Ukraina flaggRedder Bibelen liv i Ukraina?
Finn ut mer
Gå til forsiden

Johannesa evangelium

2

Heajat Kanas

1 Vahku goalmmát beaivvi dollojuvvojedje heajat Kanas Galileas. Jesusa eadni lei doppe, 2 ja maiddái Jesus ja su máhttájeaddjit ledje bovdejuvvon heajaide. 3 De váilugođii viidni, ja eadni dajai Jesusii: “Sis ii leat viidni.” 4 Jesus celkkii: “Mii mus lea dahkamuššan duinna, nisson? Mu áigi ii leat velá boahtán.” 5 Su eadni dajai bálvaleddjiide: “Maid ihkinassii son didjiide dadjá, dan dahket.”

6 Das ledje guhtta geađgečáhcelihti juvddálaččaid buhtistanmeanuid várás; guhtege lihtti gesii birrasii guokte dahje golbma áŋkara. 7 Jesus celkkii bálvaleddjiide: “Devdet lihtiid čáziin.” Ja bálvaleaddjit devde daid gitta ravddaid dássái. 8 De son celkkii: “Goivot dál ja dolvot headjaverddii”, ja sii dolvo. 9 Headjaverdde máisttii čázi mii dál lei šaddan viidnin. Son ii diehtán gos viidni lei boahtán, muhto bálvaleaddjit geat ledje goivon čázi, gal dihte. Son rávkkai irggi 10 ja dajai sutnje: “Buohkat guossohit vuos buori viinni ja de, go guossit juhkaluvvet, buktet heajubu. Muhto don leat vurken buori viinni gitta dássážii.”

11 Dát lei vuosttaš Jesusa mearkkain, ja son dagai dan Kanas Galileas. Son almmustahtii dainna iežas hearvásvuođa, ja su máhttájeaddjit osko sutnje.

12 Das maŋŋil Jesus ja su eadni, vieljat ja máhttájeaddjit manne Kapernaumii ja orro doppe muhtun beivviid.

Jesus buhtista tempela

13 Juvddálaččaid beassášbasit lahkanedje, ja Jesus vulggii Jerusalemii. 14 Tempelis son oinnii daid geat ledje vuovdimin vuovssáid, sávzzaid ja duvváid. Doppe ledje čohkkámin maiddái ruhtacuvkeheaddjit. 15 De son dagai oarrabihtáin spižá ja ájii olggos tempelis buohkaid oktan sávzzaiguin ja vuovssáiguin. Son biđgii ruhtacuvkeheddjiid ruđaid ja gomihii sin bevddiid. 16 Daidda geat vuvde duvváid, son celkkii: “Dolvot dáid eret! Allet daga mu Áhči viesu gávpeviessun!” 17 Dalle su máhttájeaddjit muitájedje mii čállagiin daddjojuvvo: Buolli áŋgirvuohta du viesu dihte loaktá mu.

18 Juvddálaččat dadje sutnje: “Man mearkka don čájehat midjiide, go dagat dákkáriid?” 19 Jesus vástidii: “Gaikkodehket dán tempela, de mun čuoččáldahtán dan golmma beaivvis.” 20 Dalle juvddálaččat dadje: “Dát tempel lea huksejuvvon njealljelogiguhtta jagi, ja don čuoččáldahtát dan fas golmma beaivvis!” 21 Muhto tempel maid Jesus oaivvildii, lei su iežas rumaš. 22 Go son dasto lei čuožžilan jábmiid luhtte, de máhttájeaddjit muitájedje ahte son lei cealkán dán, ja sii osko čállagii ja dan sátnái maid Jesus lei sárdnon.

23 Go Jesus lei beassášbasiid Jerusalemis, de eatnagat osko su nammii, go sii oidne mearkkaid maid son dagai. 24 Muhto Jesus ii čájehan sidjiide luohttámuša, danin go son dovddai sin buohkaid. 25 Son ii dárbbašan ovttage duođaštusa olbmo birra, danin go son ieš diđii mii olbmo siste lea.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.