Ukraina flaggRedder Bibelen liv i Ukraina?
Finn ut mer
Gå til forsiden

Jesaja

65

Hearrá ráŋggášta ja árpmiha

1 Mun ledjen jearranmuttus daidda

geat eai jearran mu,

mun ledjen gávdnanmuttus daidda

geat eai ohcan mu.

Mun lean cealkán dán álbmogii

mii ii leat rávkan mu nama:

“Dás mun lean, dás mun lean!”

2 Beaivvis beaivái

mun lean geaigguhan gieđaid

dán nággáris álbmoga beallái

mii vádjola bahás geainnu

ja čuovvu iežas áigumušaid,

3 álbmogii mii álo moaráhuhttá mu,

mii aitto mu muođuid ovddas

oaffaruššá gilvvagárddiin

ja cahkkeha oaffardola diilaáltáriid ala.

4 Sii orrot hávddiin

ja idjadit suollemas sajiin,

borret spiinnebierggu

ja vuššet lihtiineaset

buhtismeahttun bierggu.

5 Sii dadjet: “Ale boađe lahka,

ale guoskka munnje!

Mun lean dutnje bassi.”

Dakkár olbmot leat

dego suovva mu njunnái,

nugo dolla mii buollá geažos beaivái.

6 Dát lea čállojuvvon mu ovdii,

mun in jaskkot ovdal go lean

mávssahan sidjiide

7 sin suttuid ja sin áhčiid suttuid,

cealká Hearrá.

Sii leat cahkkehan oaffardola váriide

ja hiddjidan mu dieváin.

Dál sii gártet máksit dan

maid leat dahkan,

fargga mávssaheapmi deaivida sin.


8 Ná cealká Hearrá:

Nu guhká go viidnemurjjiin lea sáhppi,

de daddjojuvvo: “Ale bálkes daid,

dain lea ain juoga buorre.”

Seammá láhkái mun dagan

bálvaleddjiidasan,

mun in hilggo sin buohkaid.

9 Mun divttán Jakobis boahtit náli,

Judas iežan váriid árbejeaddji.

Olbmot geaid mun lean válljen,

besset oamastit eatnama,

mu bálvaleaddjit ožžot ássat das.

10 Saron šaddá sávzzaid guohtumin

ja Akorleahki stuorraomiid livvasadjin.

Datnai leat mu álbmoga eanan,

álbmoga mii ohcá mu.

11 Muhto dii geat lehpet hilgon Hearrá

ja vajáldahttán mu bassi vári,

dii geat lágideiddet beavddi Gadii

ja seaguheiddet viinni Menii,

12 din mun attán miehkkái,

dii šaddabehtet buohkat

sodjalahttit čippiid ja goddojuvvot.

Munhan rávken,

muhto dii ehpet vástidan,

mun sárdnon,

muhto dii ehpet guldalan.

Dii dagaidet dan mii lei bahá mu čalmmiin,

válljiidet álo dan mii lei mu dáhtu vuostá.

13 Dan dihte cealká Hearrá Ipmil ná:

Mu bálvaleaddjit besset borrat,

muhto dii nealgubehtet,

mu bálvaleaddjit besset juhkat,

muhto dii goikabehtet,

mu bálvaleaddjit besset illudit,

muhto dii heahpanehpet,

14 mu bálvaleaddjit besset ávvudit

lihkolažžan,

muhto dii bárgubehtet morrašis

ja luoibmabehtet heađis.

15 Din nama atnet garuhussan

olbmot geaid mun lean válljen:

“Vare Hearrá Ipmil divttášii du jápmit!”

Muhto mu bálvaleaddjit ožžot

ođđa nama,

16 ja dat gii dáhttu buressivdnádusa

dán eatnamis,

oažžu buressivdnádusa

oskkáldas Ipmila nammii,

ja dat gii vuordnu vuordnása

dán eatnamis,

vuordnu dan oskkáldas Ipmila nammii.

Ovdalaš áŧestusat leat vajálduvvan,

dat eai leat šat oaidnimis gostege.

Ođđa albmi ja ođđa eanan

17 Geahča, mun sivdnidan

ođđa almmi ja ođđa eatnama.

Ovdalaš dáhpáhusat eai šat muitojuvvo,

dat eai šat badján millii.

18 Illudehket ja ávvudehket

agálaš áigái das maid mun sivdnidan!

Illun mun sivdnidan Jerusalema

ja ávvun dan álbmoga.

19 Ja mun illudan Jerusalema dihte

ja ávvudan iežan álbmogis.

Ii gullo doppe šat čierrun iige bárgun,

20 eai jáme doppe šat

njammimánát, ii oktage,

ii jáme šat vuoras

ovdal go lea olahan beivviidis mihtu.

Nuorra lea dat gii jápmá čuođijahkásažžan,

dat gii ii olat čuođi jagi,

adnojuvvo garuhuvvon olmmožin.

21 Sii huksejit viesuid ja ásset dain,

sii gilvet viidnegárddiid

ja borret daid šaddosiid.

22 Eai sii hukse vai earát besset ássat,

eaige sii gilvve vai earát besset borrat.

Buohkat mu álbmogis

šaddet boarisin dego muorat,

olbmot geaid lean válljen

besset návddašit bargguset šaddosiid.

23 Eai sii bargga duššás

eaige riegádahte mánáid

fáhkkes jápmima várás.

Dasgo sii leat sohka

maid Hearrá lea buressivdnidan,

ja sin nálli orru sin luhtte.

24 Ovdal go sii čurvot, de mun vástidan,

go sii leat ain sárdnumin,

de mun gulan.

25 Gumpe ja láppis guhtot ovttas,

ledjon borrá suinniid nugo vuoksá,

ja gearbmaša biebmu lea muolda.

Ii oktage daga baháid iige veriid

gostege mu bassi váris,

cealká Hearrá.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.