Ukraina flaggRedder Bibelen liv i Ukraina?
Finn ut mer
Gå til forsiden

Lukasa evangelium

24

Jesusa bajásčuožžileapmi

1 Vuosttaš beaivvi sabbaha maŋŋil nissonat juo árrat iđedis manne hávddi lusa ja válde mielde njálggahájat vuoidasiid maid ledje ráhkadan. 2 Sii oidne ahte geađgi lei fierahuvvon eret hávdenjálmmis. 3 Go sii manne sisa, de sii eai gávdnan Hearrá Jesusa rupmaša, 4 eaige sii diehtán maid jurddašit. Fáhkkestaga sin ovddas čužžo guokte olbmá šerres biktasat gárvun. 5 Nissonat suorganedje ja sojaldahtte muođuid eatnama guvlui. Muhto olbmát dajaiga sidjiide: “Manne dii ohcabehtet jábmiid gaskkas su guhte eallá? 6 Ii son leat dás, son lea čuožžilan jábmiid luhtte. Muitet maid son sártnui didjiide go ain lei Galileas: 7 ‘Olbmobárdni addojuvvo suttolaš olbmuid gihtii ja russiinávlejuvvo, muhto goalmmát beaivvi son čuožžila jábmiid luhtte.’” 8 Dalle sii muitájedje maid Jesus lei sárdnon.

9 Go nissonat ledje máhccan hávddi luhtte, de sii muitaledje visot dan oktanuppelohkái apostalii ja buot earrásiidda. 10 Nissonat ledje Maria Magdalena, Johanna ja Jakoba eadni Maria, ja singuin ledje maid eará nissonat. Sii muitaledje visot apostaliidda, 11 muhto apostalat atne nissoniid sániid joavdelas sáhkan eaige jáhkkán sidjiide. 12 Peter vulggii goit viega hávddi lusa. Go son guovllai dan sisa, de son oinnii dušše liinniid, ja son vulggii eret ja imaštalai mii lei dáhpáhuvvan.

Jesus almmustuvvá Emmausa geainnus

13 Seammá beaivvi guokte máhttájeaddji ledje mannamin gillái man namma lea Emmaus. Dohko olmmoš vázzá Jerusalemis guovtte diimmus. 14 Soai sártnodeigga buot das mii lei dáhpáhuvvan. 15 Go soai leigga sártnodeamen ja árvaladdamin dán birra, de Jesus bođii ieš ja váccii sudnuin. 16 Soai eaba goit dovdan su, danin go sudno čalmmit ledje dahppojuvvon. 17 Jesus jearai sudnos: “Mat ságaid dat leat maid doai sárdnubeahtti goabbat guimmiineatte?” Soai orusteigga morašlažžan, 18 ja nubbi gean namma lei Kleopas, vástidii: “Don dáiddát leat Jerusalemis áidna vierroolmmoš gii it dieđe, mii doppe lea dáhpáhuvvan dáid beivviid.” 19 Jesus jearai: “Mii lea dáhpáhuvvan?” Soai vástideigga: “Dat mii dáhpáhuvai nasaretlaš Jesusii. Son lei profehta, fámolaš sániin ja daguin Ipmila ja oppa álbmoga ovddas. 20 Min bajimusbáhpat ja oaivámuččat adde su dubmejuvvot jápmimii ja russiinávlejedje su. 21 Muhto mii doaivvuimet ahte son livččii dat gii lonista Israela. Iige das galle. Dál lea juo goalmmát beaivi dan rájes go dat dáhpáhuvai, 22 ja dál soames nissonat min searvvis leat suorggahan min. Árrat otná iđida sii manne hávddi luhtte, 23 muhto eai gávdnan su rupmaša. Go sii ledje boahtán doppe, de sii muitaledje ahte ledje oainnáhusas oaidnán eŋgeliid geat celke ahte Jesus eallá. 24 Dalle soapmásat mis manne hávddi lusa ja gávnnahedje ahte áššit ledje nugo nissonat ledje muitalan. Muhto Jesusa sii eai oaidnán.”

25 Dalle Jesus celkkii sudnuide: “Man jierpmeheamit dii lehpet, ja nu hilljánat oskut buot dan maid profehtat leat cealkán. 26 Iigo Messias galgan gillát dan ja mannat hearvásvuohtasis.” 27 Ja son čilgegođii sudnuide Mosesa ja buot profehtaid rájes mii su birra lea čállojuvvon buot čállagiin.

28 Sii ledje lahkaneamen dan gillái gosa máhttájeaddji guovttos leigga mannamin. Jesus lei mahkáš mannamin guhkkeliidda, 29 muhto soai nággiiga su sakka ja dajaiga: “Oro munno luhtte! Lea juo eahketbeallái ja beaivi vuollána.” Dalle son manai sisa ja orui sudno luhtte. 30 Go son dasto lei boradeamen sudnuin, de son válddii láibbi, giittii Ipmila, doadjalii láibbi ja attii sudnuide. 31 Dalle sudno čalmmit rahpasedje ja soai dovddaiga su. Muhto seammás son jávkkai sudno oidnosis. 32 Soai árvaleigga goabbat guimmiineaskka: “Almma munno váibmu lei buollimin, go son mátkkis sártnui munnuide ja čilgii čállagiid?” 33 Soai vulggiiga dallánaga ja máhcaiga Jerusalemii. Doppe ledje čoahkis oktanuppelohkái máhttájeaddji ja buot earát, 34 ja sii dadje: “Hearrá lea duođaid čuožžilan jábmiid luhtte! Son lea almmustuvvan Simonii.” 35 Dát guovttes muitaleigga mii lei dáhpáhuvvan mátkkis ja mo soai leigga dovdan Jesusa, go son doadjalii láibbi.

Jesus almmustuvvá máhttájeddjiide

36 Go sii ledje ain sárdnumin, de fáhkkestaga Jesus ieš čuoččui sin gaskkas ja celkkii: “Ráfi didjiide.” 37 Sii suorganedje ja balle, dasgo sii gádde ahte sii oidne vuoiŋŋa. 38 Muhto Jesus celkkii sidjiide: “Manne dii suorganehpet? Manne din millii badjánit eahpádusat? 39 Gehččet mu gieđaid ja mu julggiid: Mun ieš dás lean. Guldalehket mu ja gehččet. Ii vuoiŋŋas leat oažži eaige dávttit, nugo oaidnibehtet mus leat.” 40 Ja son čájehii sidjiide iežas gieđaid ja julggiid. 41 Sii eai dattetge velá diehtán maid oskut, sii ledje nu ilus ja ipmašis. Dalle Jesus jearai: “Leago dis dáppe mihkkege maid borrat?” 42 Sii adde sutnje basson guollebihtá 43 ja oidne go son válddii dan ja borai.

44 Jesus celkkii sidjiide: “Dán mun oaivvildin go sártnodin dinguin dalle go ain ledjen dinguin. Buot dat fertii ollašuvvat mii mu birra lea čállojuvvon Mosesa lágas, profehtaid girjjiin ja sálmmain.” 45 De son rabastii sin jierpmi áddet čállagiid. 46 Son celkkii sidjiide: “Ná lea čállojuvvon: Messias fertii gillát ja goalmmát beaivvi čuožžilit jábmiid luhtte, 47 ja buot álbmogiidda, Jerusalema rájes, galgá sárdniduvvot jorgaleapmi ja suttuid ándagassii addojupmi. 48 Dii lehpet dán duođašteaddjit. 49 Mun vuolggahan didjiide dan maid mu Áhčči lea lohpidan. Orrot dán gávpogis dassážii go gárvvuhuvvobehtet fámuin allagasas.”

Jesus váldojuvvo albmái

50 Jesus doalvvui máhttájeddjiid gávpoga olggobeallái lahka Betania, ja doppe son loktii gieđaid ja buressivdnidii sin. 51 Buressivdnidettiin son earránii sis, ja son váldojuvvui bajás albmái. 52 Sii luoitádedje eatnamii ja gudnejahtte su, ja de sii máhcce illudemiin Jerusalemii. 53 Sii ledje oktilassii tempelis ja rámidedje Ipmila.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.