Ukraina flaggRedder Bibelen liv i Ukraina?
Finn ut mer
Gå til forsiden

Jesaja

62

Ipmila hearvás gávpot

1 Siona dihte mun in dáhto jávohuvvat,

Jerusalema geažil mun in oro jávohaga,

dassážii go vuoigatvuohta

badjána doppe dego beaivváš

ja bestojupmi nugo buolli spáiddar,

2 dassážii go álbmogat oidnet

du soabahusa

ja gonagasat du hearvásvuođa.

Don oaččut ođđa nama

maid Hearrá ieš gulaha.

3 Don šattat čáppa kruvdnun

Hearrá gihtii,

gonagaslaš oaivečikŋan

du Ipmila čorbmaváibmosii.

4 Du namma ii šat leat Hilgojuvvon

iige du eatnama namma Heavahuvvon,

muhto du namma lea Ráhkkásan

ja du eatnama namma Beallelaččan,

danin go Hearrá ráhkista du

ja váldá du eatnama beallelažžan.

5 Nugo nuorra olmmái

váldá nieidda beallelažžan,

nu du bártnit váldet du beallelažžan,

ja nugo irgi illuda moarsis dihte,

nu du Ipmil illuda du dihte.


6  Du muvrraid ala, Jerusalem,

mun lean bidjan fávttaid.

Sii eai oaččo jávohuvvat goassege,

eai beaivet eaige ihkku.

Dii geat čuorvubehtet Hearrá,

allet suova alcceseattet ráfi!

7 Allet suova ráfi sutnje,

ovdal go son hukse Jerusalema ođđasis

ja dahká dan máidnunlávllan

oppa máilbmái!

8 Hearrá lea vurdnon

olgeš gieđas bokte,

gievrras gieđas bokte:

Mun in goassege šat atte du gortni

du vašálaččaid borramuššan,

eaige vierrásat šat juga du viinni

mainna don leat rahčan,

9 muhto dat geat rádjet gortni,

besset maid borrat dan ja máidnot Hearrá,

dat geat rádjet viinni,

besset juhkat dan mu bassi ovdašiljuin.


10 Vulget, mannet olggos poarttaid ráigge,

ráhkadehket geainnu álbmogii,

ráhkadehket, dássejehket váldogeainnu,

buhtistehket dan geđggiin,

ceggejehket soahteleavgga

mearkan álbmogiidda!

11 Gitta eatnama ravddaid rádjái

Hearrá lea gulahan:

Dadjet nieida Sionii:

Geahča, du beasti boahtá,

su mielde leat dat geaid son oaččui bálkán,

dat geaid son lea vuoitán alccesis,

mannet su ovdal.

12 Sii gohčoduvvojit Bassi álbmogin,

Olmmožin geaid Hearrá lea lonistan,

ja du namma lea Áibbašuvvon gávpot,

Gávpot mii ii guđđojuvvo.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.