Stor bibelmangel i Venezuela
Gi sammenEn Bibel koster 49 kroner
Gå til forsiden

Jeremia

5

Hearrá dubme iežas álbmoga

1 Vázzet Jerusalema gáhtaid,

gehččet ja jearahehket,

dárkojehket olbmuid dan márkanšiljuin.

Jos gávdnabehtet ovttage gii dahká riekta

ja ohcá duohtavuođa,

de mun attán ándagassii dán gávpogii.

2 Sii dadjet: “Nu duohta go Hearrá eallá”,

ja dattetge sii vurdnot vearrut.

3 Hearrá, du čalmmit

dáhttot oaidnit vuoiggalašvuođa.

Don leat cábmán sin,

muhto sii eai dovdan bákčasa.

Don leat measta duššadan sin,

muhto sii eai dáhtton

váldit vuostá bagadusa.

Sii leat biehttalan jorgaleames

ja leat dahkan iežaset bávtti garraseabbon.

4 Mun jurddašin:

Sii leat oktageardánis olbmot,

sii leat meannudan jierpmeheamit,

sii eai dovdda Hearrá geainnu,

eai dovdda Ipmileaset dáhtu.

5 Mun manan stuorráid lusa

ja sártnun singuin,

sii dovdet Hearrá geainnu,

Ipmileaset dáhtu.

Muhto sii buohkat leat doadján geassáideaset

ja botken čanastagaideaset.

6 Dan dihte vuovddi ledjon falleha sin,

dan dihte ávdin eatnama gumpe speadjá sin;

leopárda vuođgŋá sin gávpogiid guorain.

Juohkehaš gii manná poarttas, gaikkoduvvo.

Eatnagat leat sin rihkkosat,

eatnat gerddiid sii leat jorralan.

7 Manne mun attášin dutnje ándagassii?

Du bártnit leat hilgon mu

ja vurdnon ipmiliid bokte

mat eai leat ipmilat.

Mun gallehin sin,

muhto sii ledje oskkáldasmeahttumat,

čoagganedje fuorrávissui.

8 Sii leat dego bures bibmojuvvon

rahkki oret,

juohkehaš šnjirggáhallá

siidaguoimmis eamidii.

9 Ingo mun ráŋggáštivčče dákkár daguid,

cealká Hearrá,

ingo mun mávssahivčče

dákkár álbmogii?


10 Gorgŋot viidnegárdelovttaide

ja duššadehket daid,

muhto allet loahpat daid áibbas!

Gaikot viidnemuoraid ovssiid,

dasgo dat eai gula Hearrái.

11 Israel ja Juda leat beahttán mu,

cealká Hearrá.

12 Dat leat biehttalan Hearrá ja dadjan:

“Son ii daga maidege,

lihkuhisvuohta ii deaivit min,

ii min áitte miehkki iige nealgi.

13 Profehtat leat dušše biegga,

ii sis leat Hearrá sátni.”

14 Dan dihte cealká Hearrá,

Almmiveagaid Ipmil:

Danne go dii sárdnubehtet diekkáriid,

de mu sánit maid mun adden du njálbmái

rivdet dollan.

Ja dán álbmoga mun dagan muorran,

ja dolla loaktá dan.

15 Israellaččat, mun buvttán din vuostá

guhkilmas álbmoga,

cealká Hearrá.

Dat lea fámolaš álbmot

mii lea leamaš dološ áiggiid rájes,

álbmot man giela don it dovdda,

man ságaid don it ádde.

16 Sin njuollaskuohput leat

dego rabas hávddit,

veagalaš soahteolbmát sii leat buohkat.

17 Sii borret du šattu ja láibbi,

sii borret du bártniid ja nieiddaid,

sii borret du smávvaomiid ja stuorraomiid,

sii borret du viidnemuoraid

ja fiikonmuoraid.

Mihkiin sii duššadit du ladnegávpogiid

maidda don luohtát.


18 Muhto daid beivviidge mun in duššat din áibbas, cealká Hearrá. 19 Ja go olbmot jerret dus: “Manne Hearrá, min Ipmil, lea dahkan buot dán midjiide?” de vástit: “Nugo dii hilgguidet Hearrá ja bálvaleiddet vieris ipmiliid din iežadet eatnamis, nu dii dál šaddabehtet bálvalit vieris álbmoga eatnamis mii ii leat din.”


20 Almmuhehket dán Jakoba sohkii,

gulahehket ná Judas:

21 Gula dán, don jierpmehis

ja dáidemeahttun álbmot!

Dis leat čalmmit, muhto ehpet dii oainne,

dis leat bealjit, muhto ehpet dii gula.

22 Ehpetgo dii bala mus,

cealká Hearrá,

ehpetgo dii doarggis mu muođuid ovddas?

Mun lean bidjan sáttogátti rádján merrii,

agálaš caggin man badjel dat ii beasa.

Vaikko bárut boršot,

de dat eai veaje maidege,

vaikko dat márret,

de dat eai ole badjel rájá.

23 Muhto dán álbmogis lea gážžáris

ja ceaggás váibmu.

Sii buohkat leat gáidan mus ja mannan eret.

24 Eai sii daja váimmusteaset:

“Ballot Hearrás, Ipmilisttámet!

Son addá arvvi rivttes áigái,

sihke čakčaarvvi ja giđđaarvvi,

ja diktá min ládjudit dihto vahkuid.”

25 Din vearredagut leat earáhuhttán

visot dán,

din suttut leat caggan dis buot buori.

26 Dasgo mu álbmogis

leat ipmilmeahttun olbmot.

Sii njágadit dego loddebivdit,

bidjet gielaid ja darvehit olbmuid.

27 Nugo veaddelihtis leat dievva lottit,

nu lea sin viesuid dievva behtolašvuohta.

Dan dihte sii leat šaddan

stuorisin ja rikkisin,

28 buoidin ja šealgájeaddjin.

Sin bahás sániin ii leat mearri.

Sii eai dubme rievttuid áhčihemiid áššis

nu ahte dan ovddidivčče,

eaige sii hága váivvášiidda rievtti.

29 Ingo mun ráŋggáštivčče dákkár daguid,

cealká Hearrá,

ingo mun mávssahivčče dákkár álbmogii?

30 Hirbmatlaš ja gáfatlaš dagut

dáhpáhuvvet eatnamis.

31 Profehtat profehtastallet giellásiid,

báhpat ráđđejit sin rávvagiid mielde,

ja nu mu álbmot dáhttu dan leat.

Muhto maid dii dahkabehtet

go dan loahppa boahtá?

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.