Ukraina flaggRedder Bibelen liv i Ukraina?
Finn ut mer
Gå til forsiden

Jeremia

23

Hearrá čuoččáldahttá ođđa báimmaniid

1 Vuoi daid báimmaniid geat duššadit ja biđgejit ealu maid mun guođohan! cealká Hearrá. 2 Dan dihte cealká Hearrá, Israela Ipmil, daid báimmaniid birra geat gehččet mu álbmoga: Dii lehpet biđgen mu sávzzaid ja ádján daid eret ehpetge leat atnán dain fuola. Dál mungis anán fuola dis: Mun ozahalan din din bahás daguid dihte. 3 De mun ieš čohkken sávzzaidan bázahasa buot dain eatnamiin maidda lean vuojehan daid, ja mun buvttán daid ruoktot daid guohtuneatnamiidda, ja doppe dat šaddet šattolažžan ja eatnánit. 4 Mun čuoččáldahtán daidda báimmaniid, ja dat gehččet daid. Eai dat šat bala eaige suorgan, iige dain váillo oktage, cealká Hearrá. 5 Beaivvit bohtet, cealká Hearrá, go mun čuoččáldahtán Davidii vanhurskkis vesá. Son lea gonagas gii ráđđe viisát ja háhká eatnamii rievtti ja vuoigatlašvuođa. 6 Su beivviid Juda bestojuvvo ja Israel ássá oadjebassan. Ja dáinna namain son gohčoduvvo: Hearrá, min vanhurskkisvuohta. 7 Beaivvit bohtet, cealká Hearrá, go ii šat celkojuvvo: “Nu duohta go Hearrá eallá, son guhte buvttii israellaččaid Egyptas”, 8 muhto “Nu duohta go Hearrá eallá, son guhte buvttii Israela náli ruoktot davvieatnamis ja buot eatnamiin maidda son lei ádján sin. Dalle sii besset fas ássat iežaset eatnamis.”

Vearreprofehtat

9 Jeremia sánit profehtaide.

Mu váibmu lea cuovkanan rattistan,

buot mu dávttit doarggistit.

Hearrá dihte,

su bassi sániid geažil

mun lean dego gárrenolmmoš,

nugo olmmái gean viidni lea vuoitán.

10 Eatnama dievva leat náittosrihkkut.

Eanan guorbá garuhusa dihte,

meahci guohtuneatnamat goiket.

Olbmot doarridit bahá,

vearrivuohta lea sin fápmu.

11 Sihke báhpat ja profehtat

leat ipmilmeahttumat,

velá iežan viesusge

mun ferten geahččat sin bahávuođa,

cealká Hearrá.

12 Sin geaidnu šaddá sidjiide

njaláhas, sevdnjes bálggisin.

Sii njaláhastet ja ravget,

dasgo mun buvttán sidjiide lihkuhisvuođa

dan jagi go mun ozahalan sin, cealká Hearrá.

13 Samaria profehtaid mun oidnen

dahkamin fasttes daguid.

Sii profehtastalle Baala nammii

ja čádjidahtte mu álbmoga Israela.

14 Muhto Jerusalema profehtaid dagut

leat gáfatlaččat.

Sii rihkkot náittosdili ja gielistit,

sii dorjot vearredahkkiid,

nu ahte ii oktage dáhto

jorgalit bahávuođastis.

Dat leat buohkat mu čalmmiin

dego Sodoma,

ja Jerusalema ássit nugo Gomorra olbmot.

15 Danne cealká Hearrá,

Almmiveagaid Ipmil, dáid profehtaid birra:

Mun attán sidjiide márona borrat

ja mirkkočázi juhkat,

dasgo Jerusalema profehtain

ipmilmeahttunvuohta lea leavvan

miehtá eatnama.

16 Ná cealká Hearrá, Almmiveagaid Ipmil: Allet guldal daid profehtaid, allet daid sániid maid sii gulahit. Sii fillejit din! Sii sárdnot iežaset váimmu oainnáhusaid, eai mu sániid. 17 Sii dadjet daidda geat badjelgehččet mu: “Hearrá cealká: Dii oažžubehtet eallit ráfis.” Daidda geat vádjolit iežaset buššon váimmu mielde, sii dadjet: “Ii din deaivit lihkuhisvuohta.” 18 Guhtemuš sis lei mu, Hearrá, ráđđádallamiin? Guhtemuš sis oinnii ja gulai maid mun ledjen áigumin? Gii guldalii mu sáni ja jeagadii dan?


19 Gehččet Hearrá ramádaga!

Moarri badjána, jorribiegga riđđuda

ipmilmeahttumiid oaivvi badjel.

20 Hearrá moarri ii soaččo,

ovdal go son lea doaimmahan

ja ollašuhttán váimmus áigumušaid.

Boahtti beivviid dii ipmirdehpet

dan ollásit.


21 Mun in leat vuolggahan profehtaid,

ja dattetge sii vihket;

mun in leat sárdnon sidjiide,

ja dattetge sii profehtastallet.

22 Muhto jos sii livčče leamaš

mu ráđđádallamiin,

de sii gulahivčče mu

mearrádusa álbmogasan

ja jorgalahtášedje dan vearregeainnus

ja bahás daguin.

23 Leango mun Ipmil

gean váldi ollá dušše lahkasiidda?

Iigo maiddái guhkás? cealká Hearrá.

24 Máhttágo oktage čiehkádit nu čihkosii

ahte mun in oainnáše su? cealká Hearrá.

Almma mun deavddán almmi ja eatnama?

cealká Hearrá.

25 Mun lean gullan maid dadjet profehtat geat profehtastallet giellásiid mu nammii. Sii dadjet: “Mun lean niegadan niegu, mun lean niegadan niegu!” 26 Man guhká dát profehtat áigot profehtastallat giellásiid ja behtolaš govahallamiid? 27 Nieguideasetguin maid sii muitalit guhtet guimmiidasaset, sii vigget oažžut mu álbmoga vajáldahttit mu, nugo sin áhčit vajáldahtte mu ja bálvališgohte Baala. 28 Profehta gii lea niegadan niegu, galgá muitalit iežas niegu. Muhto dat geasa mun lean sárdnon, galgá sárdnut mu sáni duođalaččat. Mii oalggain lea dahkamuššan gortniid seahká? cealká Hearrá.

29 Almma mu sátni lea dego dolla, nugo veahčir mii cuvke bávttiid? cealká Hearrá. 30 Dan dihte mun fallehan profehtaid geat suoládit sániid guhtet guimmiineaset ja gulahit daid mu sátnin, cealká Hearrá. 31 Mun fallehan profehtaid geat muitalit iežaset einnostusaid, muhto dadjet: Dát lea Hearrá sátni. 32 Mun fallehan daid geat profehtastallet iežaset gielisnieguid, cealká Hearrá. Sii čádjidahttet mu álbmoga giellásiiddisetguin ja rámiineaset, vaikko mun in leat vuolggahan inge gohččon sin. Sii eai leat eisege ávkin dán álbmogii, cealká Hearrá.

Hearrá noađđi

33 Go dát álbmot dahje profehta dahje báhppa, jearrá: “Man sáni Hearrá dál lea bidjan midjiide noađđin?” de vástit sidjiide: “Dii ieža lehpet šaddan munnje noađđin, ja mun suhppen din eret!” cealká Hearrá. 34 Jos báhppa, profehta dahje muhtin álbmogis gohčoda mu sáni “Hearrá noađđin”, de mun ozahalan su ja su bearraša. 35 Go dii sártnodehpet guhtet guimmiineattet, de jearahehket baicce ná: “Maid Hearrá lea vástidan?” dahje “Maid Hearrá cealká?” 36 Muhto allet šat jeara: “Mii lea Hearrá noađđi?” Danin go juohkehažžii gii dadjá ná, su iežas sátni šaddá noađđin. Dii botnjabehtet ealli Ipmila, Almmiveagaid Ipmila, min Ipmila sániid. 37 Dii galgabehtet jearrat profehtain ná: “Maid Hearrá lea vástidan dutnje?” dahje “Maid Hearrá cealká?” 38 Muhto jos dii ain dadjabehtet “Hearrá noađđi”, de Hearrá cealká: Danne go dii dadjabehtet “Hearrá noađđi”, vaikko mun gilden din sárdnumis nu, 39 de mun áiggun ollásit vajáldahttit din ja suhppet din muođuidan ovddas, din ja dán gávpoga maid mun adden didjiide ja din áhčiide. 40 Mun bijan din badjelii agálaš hiddjádusa ja heahpada mii ii vajálduva goassege.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.