Ukraina flaggRedder Bibelen liv i Ukraina?
Finn ut mer
Gå til forsiden

Váidaluslávlagat

1

Vuosttaš lávlla

1 Gal juo lea okto dat gávpot

mas ovdal ledje nu ollu olbmot!

Álbmogiid njunuš

lea šaddan leaskan,

eatnamiid dronnet

bargá šlávvabarggu.


2 Son čierru bahččagit ihkku,

gatnjalat golget su nieraid mielde.

Ii oktage su ráhkisteddjiin

leat jeđđemin su.

Buot su ustibat leat beahttán su,

leat šaddan su vašálažžan.


3 Juda šattai gierdat guhká

váivvi ja áŧestusa,

dál dat lea dolvojuvvon eatnamisttis.

Dál dat ássá vierroálbmogiid gaskkas

iige gávnna muosi.

Doarrideaddjit jukse su,

ii lean geaidnu man báhtarit.


4 Siona bálgát moraštit,

ii oktage boađe doallat basiid.

Su poarttat leat ávdimin,

su báhpat šuhkket,

nieiddat vuobaidit.

Bahča lea Siona moraš.


5 Su vuostálastiin lea fápmu,

su vašálaččat leat oadjebasat.

Hearrá diktá su gillát

su eatnat suttuid dihte.

Su mánát šadde mannat fáŋgavuhtii,

vašálaččat dolvo sin eret.


6 Nieida Sion lea massán

buot hearvásvuođa.

Su oaivámuččat ledje dego sarvagat

mat eai gávdnan guohtuma.

Vuoimmeheapmin sii báhtaredje

doarrideaddjis.


7 Heađis ja ruovttuhisvuođas

Jerusalem muitá divrras dávviriid

mat sus leat leamaš

gitta dološ áiggi rájes.

Dál go su álbmot gahčai vašálačča gihtii,

de ii oktage boahtán veahkkin.

Su vašálaččat gehčče sutnje bilkidemiin

ja boagustedje su heavu.


8 Sakka lea Jerusalem suddudan,

danne buohkat fasttášit su.

Dat geat ovdal gudnejahtte su,

badjelgehččet su dál

go oidnet su álásin.

Son šuohkká ja jorggiha nuppos.


9 Buhtismeahttunvuohta duolvvida

su bivttashelmmiid.

Ii son jurddašan makkár loahppa

sutnje boahtá,

čiekŋalassii son lea vudjon.

Ii oktage jeđđe su.

Hearrá, geahča mu vártnuhisvuhtii!

Geahča mo vašálaš goarggastallá!


10 Vašálaš geigii gieđa

váldit buot su divrras dávviriid.

Son šattai oaidnit vierrásiid

mannamin bassibáikái,

daid geaid don, Hearrá, ledjet gieldán

boahtimis iežat searvegoddái.


11 Oppa su álbmot šuohkká

ja ohcá láibbi.

Olbmot lonuhit divrras dávviriiddiset

borramušain

vai bissot heakkas.

Geahča, Hearrá, geahča

man badjelgehččojuvvon mun lean.


12 Iigo dat čuoze din váibmui,

dii geat mannabehtet meattá?

Leago bávččas dan bákčasa veardásaš

maid Hearrá divttii mu gillát

buolli moaris beaivvi?


13 Allagasas Hearrá vuolggahii

dola mu dávttiide ja bagadii daid.

Son lebbii fierpmi mu julggiid várás,

son norddastii mu eret

ja guđii mu vártnuheapmin,

vuoimmeheapmin beaivvis beaivái.


14 Hearrá dagai mu suttuid geasisin

ja bijai dan deaddit mu niskki.

Son dojii mu fámu.

Son guđii mu dakkár olbmuid gihtii

geain mun in biđe.


15 Hearrá hilggui

buot mu soahtesáŋgáriid.

Son rávkkai joavkku mu vuostá

cuvket mu nuorra olbmáid.

Hearrá duolmmai Juda

dego viidnemurjjiid

viidnebohčingáris.


16 Buot dán dihte mun čierun,

gatnjalat golget mu čalmmiin.

Guhkkin leat dat

geat máhtášedje jeđđet mu

ja addit munnje eallinmovtta.

Buot mu bártnit leat gahččan,

vašálaš lei menddo gievra.


17 Sion geaigguha gieđaid,

muhto ii oktage jeđđe su.

Hearrá rávkkai ránnjáálbmogiid

Jakoba vašálažžan.

Jerusalem lea šaddan sidjiide

buhtismeahttumin.


18 Hearrá lea dahkan riekta,

dasgo mun nággáruššen

su báhkkomiid vuostá.

Gullet datte, buot álbmogat,

ja oidnet mu bákčasa!

Mu nieiddat ja nuorra olbmát

leat dolvojuvvon fáŋgavuhtii.


19 Mun čurvon ráhkisteddjiidan,

muhto sii behtte mu.

Mu báhpat ja vuorrasat dušše gávpogii

go ledje ohcamin borramuša,

vai beasašedje gádjut heakkaset.


20 Hearrá, geahča, mun lean heađis!

Mu siskkildas báttada,

mu váimmus lea áŧestus,

danne go mun ledjen jeagoheapme.

Olgun miehkki gottii mu mánáid,

viesus hearjidii rohttu.


21 Olbmot gullet mo mun šuohkán,

muhto ii oktage jeđđe mu.

Buot mu vašálaččat gullet

mu lihkuhisvuođa

ja illudit, danne go dat lea du dahku.

Dat beaivi maid don almmuhit,

lea boahtán.

Muhto sidjiide geavvá nugo munnjege.


22 Guorahala buot sin bahávuođa!

Daga sidjiide nugo dahket munnje

buot mu suttuid dihte.

Oruskeahttá mun šuohkán,

mu váibmu lea buohcci.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.