Ukraina flaggRedder Bibelen liv i Ukraina?
Finn ut mer
Gå til forsiden

Lukasa evangelium

14

Jesus buorida olbmá sabbahin

1 Muhtin sabbaha Jesus lei farisealaš ráđđehearrá guossin, ja buohkat atne su čalmmis. 2 Dalle su lusa bođii olmmái geas lei čáhcedávda. 3 Jesus jearai láhkadovdiin ja farisealaččain: “Leago lobálaš buoridit sabbahin vai ii?” 4 Muhto sii orro jávohaga. Dalle Jesus guoskkahii olbmá, buoridii su ja luittii su mannat. 5 Ja son celkkii sidjiide: “Maid dii ieža dahkabehtet? Jos soapmása bárdni dahje vuoksá gahččá gáivui, de almma son geassá dan bajás dallánaga, vaikko livččii sabbat?” 6 Sii eai máhttán vástidit dasa maidege.

Čeavláivuohta ja vuollegašvuohta

7 Go Jesus mearkkašii ahte guossit válljejedje beavddis boaššumus sajiid, de son muitalii sidjiide veardádusa:

8 “Go leat bovdejuvvon guossemállásiidda, de ale váldde boaššumus saji. Muhtun eará guossi soaitá leat árvvoleabbo go don, 9 ja guossoheaddji gii lea bovden dudno guktuid, boahtá ja dadjá dutnje: Čáhkke saji dán guossái. Dalle don šattat heahpanemiin mannat uskimus sadjái. 10 Muhto go leat bovdejuvvon guossái, de váldde beavddis uskimus saji. Dalle guossoheaddji boahtá ja dadjá dutnje: Ustiban, čohkán boaššubuidda, ja don oaččut gudni buot gussiid oaidnut. 11 Gii iežas alida, dat vuoliduvvo, ja gii iežas vuolida, dat aliduvvo.”

12 De Jesus celkkii dasa gii lei bovden su: “Go don bovdet gussiid gaskabeaimállásiidda dahje eahkedismállásiidda, de ale bovde ustibiiddát, ale vieljaidat, fulkkiidat alege rikkis siidaguimmiidat, danin go siigis vedjet bovdet du, ja nu don oaččut buot das bálkká. 13 Muhto go don lágidat guossemállásiid, de bovde gefiid ja rámbbiid, lápmásiid ja čalmmehemiid. 14 De don leat ávdugas, danin go sis ii leat mihkkege addit fas dutnje. Don oaččut bálkká dalle go vanhurskásat čuožžilit jábmiid luhtte.”

Stuorra guossemállásat

15 Dalle muhtun guossi gii gulai dán, dajai Jesusii: “Ávdugas dat gii beassá leat mállásiin Ipmila riikkas.”

16 Jesus celkkii sutnje:

“Muhtun olmmái lágidii stuorra guossemállásiid ja bovdii eatnagiid. 17 Go guossemállásiid áigi bođii, de son vuolggahii bálvaleaddjis cealkit daidda geat ledje bovdejuvvon: Bohtet, dasgo buot lea gárvvis! 18 Muhto sii buohkat ripme beasadallat. Muhtun dajai: ‘Mun lean oastán bealddu ja ferten vuolgit dan geahččat, ándagassii go in sáhte boahtit.’ 19 Nubbi dajai: ‘Mun lean oastán vihtta vuoksábára ja lean vuolgimin daid geahččalit, ándagassii go in sáhte boahtit.’ 20 Goalmmátgis dajai: ‘Mun lean aiddo náitalan, ja danin in sáhte boahtit.’ 21 Bálvaleaddji máhcai ja muitalii dán hearrásis. Dalle dáluisit moaráhuvai ja dajai bálvaleaddjásis: ‘Vuolgge hoahpus gávpoga gáhtaide ja luottaide ja buvtte deike gefiid ja rámbbiid, čalmmehemiid ja lápmásiid.’ 22 Bálvaleaddji bođii dadjat: ‘Hearrá, mun lean dahkan nugo don gohččot, muhto ain lea sadji.’ 23 Dalle hearrá dajai bálvaleaddjásis: ‘Mana máđijaide ja bálgáide ja nágge olbmuid boahtit, vai mu viessu dievvá. 24 Mun cealkkán didjiide ahte ii oktage dain geaid mun ledjen bovden, beasa mu guossemállásiidda.’”

Maid Jesus gáibida máhttájeddjiinis

25 Jesusa mielde vádjoledje ollu olbmot. Son jorggihii ja dajai sidjiide:

26 “Jos guhtege boahtá mu lusa iige vašut áhčis ja eatnis, áhkás ja mánáidis, vieljaidis ja oappáidis ja velá iežas heakkage, de son ii sáhte leat mu máhttájeaddji. 27 Gii ii guotte ruossas ja vádjol mu maŋis, dat ii sáhte leat mu máhttájeaddji.

28 Jos muhtin dis áigu hukset toartna, de almma son vuos čohkána rehkenastit goluid vai oaidná, suitágo son hukset dan gárvvisin. 29 Muđui sáhttá geavvat nu ahte son bidjá vuođu, muhto šaddá heaitit barggu gaskan. Dalle buohkat geat dan oidnet, bilkidišgohtet su ja dadjet: 30 ‘Dát olmmái álggii gal hukset, muhto ii ollašuhttán.’ 31 Dahje jos gonagas áigu vuolgit soahtat nuppiin gonagasain, de iigo son vuos čohkán smiehttat sáhttágo son logiduhát olbmáin mannat nuppi vuostá gii boahtá su vuostá guoktelogiduhát olbmáin. 32 Jos son ii sáhte dan, de son vuolggaha áirasiid bivdit ráfi go nubbi lea ain guhkkin.

33 Dihtet dalle: Ii oktage dis sáhte leat mu máhttájeaddji muđui go luohpá buot das mii sus lea.

34 Sálti lea ávkkálaš. Muhto jos sálti veagahuvvá, de mo dat šaddá fas sálttisin? 35 Dat ii dohkke ii beldui iige duktan, muhto bálkása.

Geas leat bealjit, dat gullos!”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.