja

55

Hearrá lihttu bissu

1 Gullet, buohkat geat goikabehtet,

bohtet čázi lusa!

Bohtet diinai geain ii leat ruhta,

ostet gortniid nuvttá ja borret,

váldet viinni ja mielkki

almmá mávssu haga!

2 Manne dii golahehpet ruđa

dakkárii mii ii leat láibi,

lonuhehpet dietnaseattet

dasa mii ii gallet?

Gullet datte mu,

de beassabehtet herskostallat

ja návddašit buoiddes borramušaid.

3 Jorgalehket bealji mu beallái

ja bohtet mu lusa,

guldalehket dárkilit,

de beassabehtet eallit!

Mun dagan dinguin agálaš lihtu

ja lohpidan leat oskkáldas,

nugo ledjen oskkáldas Davidii.

4 Su mun bidjen duođašteaddjin

álbmogiidda,

dahken su álbmogiid oaivámužžan

ja ráđđejeaddjin.

5 Don rávkkat álbmoga

maid it dovdda,

ja álbmot mii ii dovdda du,

boahtá viega du lusa

Hearrá, du Ipmila, dihte,

Israela Basi dihte.

Son addá dutnje hearvásvuođa.

Hearrá sátni ii máhca guorusin

6 Ohcet Hearrá dan botta

go son lea gávdnamis,

čurvot su go son lea lahka!

7 Heitos ipmilmeahttun geainnus

ja vearredahkki áigumušaidis.

Jorgalehkos son Hearrá beallái,

danin go son árpmiha,

dorvvastehkos Ipmilii

gii álo dáhttu addit ándagassii.

8 Mu jurdagat eai leat din jurdagat

eaige din geainnut leat mu geainnut,

cealká Hearrá.

9 Nu go albmi lea allin eatnama badjel,

nu leat mu geainnut

allin din geainnuid badjel

ja mu jurdagat allin din jurdagiid badjel.

10 Nugo arvi ja muohta

gahččet almmis eaige máhca dohko,

muhto láktadit eatnama,

bohciidahttet rahtá ja šattuid

ja addet siepmaniid gilvái

ja láibbi borrái,

11 nu lea maiddái sátni

mii vuolgá mu njálmmis:

Ii dat máhca guorusin,

muhto dahká dan maid mun dáhtun

ja ollašuhttá mu gohččuma.


12 Ilus dii oažžubehtet vuolgit,

ja muosis dii ollebehtet ruoktot.

Go dii boahtibehtet,

de várit ja dievát čurvot ávus,

ja buot eatnama muorat spežžot gieđaid.

13 Bastilislánjáid sadjái

šaddet sypressat

ja gáskálasaid sadjái myrtamuorat.

Nu dáhpáhuvvá Hearrá nama gudnin,

agálaš mearkan, mii ii sihkkojuvvo.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.