Iran: Kristne ønsker nytestamenter
Gi sammenEt NT koster 33 kroner
Gå til forsiden

Jeremia

1 

1 Jeremia, Hilkia bártni, sánit. Jeremia lei okta dain báhpain geat ledje eret Anatotis, Benjamina eatnamis. 2 Hearrá sátni bođii sutnje Juda gonagasa Jošia, Amona bártni, golbmanuppelogát ráđđenjagi 3 ja dan áiggi go Jojakim, Jošia bárdni, lei Juda gonagas ja gitta gonagas Sidkia, Jošia bártni, oktanuppelogát ráđđenjagi lohppii. Dan jagi viđát mánus Jerusalema álbmot dolvojuvvui fáŋgavuhtii.

Ipmil rávká Jeremia profehtan

4 Hearrá sátni bođii munnje:

5 Juo ovdal go mun hábmejin du

eatni heggii,

de mun dovden du.

Juo ovdal go don riegádit,

de mun basuhin du;

mun bidjen du álbmogiid profehtan.

6 Muhto mun dadjen: “Vuoi, Hearrá, Ipmilan, mun in máhte sárdnut; mun lean nu nuorra!” 7 Dalle Hearrá celkkii munnje:

Ale daja ahte don leat nuorra,

muhto mana gosa mun vuolggahan du,

ja sártno buot maid mun gohčun du sárdnut.

8 Ale bala ovttasge,

dasgo mun lean duinna ja gájun du,

cealká Hearrá.

9 De Hearrá geigii gieđa, guoskkahii mu njálmmi ja celkkii munnje:

“Geahča, mun bijan sániidan du njálbmái.

10 Mun bijan du odne

álbmogiid ja riikkaid badjel

gaikut ja njeaidit,

duššadit ja cuvket,

hukset ja gilvit.”

Guokte oainnáhusa

11 Hearrá sátni bođii munnje: “Maid don oainnát, Jeremia?” Mun vástidin: “Mun oainnán mandelmuora oavssi.” 12 Hearrá celkkii: “Don oidnet riekta, mun áiggun gozihit ahte mu sátni ollašuvvá.”

13 Hearrá sátni bođii munnje nuppádassii: “Maid don oainnát?” Mun vástidin: “Mun oainnán duoldi ruittu davvin, dat lea állut deike guvlui.” 14 Hearrá celkkii munnje:

“Davil boahtá oasehisvuohta

buot dán eatnama ássiide.

15 Geahča, mun rávkkan

buot davviguovllu riikkaid álbmogiid,

cealká Hearrá.

Sii bohtet ja ceggejit iešguhtege truvnnu

Jerusalema poarttaid ovdii,

gávpoga muvrraid birra

ja buot Juda gávpogiid birra.

16 Mun cealkkán álbmogasan duomu

buot sin bahávuođa dihte,

danne go sii hilgo mu.

Sii bolde oaffardola eará ipmiliidda

ja rohkadalle ipmilgovaid

maid ieža leat duddjon.


17 Muhto don galggat

boahkánastit alimiiddát,

čuožžilit ja sárdnut sidjiide

buot maid mun gohčun du sárdnut.

Ale bala sis,

aman mun baldit du sin ovddas.

18 Geahča, mun dagan du odne

ladnegávpogin,

ruovdebázzin ja bronsamuvran

oppa eatnama vuostá,

Juda gonagasaid ja oaivámuččaid vuostá,

eatnama báhpaid ja álbmoga vuostá.

19 Sii sohtet du vuostá,

muhto eai biđe dus,

dasgo mun lean duinna,

cealká Hearrá,

ja mun gájun du.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.