Stor bibelmangel i Venezuela
Gi sammenEn Bibel koster 49 kroner
Gå til forsiden

Joel

1 

1 Hearrá sátni mii bođii Joelii, Petuela bárdnái.

Rásselohkut

2 Gullet dán, vuorrasat,

guldalehket, buot eatnama ássit:

Leago dákkár dáhpáhuvvan din áiggis

dahje dalle go din áhčit ledje eallimin?

3 Muitalehket dan mánáidasadet,

muitalehkoset sii dan iežaset mánáide

ja siigis boahtti bulvii:

4 Dan mii bázii rásselohkuin

borre rássejursit,

dan mii bázii rássejursiin

borre rásseborrit,

dan mii bázii rásseborriin

borre rássemuozut.


5 Morihehket, juhkan olbmot, ja čirrot!

Váidalehket, buot viidnejuhkkit,

viidnemuorjesáhpi maid ehpet

beassan máistit!

6 Álbmot lea boahtán mu eatnamii,

gievrras ja lohkameahttun álbmot.

Dan bánit leat dego ledjona bánit,

dan máttabánit nugo njiŋŋelas ledjonis.

7 Dat guorbadii mu viidnemuoraid

ja dojii fiikonmuoraidan,

njalddii bárkku ja gaikkui lasttaid,

nu ahte suorggit šadde vielgadin.

8 Fuoikko dego nieida

gii morašbiktasat gárvun

fuoiku nuorravuođa irggi.

9 Borramušoaffar ja juhkamušoaffar

leat jávkan Hearrá viesus.

Báhpat, Hearrá bálvaleaddjit, moraštit.

10 Bealddut leat duššaduvvon,

eanan morašta,

gordni lea billistuvvon,

viidni lea goikan ja olju sotnan.

11 Eanadoallit leat suorganan,

viidnešaddadeaddjit váidalit

nisuid ja bivggiid,

eatnama šaddu lea massašuvvan.

12 Viidnemuorra lea goikan,

fiikonmuorra goldnan.

Granáhtaehpelmuorra,

pálbma ja ehpelmuorra,

buot eatnama muorat leat ástan.

Illu lea gáidan olbmuin.


13 Gárvodehket morašbiktasiid

ja váidalehket, báhpat,

ludjet, dii geat bálvalehpet áltáris!

Mannet tempelii ja gohcet

morašbiktasat gárvun,

dii Ipmila bálvaleaddjit,

danin go borramušoaffar

ja juhkamušoaffar leat nohkan

din Ipmila viesus.

14 Gulahehket fásttu,

bovdejehket čoahkkái

bassi čoakkalmasa!

Čohkkejehket vuorrasiid

ja buot eatnama ássiid

Hearrá, Ipmileattet, vissui,

čurvot Hearrái.


15 Vuoi dan beaivvi!

Hearrá beaivi lea lahka,

dat boahtá heavahussan

maid Buotveagalaš vuolggaha.

16 Borramuš jávká min oaidnut,

illu ja ávvu min Ipmila viesus.

17 Gilvagat leat goikan eatnamii,

vuorkágárit leat billistuvvon,

láđut leat gahččan ja gordni billašuvvan.

18 Mo šibihat bárgot!

Šibitealut leat golgosis,

dain ii leat guohtun;

sávzaealutnai gillájit.


19 Hearrá, du mun čuorvvun,

dasgo dolla lea loaktán meahci guohtumiid,

dollanjuokčamat leat boaldán

buot eatnama muoraid.

20 Maiddái meahcispiret

gehččet du beallái ja sáđđot,

dasgo jogažat leat goikan

ja dolla lea loaktán meahci guohtumiid.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.