Ukraina flaggRedder Bibelen liv i Ukraina?
Finn ut mer
Gå til forsiden

Jeremia

40

Jeremia orru eatnamis

1 Dát lea muitalus das maid Hearrá divttii dáhpáhuvvat Jeremiai das maŋŋil go heaggafávttaid oaivámuš Nebusaradan lei luoitán su friddjan Ramas. Jeremia lei leamaš čadnojuvvon láhkkiiguin daid fáŋggaid gaskkas geat ledje váldojuvvon gitta Jerusalemis ja Judas ja galge dolvojuvvot Babylonii.

2 Go heaggafávttaid oaivámuš lei vieččahan Jeremia, de son dajai sutnje: “Hearrá, du Ipmil, áittii lihkuhisvuođain dán báikki. 3 Hearrá ollašuhtii dan ja dagai nugo lei cealkán, danin go dii leiddet suddudan Hearrá vuostá ehpetge lean gullan su. Dan dihte dát lea dáhpáhuvvan didjiide. 4 Odne mun čoavddán du gieđaid láhkkiin. Jos don anát buorrin boahtit mu fárus Babylonii, de boađe, ja mun anán dus fuola. Muhto jos don it dáhto vuolgit mu fárus Babylonii, de ale vuolgge. Oppa eanan lea dutnje rabas, mana dan báikái maid anát buoremussan.” 5 Go Jeremia vel guovttádasttii, de Nebusaradan dajai sutnje: “Máhca Gedalja, Ahikama bártni, Šafana áddjuba, lusa. Babylona gonagas lea bidjan su Juda gávpogiid oaivámužžan. Oro su luhtte álbmoga gaskkas dahje mana gosa ihkinassii anát vuoigadin mannat.” Ja de heaggafávttaid oaivámuš attii sutnje niestti ja skeaŋkkaid ja luittii su mannat. 6 Jeremia manai Gedalja, Ahikama bártni, lusa Mispai ja orui su luhtte álbmoga gaskkas mii lei báhcán eatnamii.

Gedalja Juda oaivámužžan

7 Buot soahteveaga oaivámuččat ja sin olbmát geat čiehkádalle dálonguovllus, gulle ahte Babylona gonagas lei bidjan Gedalja, Ahikama bártni, Juda oaivámužžan ja guođđán su háldui olbmáid, nissoniid, mánáid ja eatnama geafimusaid geat eai lean dolvojuvvon fáŋgavuhtii Babylonii. 8 Dalle oaivámuččat oktan olbmáidisguin bohte Gedalja lusa Mispai. Sii ledje Ismael, Netanja bárdni, Johanan ja Jonatan, Kareaha bártnit, Seraja, Tanhumeta bárdni, netofalaš Efaja bártnit ja Jesanja gii lei eret Maakas. 9 Gedalja, Ahikama bárdni, Šafana áddjut, vuortnui sidjiide ja sin olbmáide: “Allet bala bálvaleames kaldealaččaid! Orrot eatnamis ja bálvalehket Babylona gonagasa, de didjiide geavvá bures. 10 Mun ieš áiggun orrut Mispas ja bálvalit kaldealaččaid geat bohtet min lusa. Čogget viidnemurjjiid, šaddosiid ja oliivvaid, rádjet daid ja orrot dain gávpogiin maid lehpet váldán.” 11 Eatnat Juda olbmot ledje báhtaran Moabii, Ammonii, Edomii ja eará riikkaide. Go sii gulle ahte Babylona gonagas lei guođđán Judai álbmotbázahasa ja bidjan Gedalja, Ahikama bártni, Šafana áddjuba, sin oaivámužžan, 12 de sii máhcce Judai dain báikkiin gosa ledje báhtaran, ja bohte Gedalja lusa Mispai. Dan jagi sii čogge valjis viidnemurjjiid ja šaddosiid.

Gedalja goddojuvvo

13 Johanan, Kareaha bárdni, ja buot soahteveaga oaivámuččat geat ledje čiehkádallan dálonguovlluin ja boahtán Gedalja lusa Mispai, 14 dadje Gedaljai: “Dieđátgo don ahte Baalis, ammonlaččaid gonagas, lea vuolggahan Ismaela, Netanja bártni, goddit du?” Muhto Gedalja, Ahikama bárdni, ii jáhkkán sidjiide. 15 De Johanan, Kareaha bárdni, dajai suollemasat Gedaljai Mispas: “Divtte mu goddit Ismaela, Netanja bártni. Ii oktage boađe diehtit dan. Manne son oččošii goddit du? Dallehan buot Juda ássit geat leat čoagganan du lusa, bieđganivčče fas ja Juda bázahas duššašii.” 16 Muhto Gedalja, Ahikama bárdni, dajai Johananii, Kareaha bárdnái: “Ale daga dan, dasgo don sárdnut giellásiid Ismaela birra.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.