Stor bibelmangel i Venezuela
Gi sammenEn Bibel koster 49 kroner
Gå til forsiden

Lukasa evangelium

10

Jesus vuolggaha čiežalogiguokte máhttájeaddji

1 Das maŋŋil Hearrá válljii velá čiežalogiguokte máhttájeaddji ja vuolggahii sin guoktásiid guoktásiid iežas ovdal juohke gávpogii ja gillái gosa ieš áiggui mannat.

2 Son celkkii sidjiide:

“Ládju lea stuoris, muhto bargit uhccán. Rohkadallet dan dihte láju hearrá vuolggahit bargiid ládjosis.

3 Vulget, mun vuolggahan din dego lábbáid gumppiid gaskii. 4 Allet váldde mielde burssa, lávkka alletge gápmagiid, alletge buorástahte ovttage mátkkis. 5 Go boahtibehtet muhtun vissui, de celket ovddemustá: ‘Ráfi dán vissui.’ 6 Jos das lea muhtun ráfi olmmoš, de din ráfi bissu su luhtte, muhto jos ii leat, de dat máhccá didjiide. 7 Orrot dan viesus ja borret ja juhket maid das fállet didjiide, dasgo bargi ánssáša bálkkás. Allet mana viesus vissui.

8 Go boahtibehtet muhtun gávpogii ja dan olbmot váldet din vuostá, de borret mii din ovdii biddjojuvvo, 9 buoridehket buhcciid geat leat das ja muitalehket buohkaide: Ipmila riika lea boahtán din lahka. 10 Muhto jos muhtun gávpogis gosa boahtibehtet, olbmot eai váldde din vuostá, de mannet dan gáhtaide ja dadjet: 11 ‘Mii savdnjilit eret velá muolddage mii lea darvánan min julggiide din gávpogis. Muhto dihtet ahte Ipmila riika lea boahtán lahka!’ 12 Mun cealkkán didjiide: Sodomai geavvá duopmobeaivvi geahppadeappot go dán gávpogii.

13 Vuoi du, Korasin! Vuoi du, Betsaida! Jos dat oavddut mat leat dahkkojuvvon dudno gáhtain, livčče dahkkojuvvon Tyrosis ja Sidonis, de dat livččiiga áigá juo jorgalan horstta ja gunaid siste. 14 Duopmobeaivvi Tyrosii ja Sidonii geavvá geahppadeappot go dudnuide. 15 Ja don, Kapernaum, jogo don aliduvvot albmái? Vuolás jábmiidáibmui don norddastuvvot!

16 Gii gullá din, dat gullá mu, ja gii hilgu din, dat hilgu mu. Muhto gii hilgu mu, dat hilgu su gii mu lea vuolggahan.”

Máhttájeaddjit máhccet

17 Dat čiežalogiguokte máhttájeaddji máhcce ilus ja dadje: “Hearrá, velá bahás vuoiŋŋatge jeagadit min, go mii gohččut daid du nammii.” 18 Jesus celkkii sidjiide: “Mun oidnen mo Sáhtán gahčai vuolás almmis dego álddagas. 19 Duođaid, mun lean addán didjiide fámu duolbmat gearbmašiid ja skorpiovnnaid ja bihtit buot vašálačča fámus. Ii mihkkege vahágahte din. 20 Allet almmatge illut dan dihte go vuoiŋŋat jeagadit din, muhto illudehket dan dihte go din namat leat čállojuvvon albmái.”

Jesus rámida Ipmila

21 Dan bottus son ávvudii Bassi Vuoiŋŋas ja celkkii:

“Mun rámidan du, Áhčážan, almmi ja eatnama Hearrá, ahte leat čiehkan dán viisáin ja jierpmálaččain, muhto leat almmuhan dan mánáid láhkásaččaide. Duođaid, Áhčážan, nu lei du buorre dáhttu. 22 Buot mu Áhčči lea oskkildan mu háldui. Dušše Áhčči diehtá gii Bárdni lea, ja dan gii Áhčči lea, diehtá dušše Bárdni ja dat geasa Bárdni dáhttu su almmuhit.”

23 De Jesus jorgalii máhttájeddjiid beallái ja celkkii sidjiide sierra: “Ávdugasat dat čalmmit mat oidnet maid dii oaidnibehtet! 24 Mun cealkkán didjiide: Ollu profehtat ja gonagasat leat dáhtton oaidnit maid dii oaidnibehtet, eaige leat beassan oaidnit, ja gullat maid dii gullabehtet, eaige leat beassan gullat.”

Váibmoláđis samarialaš

25 Muhtun láhkadovdi dáhtui geahččalit Jesusa. Son dajai: “Oahpaheaddji, maid mun galggan dahkat vai árben agálaš eallima?” 26 Jesus jearai: “Mii lea čállojuvvon láhkii? Maid don ieš das logat?” 27 Olmmái vástidii: “Ráhkis Hearrá, Ipmilat, oppa váimmus ja oppa sielus ja oppa fámus ja oppa mielas, ja lagamuččat nugo iežat.28 Jesus celkkii: “Don vástidit riekta. Daga nie, de oaččut eallit.” 29 Muhto olmmái vikkai čájehit iežas vuoigatlažžan ja jearai: “Gii dalle lea mu lagamuš?” 30  Jesus vástidii su gažaldahkii ná:

“Muhtun olmmái lei mannamin Jerusalemis Jerikoi, go rievvárat fallehedje su. Rievvárat nuolahedje su ja illastedje su. De sii vulge ja guđđe su dasa beallejábmin. 31 Dan geainnu deaivvai vádjolit báhppa, muhto go son oinnii olbmá, de son garvvii ja manai meaddel. 32 Nu dagai maiddái levilaš gii deaivvai boahtit dasa: Go son oinnii olbmá, de songe garvvii ja manai meaddel. 33 Muhto muhtun samarialaš bođii mátkkoštettiin olbmá guovdu, oinnii su ja árkkášii su njuorrasit. 34 Son manai su lusa, golggahii oljju ja viinni su háviide ja čanai daid. De son bajidii olbmá iežas ásena sealgái, doalvvui su guossevissui ja divššui su. 35 Maŋit iđida son válddii burssas guokte denára, attii daid guosseviesu isidii ja dajai: ‘Divššo su, ja maid don velá eambbo golaheaččat, dan mun mávssán go boađán ruoktot.’

36 Guhtemuš dán golbmasis orru du mielas leamaš dan olbmá lagamuš gii lei šaddan rievváriid gihtii?” 37 Láhkadovdi vástidii: “Dat gii čájehii sutnje váibmoláđisvuođa.” Jesus celkkii: “Mana ja daga seammá láhkái.”

Marta ja Maria

38 Jesus vádjolii ovddos oktan máhttájeddjiidisguin ja bođii muhtun gillái. Doppe muhtun nisson gean namma lei Marta, válddii su vissosis. 39 Martas lei oabbá, Maria. Son čohkánii Hearrá julggiid ovdii ja guldalii su sániid. 40 Marta váivvidii iežas ollu ráhkademiin, ja danin son bođii dadjat: “Hearrá, itgo don beroš das ahte mu oabbá lea guođđán buot bargguid munnje? Gohčo su veahkehit mu.” 41 Muhto Hearrá vástidii: “Marta, Marta, don moraštat ja muosehuvat eatnat áššiin. 42 Dušše okta lea dárbbašlaš. Maria lea válljen buori oasi, iige dat váldojuvvo sus eret.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.