Ukraina flaggRedder Bibelen liv i Ukraina?
Finn ut mer
Gå til forsiden

Jeremia

21

Nebukadnesar birastahttá Jerusalema

1 Gonagas Sidkia vuolggahii Jeremia lusa Pašhura, Malkia bártni, ja báhppa Sefanja, Maaseja bártni. Soai buvttiiga gonagasas sáni: 2 “Oza ráđi Hearrás min ovddas, dasgo Babylona gonagas Nebukadnesar soahtá minguin. Vare Hearrá dagašii oavdudagu nugo dávjá lea dahkan, vai vašálaš geassáda.” 3 Jeremia gohčui dadjat Sidkiai: 4 Ná cealká Hearrá, Israela Ipmil: Mun jorgalan din iežadet vuostá daid soahtevearjjuid maiguin dii soahtabehtet Babylona gonagasain ja kaldealaččaiguin geat birastahttet din. Mun buvttán soađi muvrraid olggobealde guovdu gávpoga. 5 Mun ieš soađan dinguin geigejuvvon ja gievrras gieđain moaris, suhtus ja stuorra vašáskemiin. 6 Mun časkkán rohttudávddain dán gávpoga ássiid, sihke olbmuid ja omiid. 7 Ja das maŋŋil, cealká Hearrá, mun attán Sidkia, Juda gonagasa, su bálvaleddjiid ja álbmoga, daid geat vel leat báhcán dán gávpogii rohttudávddas, miehkis ja nealggis, Babylona gonagasa Nebukadnesara gihtii, sin vašálaččaid gihtii ja daid gihtii geat bivdet sin heakka. Son goddá sin miehki ávjjuin; ii son árpmit, ii seastte iige ane váibmoláđisvuođa. 8 Gulat dán álbmogii: Ná cealká Hearrá: Mun divttán din válljet eallima dahje jápmima. 9 Gii báhcá dán gávpogii, dat jápmá miehkkái, nealgái ja rohttudávdii. Muhto gii vuolgá gávpogis ja searvá kaldealaččaiguin geat birastahttet din, dat oažžu eallit ja gádju heakkas. 10 Mun lean mearridan buktit dán gávpogii lihkuhisvuođa, mun in šat veahket dan, cealká Hearrá. Gávpot addojuvvo Babylona gonagasa gihtii, ja son boaldá dan.

Gonagasa ja álbmoga duopmu

11 Cealkke Juda gonagasvissui:

Gula Hearrá sáni,

12 Davida viessu!

Ná cealká Hearrá:

Dubmejehket vuoigatlaččat juohke iđida,

gádjot stajiduvvon olbmo soardi gieđas,

vai mu moarri ii cahkkáše

ja buoláše dego dolla,

geange čáskatkeahttá.

Nu dáhpáhuvvá din bahás daguid dihte.

13 Mun fallehan du, Jerusalem,

du gii ráđđet leagi dego dronnet

ja badjánat jalgadasa badjel nugo bákti.

Don dajat: “Gii sáhttá fallehit min

ja bahkket min viesuide?”

14 Mun ráŋggáštan din,

dan dii lehpet ánssášan daguideattetguin,

cealká Hearrá.

Mun buolláhan gávpoga vuovddi,

ja dolla loaktá buot.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.