Ukraina flaggRedder Bibelen liv i Ukraina?
Finn ut mer
Gå til forsiden

Jesaja

59

Álbmoga suttut

1 Ii Hearrá giehta leat oanehaš beastit

iige su beallji headju gullat.

2 Ii nu, din vearredaguthan

earuhit din din Ipmilis.

Din suttut leat čiehkan su muođuid,

nu ahte son ii gula din,

3 danin go varra lea duolvadan

din gieđaid,

vearredagut din suorpmaid,

din baksamat sárdnot giellásiid

ja din njuovčča savkkuha behtolašvuođa.

4 Ii oktage mana riektái vuoiggalaččat,

ii oktage váidde nuppi rehálaččat.

Buohkat dorvvastit guorusvuhtii

ja sárdnot giellásiid,

guddet goaŧusteaset lihkuhisvuođa

ja riegádahttet heavu.

5 Sii monnot gearbmašmoniid

ja gođđet heavnnifirpmiid.

Dat gii borrá daid moniid, jápmá,

ja jos muhtin dain cuovkana,

de das ihtá mirkogearpmaš.

6 Sin gođus ii dohkke bivttasin,

sin dujiid ii sáhte gárvodit.

Sin dagut buktet lihkuhisvuođa,

sin gieđat dagahit veahkaválddi.

7 Sii dopmet buot dasa mii lea bahá,

sii leat johtilat golggahit vigihis vara.

Sin áigumušat leat bahát,

sin luottain lea veahkaváldi ja billašupmi.

8 Eai sii dovdda ráfi geainnu,

sin luottain ii leat vuoigatvuohta.

Sii lávkot moalkás bálgáid

– gii daid johtá, ii oaččo ráfi.

Álbmot dovddasta suttuidis

9 Dan dihte riekti lea guhkkin mis,

vanhurskkisvuohta ii ole midjiide.

Mii vuordit čuovgga,

muhto lea seavdnjat,

mii áibbašit beaivečuovgga,

muhto fertet vádjolit

ija suoivaniid siste.

10 Nugo čuovggaheamit

mii ráivut seaidneguoraid,

mii guldalit gieđain

dego mis eai livčče čalmmit.

Mii guosadit beaiveguovdil

dego veiggodettiin,

buoremus agis mii leat dego jábmit.

11 Mii muraidit dego guovžžat,

mii luoibmat nugo duvvát.

Mii vuordit vuoiggalašvuođa,

muhto dat ii leat,

bestojumi, muhto dat lea mis guhkkin.

12 Min rihkkumat leat eatnagat,

min suttut duođaštit min vuostá.

Mii muitit rihkkumiiddámet,

mii diehtit ahte leat suddudan.

13 Mii leat jorralan eret

ja biehttalan Hearrá,

mii leat jorgalan sealggi Ipmilasamet,

sárdnon veahkaválddi ja

behtolašvuođa sániid,

sahkanahttán giellásiid

ja cealkán daid albmosii.

14 Ná vuoigatvuohta lea

duvdojuvvon eret,

vuoiggalašvuohta lea guhkkin,

duohtavuohta lea guossalan márkanšiljus,

rehálašvuhtii ii leat sadji.

15 Duohtavuohta lea jávkan,

dat gii jorgala eret bahás, rieviduvvo.

Hearrá veahkeha gáhtavaččaid

Buot dán Hearrá oinnii,

ja su čalmmiin lei bahá

go eatnamis ii lean

mihkkege vuoigatvuođaid.

16 Son oinnii ahte

ii oktage ovddidan su ášši,

ja son ovddošii dan.

Dalle su giehta veahkehii su,

su vanhurskkisvuohta lei sus duvddan.

17 Son gárvodii vanhurskkisvuođa

ruovdebiktasa,

bijai bestojumi ruovdegahpira oaivái,

gárvvuhii alccesis mávssaheami gárvvu

ja giesai iežas birra

buolli áŋgirvuođa oalgebiktasa.

18 Moriin son mávssaha vuostálastiidasas

dan maid sii leat dahkan,

son mávssaha vašálaččaidasas,

mávssaha gáiddus eatnamiidda.

19 Oarjin ja nuortan olbmot ballet

Hearrá namas ja su hearvásvuođas,

go son boahtá dego boršu dulvi

maid Hearrá dálki ádjá.

20 Muhto Sionii Hearrá boahtá beastin,

Jakoba náli lusa lonisteaddjin,

cealká Hearrá.


21 Hearrá cealká sidjiide: “Dát lea mu lohpádus: Ii gáidda mu vuoigŋa du badjelis eaige jávkka mu sánit maid mun lean bidjan du njálbmái, goassege du njálmmis, eai du mánáid njálmmis eaige du mánáid mánáid njálmmis”, cealká Hearrá, “eai dál eaige agálaš áiggiin.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.