Ukraina flaggRedder Bibelen liv i Ukraina?
Finn ut mer
Gå til forsiden

Jeremia

18

Jeremia láirálihttedahkki viesus

1 Jeremiai bođii dát Hearrá sátni: 2 Mana láirálihttedahkki vissui! Doppe mun attán du gullat sániidan.

3 Mun mannen láirálihttedahkki vissui, gos son lei bargamin láiráskearrus luhtte. 4 Jos lihtti maid son lei dahkamin billašuvai su gieđas, de son hábmii láirrás eará lihti, dakkára maid dáhtui.

5 De munnje bođii dát Hearrá sátni: 6 Ingo mun, Hearrá, sáhte dahkat dutnje, Israela álbmot, nugo láirálihttedahkki láirásis? Dego láirá lea láirálihttedahkki gieđas, nu don, Israela álbmot, leat mu gieđas. 7 Mun sáhtán áitit gáikut, njeaidit ja duššadit álbmoga ja riikka. 8 Muhto jos dat álbmot jorgala bahávuođastis, de mun gáđan dan bahá maid ledjen áigon dahkat dasa. 9 Mun sáhtán maid lohpidit hukset ja cegget álbmoga ja riikka. 10 Muhto jos dát álbmot dahká bahá iige gula mu jiena, dalle mun gáđan dan buori maid ledjen áigon dahkat dasa.

11 Daja dál Juda ja Jerusalema ássiide: Ná cealká Hearrá: Mun hutkkan din vuostá ráđi, mun ráhkadan didjiide oasehisvuođa. Jorgalehket nappo buohkat bahás geainnuineattet, dahket buriid ja ellet riekta! 12 Muhto sii vástidit: “Ii dat ávkkut. Mii dahkat nugo ieža dáhttut! Juohkehaš mis vádjola iežas buššon váimmu mielde.”

Ipmil dubme Israela

13 Dan dihte Hearrá cealká ná:

Jerret buot álbmogiin:

Leago oktage gullan dákkáriid?

Nieida Israel lea dahkan

hirbmatlaš daguid!

14 Jávkágo muohta goassege

Libanona alla váriin?

Goikkiiditgo goassege galbma čázit

mat golget guhkkin?

15 Muhto mu iežan álbmot

lea vajáldahttán mu

ja boaldá suovvasiid duššálaš ipmiliidda

mat leat guossalahttán dan

dan boares geainnuin,

čádjidahttán dan ráhkatkeahtes bálgáide.

16 Dat dahká iežas eatnama ávdimin,

agálaš bilkádussan.

Juohkehaš gii manná dan meaddel,

soaigá ja bárdá oaivvi.

17 Nuortabiekka láhkái mun biđgen

iežan álbmoga vašálačča ovddas.

Niehki, in muođuid,

mun jorgalan sidjiide sin heahtebeaivvi.

Jeremia sávvá mávssaheami

18 Muhto sii dadje: “Bohtet, hutkot bahás juonaid Jeremia vuostá! Iihan bagadus leat gáidan báhpas, ii ráđđi viisás iige sátni profehtas. Cábmot su iežamet sániiguin allotge beroš das maid son sárdnu!”


19 Hearrá, gula mu!

Guldal, maid mu vuostálastit sárdnot!

20 Manne buorre mávssahuvvo baháin?

Sii leat roggan hávddi munnje.

Muitte, mo mun du muođuid ovddas

lean sárdnon buori sin ovddas,

vai beasan jorgalahttit du moari sis eret.

21 Dan dihte atte sin mánáid nealgut jámas,

ja atte sin miehki háldui!

Divtte sin áhkáid šaddat

mánáheapmin ja leaskan!

Divtte rohttudávdda goddit sin olbmáid,

divtte sin nuorra olbmáid

gottáhallat miehkkái!

22 Vare sin viesuin gullošii bárgun,

go don fáhkka divttát rievvárboavjji

fallehit sin.

Sii leat goivon rokki vai besset dohppet mu,

čiehkan gielaid mu julggiid ovdii.

23 Muhto don, Hearrá,

dovddat buot sin áigumušaid,

ahte sii áigot goddit mu.

Ale atte ándagassii sin vearredagu,

ale vajálduhte sin suttu,

nu ahte sii nordasit du ovdii.

Časkke sin eatnamii moarát beaivvi!

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.