Stor bibelmangel i Venezuela
Gi sammenEn Bibel koster 49 kroner
Gå til forsiden

Jeremia

17

Juda suddu

1 Juda suddu lea čállojuvvon ruovdečálániin,

gohppojuvvon diamántagežiin

sin váimmu távvalii

ja sin áltáriid čorvviide

2 duođaštussan sin vuostá.

Sin áltárat ja ašeračuolddat

čužžot rudnes muoraid luhtte,

alla dieváin

3 ja várreeatnamiin.

Mun attán stajideddjiid gihtii

buot du dávviriid ja riggodagaid

daid suttuid dihte maid leat dahkan

juohke sajis iežat eatnamis.

4 Don fertet luohpat dan árbbis

maid mun adden dutnje,

ja mun bijan du bálvalit vašálaččaidat

eatnamis maid don it dovdda.

Don leat cahkkehan mu moari dola,

ja dat buollá agálaš áigái.

Garuhus ja buressivdnádus

5 Ná cealká Hearrá:

Garuhuvvon lea dat olmmái

gii dorvvasta olbmuide,

jámolaš olbmuid fápmui,

olmmái gean váibmu gáidá Hearrás!

6 Son lea dego miestta ávdin meahcis,

son ii goassege oainne lihku boahtimin.

Son ferte eallit guorba meahcis,

sálteeatnamis gos ii oktage ása.

7 Buressivdniduvvon lea dat olmmái

gii luohttá Hearrái

ja dorvvasta sutnje!

8 Son lea dego čáhcegáddái

ceggejuvvon muorra

mii surggiidahttá ruohttasiiddis

ádjaga guvlui.

Ii dat bala go báhkka boahtá,

dan lasttat bissot ruonasin.

Goikádatjagi dat ii heađástuva

iige heaitte šaddadeames šaddosiid.


9 Váibmu lea buot behtoleamos,

dat ii leat buorideames.

Gii dan dovdá?

10 Mun, Hearrá, guorahalan váimmu,

mun dieđán suollemasamus jurdagiidge.

Mun mávssán juohkehažžii dan mielde

mo son vádjola

ja makkárat leat su daguid šaddosat.

11 Dat gii háhká riggodaga vearrivuođain,

lea dego bealdovuonccis

mii lállá moniid mat eai čivgga.

Báris eallinbeivviidis

son šaddá guođđit dan,

ja loahpas son čájeha dušše eaibmin.

Israela doaivu

12 Hearvásvuođa truvdnu,

aliduvvon juo álggu rájes,

lea min bassibáikki sadji.

13 Hearrá, don leat Israela doaivu!

Buohkat geat hilgot du, šaddet heahpadii,

dat geat gáidet dus, heavahuvvojit eatnamis,

dasgo sii leat hilgon Hearrá,

ealli čázi ádjaga.

Profehta rohkadus

14 Buorit mu, Hearrá, de mun buorránan,

beastte mu, de mun bestojuvvon.

Dušše du mun máinnun!

15 Olbmot jerret mus:

“Šaddágo Hearrá sátni maninge?

Man dihte dat ii ollašuva?”

16 Hearrá, don dieđát

ahte mun in leat átnon du vuolggahit bahá

inge sávvan roassobeaivvi.

Donhan dieđát

visot main mun lean sárdnon.

17 Ale šatta munnje suorggahussan!

Don leat mu dorvu lihkuhisvuođa beaivvi.

18 Šaddoset heahpadii

dat geat doarrádallet mu,

muhto ale divtte mu šaddat heahpadii!

Suorganehkoset sii,

muhto ale divtte mu suorganit!

Divtte lihkuhisvuođa beaivvi

boahtit sidjiide,

duššat sin guovttegeardásaš roasuin!

Basuhehket sabbaha

19 Hearrá celkkii munnje: Mana čuožžut Álbmotpoartta gurrii man ráigge Juda gonagasat johtalit olggos sisa, ja buot eará Jerusalema poarttaid gurrii. 20 Daja ná: Gullet Hearrá sáni, Juda gonagasat ja buot Juda ja Jerusalema ássit geat mannabehtet dáid poarttaid čađa! 21 Ná cealká Hearrá: Jos dii ráhkistehpet eallima, de váruhehket guoddimis noađi sabbatbeaivvi ja buktimis dan sisa Jerusalema poarttaid čađa! 22 Allet doalvvo sabbatbeaivvi maidege olggos viesuineattet, alletge bargga maidege. Basuhehket sabbatbeaivvi, nugo mun gohččon din áhčiid dahkat. 23 Muhto din áhčit eai gullan mu eaige bivdán bealjige. Sii ledje nággárat, sii eai gullan eaige jeagadan mu eaige váldán vuostá bagadusa. 24 Jos dii dál gullabehtet mu, cealká Hearrá, jos ehpet buvtte maidege nođiid sisa dán gávpoga poarttaid čađa sabbatbeaivvi, muhto basuhehpet sabbatbeaivvi ehpetge bargga maidege, 25 de dalle gonagasat geat čohkkájit Davida truvnnus ja geat vudjet heasttaiguin ja vovnnaiguin, bohtet sisa dáid poarttaid čađa, sii ja sin oaivámuččat. Maiddái Juda ja Jerusalema ássit bohtet, ja dán gávpogis ásset olbmot agálaš áigái. 26 Olbmot bohtet Juda gávpogiin ja Jerusalema guovlluin, Benjamina eatnamis, Šefelas, várreeatnamis ja Negevis ja buktet boaldinoaffariid, njuovvanoaffariid, borramušoaffariid ja suovvasiid ja oaffaruššet giittusoaffara Hearrá viesus. 27 Muhto jos dii ehpet gula mu ehpetge basut sabbatbeaivvi, muhto guoddibehtet nođiid ja johtalehpet Jerusalema poarttaid čađa sabbatbeaivvi, de mun buollahan dan poarttaid. Dolla duššada Jerusalema ladniid iige leat čáskadeames.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.