Stor bibelmangel i Venezuela
Gi sammenEn Bibel koster 49 kroner
Gå til forsiden

Jesaja

57 

1 Vanhurskkis duššá

iige oktage das beroš,

ipmilbalolaččat rohttejuvvojit eret

iige oktage dan fuobmá.

Bahávuođa fápmu

rohtte eret vanhurskása.

2 Muhto ráfi áigi boahtá.

Dat geat leat eallán vuoigatlaččat,

besset vuoiŋŋadussii.

3 Bohtet deike,

dii noaidenissona mánát,

dii fuorráolbmáid

ja fuorránissoniid čivggat!

4 Gean dii atnibehtet návrun,

geasa njeazzubehtet,

geasa geigebehtet njuokčama?

Dii iežahan lehpet rihkkosa mánát,

giellása nálli!

5 Dii buollibehtet himus

terebinttaid gaskkas,

juohke rudnes muora vuolde.

Dii goddibehtet

iežadet mánáid johkarokkiin,

vuollin čiekŋalis bákteskoaruin.

6 Johkarokki gállit leat du ruoktu,

dat leat du báiki, du vuorbi, Sion!

Daidda don golggahat juhkamušoaffara

ja oaffarušat borramušoaffara.

Dasago mun galggašin duhtat?

7 Alla várrái don leat láhčán

alccesat oađđinsaji,

dohkonai don leat gorgŋon

oaffaruššat njuovvanoaffariid.

8 Uvssaide ja uksabealláide

don leat sárgon mearkkaidat.

Don leat guođđán mu, nuoladan

ja čáhkken saji seŋgii,

leat gávppašan daiguin

geaid bálddas liikot veallát,

geaid álásvuođa geahččat.

9 Don háskkidit oljju Melekii,

dus ledje mielde ollu vuoidasat.

Don vuolggahit áirasiiddát

gáiddus eatnamiidda,

velá vulos jábmiidáibmuige.

10 Vaikko don váibet buot rassamiinnat,

de it goit leat dadjan: “Duššás visot!”

Don gávnnat ođđa searaid

itge vuoimmehuva.

11 Geas don ballet, gean soiget

go behttet mu?

Mu don vajáldahttet, mus it beroštan.

Go mun lean orron jávohaga,

go lean leamaš čihkosis,

de don it bala mus.

12 Muhto mun almmuhan

makkár lea du vanhurskkisvuohta

ja makkárat du dagut.

Dat eai veahket du.

13  Go don čuorvvut veahki,

de gádjotgo du eahpeipmiliid veagat du?

Biegga daid doalvu,

jiella bosasta daid eret.

Muhto dat gii dorvvasta munnje,

oažžu árbet eatnama

ja váldit mu bassi vári opmodahkanis.

Jeđđehus nuonddahallan olbmuide

14 Hearrá cealká:

Ráhkadehket, dássejehket geainnu,

jávkadehket eastagiid mu álbmoga ovddas!

15 Ná cealká son guhte lea

allat ja aliduvvon,

guhte čohkká truvnnus agálaččat,

gean namma lea bassi:

Mun ásan allagasas ja bassivuođas,

muhto ásan maid daid luhtte

geaid váibmu lea cuvkejuvvon

ja geaid vuoigŋa lea vuoliduvvon.

Mun ealáskahtán

cuvkejuvvon olbmuid váimmu

ja ealláhan

vuoliduvvon olbmuid vuoiŋŋa.

16 In mun ráŋggo din agálaš áigái

inge leat didjiide moaris agálaččat.

Muđui din eallinvuoigŋa duššašii,

iige oktage dain heakkalaččain

maid lean sivdnidan,

gierddaše mu ovddas.

17  Oanehis boddui mun moaráhuvven

dán suttolaš álbmogii,

ráŋggáštin dan

ja moaris čihken das muođuidan.

Oskkáldasmeahttumit

dat vádjolii ain iežas dáhtu geainnuid.

18 Mun lean oaidnán

makkár geainnuid dat lea vádjolan.

Muhto dál mun dáhtun buoridit

dán álbmoga,

láidet dan ja addit dasa jeđđehusa.

Morašteddjiid njálbmái

19 mun sivdnidan máidnunlávlaga.

Mun attán ráfi ja lihku dasa gii lea lahka

ja gii lea guhkkin,

cealká Hearrá,

ja mun buoridan sin.

20 Muhto ipmilmeahttumat leat

dego stuimmáskan mearra.

Dat ii jaskkot,

dan bárut suhppejit mođi ja stánžži.

21 Ipmilmeahttumiin ii leat ráfi,

cealká mu Ipmil.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.